DÍLI----Órsamentu Jerál Estadu (OJE) ba tinan 2020 tau ba iha setor sosiál no ekonómiku hamutuk porsentu 19, no sira seluk aloka gastu rekolente ba iha gastu administrativus makina estadu-nia.

Tuir Diretor Lão Hamutuk, Celestino Gusmão, hatete katak, totál órsamentu 2020 nian 19% de’it mak ba iha setores sosiais no setores ekonomiku sira, restu ne’e ba gastu rekorente iha gastos administrativus makina estadu sira maibe hare ba iha orsamentu tinan ida ne’e boot tebes halo komparasaun ho tinan antes.

Husi orsamentu tinan 2020 sei prejudika fundu petroliferu iha futuru tanba osan tinan 2020 boot liu halo komparasaun ho Órsamentu Jerál Estadu (OJE) antes. ‘’Totál órsamentu 2020 nian 19% de’it mak ba iha seitor sosiál no seitor ekonomiku sira, restu ne’e ba gastu rekorente iha gastos administrativus makina estadu sira,’’ dehan Diretor Lão Hamutuk Celestino Gusmão ba jornalista sira iha FONGTIL Kaikoli, bainhira fahe informasaun ba Sosiedade sivil no Media sira kona-ba Órsamentu Jerál Estadu (OJE) 2020, Kinta-Feira (21/11/2019).

Nia dehan sira fahe informasaun ba publiku tanba antes ne’e Lao Hamutuk ho FONTIL aprezenta ona problema balun ba iha Parlamentu Nasional liu-liu iha Komisaun C iha loron 30 fulan Outubru. Nia relata, preokupasaun primeiru kona-ba montante osan ne’ebé atu uza iha ano fiskal 2020 nian billaun $1.9 ne’ebé governu apresenta ba iha parlamentu atu deskuti atu bele halo aprovasaun atu bele gasta iha ano fiskal 2020 nian.

‘‘Montante ida ne’e prezudika fundu petroliferu, tanbá parte husi órsamentu jerál ida ne’e sei levanta husi fundu ptroliferu ne’e iha buat rua ne’ebé husi fundu petroliferus, ida rendimentu sustentavel estimadu ita hotu hatene, ida seluk kona-ba eksede levantamentu besik dala tolu liu husi RSI,’’ dehan nia

Nia afirma, iha RSE anos fiskál ba 2020 nian maismenus iha $500 miliaun, depois hare ba iha levantamentu liu RSE ne’e iha $900 miliaun ne’e hatudu katak $1.4 ne’e mai hotu husi fundu petroliferu, ida $200 miliaun husi dezoru estadu nian ne’e osan ne’ebé transfere husi fundu petroliferu ba órsamentu Jerál estadu 2019 nian, ne’ebé uza rai hela iha tezouru estadu, ne’ebé tinan oin ne’e sira hakarak inklui osan ida ne’e

Nia haktuir, osan ida ne’e hotu mai husi fundu petroliferu, ida seluk kona-ba imprestimus ba tinan ida ne’e kontribuisaun ba órsamentu Jerál estadu ne’e tokon $73 ne’e akordu sira asina tiha ona. ‘’Akordu foun ne’ebé ami ohin deskute iha ne’e brifin ba media nomós ba sosiedade sivil, akordu foun ne’ebé governu planea atu asina iha 2020 ne’e tokon $750, preokupasaun seluk ne’ebé ami apresenta ba iha parlamentu nasionál kona-ba setores sosial no ekonómia ne’ebé durante ne’e ami preokupa no sosiedade tomak reklama,’’ dehan Celestino. (BT)