DÍLI----VIII Governu liu husi Ministériu Turizmu Komérsiu no Industria (MTKI) hamutuk ho Liñas Ministeriais sira, ne’ebé hahú define ona produtu lokál iha Timor-Leste, hanesan Kafé, Kamí, Mina-Virjen, Au, Bani-Ben, Masin Lokál no produtu sira seluk, hodi promove iha Expozisaun Dubai-Uni Emirat Arab iha tinan 2020.

Tuir Diretór Jerál (DJ) Turizmu José Filipe Dias Quintas informa, Ministériu Turismu hamutuk ho Liñas Miniteriais sira, ne’ebé mak define ona produtu lokál hamutuk 9-10 hanesan ne’e, ne’ebé mak sei atu promove iha Expo Dubai tinan 2020. “Ami nia diskusaun ne’e define ona ne’ebé mak produsaun, kuaze hamutuk 9-10 hanesan ne’e, produtu ne’ebé mak prinsipál liu mak Kafé, Kamí, Mina Virjen, Bambu, Ai-Kameli, Bani-Ben, Masin Lokál no produtu sira seluk tan ne’ebé mak ita atu presiza,” dehan DJ Turizmu hafoin iha Hotel Timor (HT), Sexta-Feira (22/11/2019).

DJ hatutan, Riku Soin sira mak hanesan Fatuk no Mamer no produtu sira seluk ne’ebé mak Governu Idenfitka ona atu nune’e bele ba promove iha Dubai tinan oin. “Riku Soin Natureza sira ne’e mak hanesan Marmer, Fatuk, ne’ebé mak Treiten Invest, Agrikutura, Indústria, Komérsiu no Ministériu relevante balun, atu diskusaun kona-ba define kona-ba produtu atu lori ba Dubai,” dehan nia. Tambá ne’e produtu ne’ebé mak ita lista ona ne’e mak ita sei lori ba Dubai, atu diskusaun husi komisaun organizadora iha Dubai nian, tambá sira iha mekanismu no regra ne’ebé mak ita presiza hala’o tuir.

DJ haktuir tan lista sira ne’e sei iha enkontru, iha loron 28-30, ne’ebé atu aprezenta, atu nune’e sira bele haree ba produtu ne’ebé mak ita atu lori ba, tambá produtu sira ne’e ita tenki haree iha nia sertifikasaun. Nia dehan, Produtu ne’ebé ita foka liu ba produtu ne’ebé mak orgániku, ne’e saí produtu prinsipál ba ita, oinsá mak ita atu promove iha Dubai, Expo ne’e la’os ba área turismu de’it, maibé Setór hot-hotu laran. DJ klarifika liu tan, parte turizmu rekoñese órsamentu ne’ebé mak aloka kuaze Miliaun $2.1, bele mós sei hamenus, tambá parte Governu mós públika saí ona, seí halo redusaun ba órsamentu OJE 2020.

Tambá ne’e órsamentu ne’ebé mak atu aloka ba Dubai ne’e hamuutk Miliaun $2.1, ne’e iha kontestu Timor-Leste ne’e ita dehan órsamentu ne’ebé boot, maibé husi prespektiva ne’e importante tebés, ne’e expo Dubai 2020, tambá Timor-Leste hetan tratamentu espesiál. Nia haforsa liutan tanbásá mak Timor-Leste hetan tratamentu espesiál, ita nia paviliaun ema fó gratuita no edifisiu ida ba Sekretáriu nian mós bele gratuita durante fulan 6, ita haree ba nia medida mós boot liu fali Miliaun nian, no komisaun organizadora Dubai mós fó kontainer ida ne’ebé gratuita, atu nune’e ita bele lori ita nia produtu lokál sira.

Timor nu’udar nasaun ne’ebé soberanu, tanbá eventu ida ne’ebé internasionál iha história mundu nian, ita tenki aprezenta, ita mós iha potensialidade ne’ebé boot la’os ba área turizmu deit, agora mina no riku-soin ne’ebé mak ita presiza, aprezenta iha ne’ebá, oinsá ita mós atu dudu investidór sira. Tinan ida ne’e ita fa’an ita nia produtu lokál, ita sei lori arte jenatu, lori ba fa’an no ita sei lori produtu agrikultura sira, Governu nia responsablidade atu fasilita no sai ponte ba Setór Privadu sira.

SOSIEDADE SIVIL LAMENTA MTKI PLANO BA EXPO-DUBAI IHA TINAN 2020


Ho espozisaun refere Sosiedade Sivil lamenta governu Timor-Leste liu-liu Ministeriu Turizmu Komersiu Industria (MTKI) nia planu atu ba pastisipa Expo-Dubai fulan Juñu tinan 2020 sei kasela tanbá infra estrutura basiku iha Timor seidauk resolve. Direktor ezekutivu FONGTIL Daniel Santos Do Carmo hateten katak ba Expo-Dubai ne’e maneira ida atu gasta de’it. Tanbá TL la iha produru ida atu lori ba apresenta hodi dada Turista sira.

“Ba Expo-Dubai, atu lori saida ba apresenta iha ne’ebá, ita lori saida ba hatudu, ita lori saida ba kompete, ne’e maneira ida atu gasta osan de’it,” dehan Direktor ezekutivu FONGTIL, Daniel Santos Do Carmo, ba jornalista iha edifiusiu FONGTIL, Kaikoli, Kinta-Feira (21/11/2019)

Tuir Diretor ezekutivu Daniel Santos Do Carmo hateten Expo ne’e atu lori TL nia produtu rai laran no turizmu ba hatudu hodi atrai ema Maibé hare fila-fali iha Timor Turizmu de’it la dezenvolve, tanbásá gasta osan ba Expone’ebe la lori rejultadu diak ba iha pais ne’e. “Tau osan iha ne’eba 200 milloens, ba Dubai nian ne’e iha 2020, ba fa’an saida iha ne’eba, produtu saida mak iha rai laran atu ba fa’an iha ne’ebá, atu ba dansa de’it ba hatudu de’it tais tan ida ne’e mak atu gasta de’it 200 milloesn,”kestiona nia.

Daniel husu Miniterio Turízmu Komérsiu Industríál (MTKI), se hakarak ba hola anin iha Dubai karik hatete lolos ba públiku. labele hatudu ba públiku katak, ba Dubai atu prome Timor nia naran. “Ba Dubai hakarak ba pasiar ba hare’e Dubai, se hakarak ba pasiar entaun hatete lolo ba povu, labele dehan ami ba Expo-Dubai hodi promove Timor nia naran,” deklara nia

ONG FONGTIL hamutk ho sosiedade la aseita ho plano ministerio Turizmu Komersiál atu Expo-Dubai. Tanbá la iha produtu ida bele atu ba hatudu iha hodi apresenta atu dada ema nia imtensaun mai Timor. Maibé signifika katak, MTKI hakarak ba hola anin iha Dubai. Tanbá iha setor esdukasaun, saude, agrikultura, infraestrutura iha ita nia rai de’it seidauk resolve nu’usá tenke gasta osan 200 milloens ba Dubai, laiha rezultadu. (BT)