DÍLI----Relasiona ho ahi EDTL nian ne’ebe mak ohin loron mate-lakan iha Teritoria Timor Laran Tomak fó inpaktu boot ba forsa (kekuatan) Eletrisidade no hosi forsa Eletrisidade ne’ebe la Estabel konsege estraga sasan konsumidores sira nian no piorliu mak estraga Sasan Elektroniku loja sira nian.

Tuir Jenerál Manajer Loja JACINTO Karen Uitomo hatete sira ohin loron preokupasaun boot ba voltajen eletrisidade ne’ebe la estable hodi estraga sasán barak iha loja laran. No tuir lolos loja JACINTO tenke utiliza eletrisidade ho voltajen 220 kwh atu enerjia eletrisidade bele sufisiente maibe ohin loron tun makas

“Oras ne’e loja JACINTO simu enerjia eletrisidade nian la-estabel tanba iha dader to’o loraik enerjia eletrisidade nia voltajen mai loja JACINTO iha de’it 206 kwh no hosi loraik tuku 6 ba leten to’o kalan eletrisidade nia voltajen to’o de’it 215 kwh.’’ Dehan General Manager Karen Uitomo ba Business Timor (BT) iha Edifísiu Supermerkadu JACINTO, Kuluhun, Díli, Kinta-Feira (19/12/2019).

Nia mós dehan katak ho voltajen ahi eletrisidade ne’ebe la estabel nia fó inpaktu ba iha sasan eletroniku loja nian ne’ebe mak hodi rai sasan sira inklui mós estraga sasan barak mós. “Sasán hirak ne’ebé mak oras nee hetan ona estragu mak hanesan, Jeradór, Komputadór, AC ho modelu 3 Pk no 5 Pk, tanba hosi material hirak nee presiza duni eletrisidade ne’ebé mak sufisiente ’’ Dehan Nia.

Nia afirma katak ho problema refere laos deit akontese deit iha loja JACINTO maibé estraga mós sasan balun iha kompaña MAHANAIN iha Bidau Lesidere ne’ebé mak nain mós hosi JACINTO nian. Karen mós dehan katak ho problema Voltajen enerjia eletrisidade la estabel ne’e identifika ona hosi loja JACINTO nia eletrisista sira hosi kompañia Vinod Pattel tanba nee mak husu ba parte EDTL atu bele resolve lalais problem refere hodi labele fó estragus ba ema nia sasán sira.

“Durante ne’e hosi parte setór privadu sira kontribui makas tebes ba kustu enerjia eletrisidade ne’ebé mak hosi parte JACINTO rasik tenke selu ho montante dollar Amerikanu $6.000 kada fulan’’. Informa Nia. Oras nee hosi parte JACINTO rasik lakon ona osan besik dollar Amerikanu $3.000 hodi halo manutensaun no hadi’a material sira ne’ebé mak hetan estragu. Husu ba parte EDTL atu bele koopera ho di’ak hodi bele identifika lalais problema no tau importánsia no resolve lalais ba problema ne’e. (BT)