DÍLI----Bazeia ba debate Jeneralidade proposta Órsamentu Jeral Estadu iha Parlamentu Nasional durante loron rua hahu hosi loron 2-3 Dezembru la konsege hakat liuba loron datoluk tanba membru Parlamentu Kontra makas tanba OJE ne’ebe governu VIII propoin boot tebes no ikus mai governu liuhosi Primeiru Ministru dada fali (retira) hosi diskusaun hodi halo reformulasaun.

Tanba iha aprezentasaun Órsamentu Jeral Estadu (OJE) tinan fiskal 2020 ba iha Parlamentu Nasional ho montante dollar Amerikanu Billaun $1.950 no ikus retirasaun hodi halo formulasaun no liuhosi Primeiru Ministru Taur Matan Ruak retira no forma kedas ekipa tekniku ida ne’ebe fó fiar ba Prezidente Konsellu Ministru Agio Pereira hodi halo revizaun no ikus mai konsege iha rejultadu tanba iha loron 19 fulan Dezembru enkontru Konselu Ministru konsege halo aprovasaun OJE hamutuk Billaun $1.668.

Tan ne’e hosi Proposta Orsamentu ne’ebe mak antes ne’e haruka konsege hamenus Millaun $282 no rejultadu ikus mak ho total Billaun $1.668 ne’ebe mak sei haruka ba iha Parlamentu Nasional hodi halo diskusaun ba daruak. Tuir Ministra Finanças Interina Sara Lobo Brites hatete relasiona ho Governu daualu halo revizaun ba Orsamentu Jeral Estadu, ohin reuniaun Konsellu Ministru aprova fali ona orsamentu Jeral Estadu tinan fiskal 2020 ho montante Billaun $1.668 no orsamentu ne’e inklui reseitas ne’ebé mai hosi RAEOA/ZEESM, UE no Emprestimu, Alende orsamentu ne’e fahe ba prinsipiu fundamental lima.

“Ho reuniaun ohin governu liuhosi Reuniaun Konsellu Ministru deside aprova proposta OJE 2020 nian ho montante Billaun $1.668,” hateten Ministra Finanças en ezersísiu Sara Lobo Brites ba jornalista hafoin halo aprovasaun ba orsamentu iha salaun KM, Palasiu Governu, Kinta-Feira (19/12/2019).

Nia dehan, Reformulasaun OJE 2020 prepara haktuir ba prinsipiu fundamental lima mak hanesan, Sustentabilidade Fiskal iha tempu médiu no longo prazu nian, Aliñamentu ho prioridade nasional sira, kapasidade ejekusaun orsamentál, Kapasidade halo absorsaun ba Ekonomia lokal no kualidade orsamentu nian.

Tanba Xefe Bankada FRETILIN Aniceto Guterres hatete Governu ida ne’e ka’er nafatin politika fiskal espansionista, politika fiskal tuan mai hosi governu AMP sira uluk, maske la serve ona, Nune’e Governu tau orsamentu bar-barak hodi despeza publika atu provoka kresimentu ekonomiku pursentu 5.1 (5.1%) iha 2019 no pusentu 7.2 (7.2%) iha 2020.

Maibe hakarak aprezenta kresimentu ida ne’ebé solidu no kualidade atu sai hanesan nasaun ida ne’ebé iha mediu-altu iha 2030 haktuir Planu Estratejia Dezenvolvimentu (PED), tanba ne’e hare oinsa realistiku atu rezolve. “Tanba nemak Governu liuhosi Konsellu Ministru aprova ona, Orsamentu Jeral Estadu ne’ebé ho despezas públika estimadu tuir orden no orsamentu ne’e inklui reseitas ne’ebé mai hosi RAEOA/ZEESM, UE no Emprestimu no tau hamutuk nemak ho montante Billaun $1.668,” afirma Ministra Finanças en ezersísiu Sara Lobo Brites.

Nune’e duni, Orsamentu ne’ebé mak hetan aprovasaun ho montante dollar Amerikanu Billaun $1.668, ne’ebé sei kobre ba nesesidade tomak hosi programa no preoridade nasional VIII Governu konstituisional nian. “Valor orsamentu ne’ebé mak sei afeita ba Salariu no Vensimentu ho montante dollar Amerikanu Millaun $235.610, Bens no Servisus iha montante dollar Amerikanu $583.800, depois Tranferénsias Públikas iha montante dollar Amerikanu Millaun $328.206 no kapital ba dezenvolvimentu iha montante dollar Amerikanu Millaun $31.488.837,” tenik nia.

Nia haktuir, antes Governu aprova proposta Órsamentu Jeral Estadu (OJE) tinan fiskal 2020 ba iha Parlamentu Nasional ne’e ho montante dollar Amerikanu Billaun $1.950, depois deputadu sira kestiona maka’as no ikus mai Governu mόs rekuiñese OJE 2020 hakat liu Rendimentu Sustentavél Estimadu (RSE), Governu liuhosi Primeiru Ministru Taur Matan Ruak retira no forma fali ekipa ida, hodi halo revizaun no ikus mai reuniaun Konsellu konsege hetan aprovasaun ho montante dollar Amerikanu Billaun $1.668.

Tan ne’e, Governu retira no halo revizaun ba Órsamentu Jeral konsege ko’a tiha (absorve) dollar Amerikanu Millaun $282, nuene’e Órsamentu Jeral Estadu ne’e ho montante lolos dollar Amerikanu $1.4 deit.  “Maibe hanesan ohin ha’u hateten katak OJE 2020 ne’e inklui reseitas ne’ebé mai hosi RAEOA/ZEESM, UE no Emprestimu I soma hamutuk konsege hetan fali montante dollar Amerikanu Billaun $1.668,” hateten Ministra Interina Sara Lobo Brites.

Alende ne’e, Ministra Finanças Interina Sara Lobo Brites haktuir tan, Finalmente Primeiru Ministru mόs Agradese ba ekipa servisu ba Revizaun Orsamentu tanba ekipa konsege servisu maka’as hodi halo revizaun lalais ba Orsamentu Jeral Estadu. “Obrigado/a barak ba Ekipa revizaun Orsamentu ne’ebé mak lidera hosi Prezidente Konsellu Ministru Hermenegildo Agostu Cabral Perreira “Agio Perreira”, Ministra Finanças Interina Sara Lobo Brites, Ministru Transporte no Komunikasoens José Agustinho, Ministra Edukasaun Joventude no Deposrtu Dulce de Jesus,” hateten Ministra Finanças en ezersísiu. (BT)