DÍLI----Hafoin simu posse, Prezidente Autoridade, Rejiaun Administrativa Espesiál Oe-Cusse Ambeno RAEOA- ZEESM José Luis Guterres “Lugu” promete sei kontinua servisu no rezolve nesesidade bázika ba povu Atoni Oe-Cusse.

Tuir prezidente RAEOA Foun José Luís Guterres “LUGU” hateten Bazeia ba ohin hetan ona pose hosi fatin ida ne’e, hanesan prezidente Foun RAEOA sauda ba Primeiru Ministru (PM) Taur Matan Ruak nomos ba Governu ba konfiansa ne’ebé mak hosi VIII Governu Konstituisional (Lideransa da AMP) fo mai ha’u (José Luís Guterres) atu servi Nasaun no servi povu iha Oe-Cusse nu’udar Prezidente Autoridade, Rejiaun Administrativa Espesiál Oekusi-Ambeno no Zona Espesiál Ekonomia Sosiál Merkadu (RAEOA-ZEESM), tanba ne’e hanesan PA-RAEOA foun, promesa katak sei kontinua servisu no obra Dezenvolvimentu ne’ebé mak hosik hela hosi Prezidente sesante Marí Alkatiri no sei resolve nesesidade bazika Atoni Ambeno nian iha mandate tinan lima nia laran.

Tanba ne’e iha nia Diskursu toma de posse Prezidente Autoridade Foun hateten importante liuba nasaun no kontinua povu Oe-Cusse atu kontinua dezenvolvimentu ne’ebé hahú ona inklui dezenvolvimentu rural familia iha Oe-Cusse ne’eba. “ha’u hatene dezafius barak tebes no iha problemas ne’ebé iha, ami mos rekuinese servisu ne’ebé halo ona hosi Prezidente sesante Marí Alkateri ho nia ekipa tomak tan ne’e ita sei kontinua serbisu no resolve nesesidade bazika hanesan bee no sanementu, saude, habitasaun, no rede eskolar” hateten PA-RAEOA foun, iha nia diskursu hafoin simu posse iha Palasiu do Governu Kuarta-Feira (13/11/2019).

Alende necesidade seluk mak hanesan énfaze ne’ebé ita presiza hala’o ba produsaun agro-pekuária no peskas atu povu bele hetan benefisiu emediata no bele dezenvolve industria tanba ne’e kria kondisaun ba turizmu no servisu sira seluk ne’ebé povu presiza ohin loron. Nune’e, iha biban ne‘e mos, nia Agradese ba parte hotu ne’ebé fo biban nia hodi lidera RAEOA-ZEEMS. “Agradese ba Primeiru-Ministru no Governu nia konfiansa ne’ebé VIII Governu no lideransa hosi Aliansa Mudansa ba Progressu (AMP) fo mai ha’u ata, atu serbi nasaun no povu iha Oe-Cusse,”sublina nia.

Tan ne’e, Lugu rekuinese dezafius no problema barak tebes iha Oe-Cusse nia mos halo sei komunikasaun ho Prezidente Sesante ho nia ekipa. “Ami sei kontinua halo komunikasaun ho ita bo’ot (Prezidente Autoridade Sesante) no Administrasaun Sesante tanba ita presiza resolve buat balun hamutuk ho Governu Sentral hanesan Ró Haksolok ne’ebé ohin loron iha hela rai Portugal,”dehan nia. Nia dehan, sei hamutuk ho Governu Sentral hodi konferensia kona-ba investimentu ba rai Oe-Cusse, tanba konsidera investimentu hosi rai laran no liur maka bele kria empregu no rendimentu ba rai laran.

Tanba ne’e nia kontinua hateten, Dezenvolvimentu presiza transparénsia nomos presiza partisipasaun hosi povu tomak. “Ha’u atu dehan deit katak, ha’u-nia estrutura eleitu hosi suku nian bele iha reniaun dala rua iha tinan-ida nia laran atu bele rona hanoin hosi autoridade suku tanba ita hakarak atu dezenvolve ne’ebé ho diak iha rai Oe-Cusse,” katak nia. Nia afirma tan, Presiza kria ambiente politku social ida ne’ebé estavel tanba bele ajuda investimentu rai seluk nomos nasionál. Iha parte seluk, Primeiru Ministru (PM) Taur Matan Ruak iha nia Diskursu Haktuir, nia parte sente Orgullu tebes bele fo posse ba Prezidente RAEOA Foun.

“Uluk ha’u sai Prezidente Republika, ha’u fó posse ba Maun bo’ot Marí Alkatiri ne’ebé hanesan konseitór ba kriasaun RAEOA-ZEEMS iha tempu ne’ebá”. tenik xefe VIII Governu ne’e. Tanba tuir PM, Oe-Cusse hanesan projetu nasionál ne’ebé la’o maka’as ona, hahú hosi Kriasaun to’o ohin loron, maski sei iha buat balun presiza halo. “Sira ne’ebé ita halo ona, pessoalmente agradese Prezidente Interinu no ekipa tomak, especial ba Maun bo’ot Marí Alkatiri ba ita bo’ot sira nia esforsu ne’ebé halo dezenvolvimentu Oe-Cusse la’o to’o ohin loron,” nia Akresenta.

Nia Informa, Ekipa foun ne’ebé agora atu ba kaer ukun iha RAEOA sei la halo buat foun, maibe hatutan deit buat ne’ebé halo ona. “Ita nia mehi maka oinsa povu Oe-Cusse oan sira bele benefisia dezenvolvimentu ne’ebé ita halo ona iha ne’eba,” katak nia. Aktual PM Taur mos promete, Governu sentral nakloke iha kualker altura banhira Prezidente Autoridade ho nia ekipa presiza tulun durante hafoin tranzisaun.

“Ami pronto no kontinua ajuda ita bo’ot no fo tulun buat ne’ebé ami bele, atu nune’e atividade iha Oe-Cusse labele para no labele reduz ninia ritmu,” Informa PM. Antes ne’e Marí Alkatiri remata ninia mandatu nu’udar Prezidente Autoridade RAEOA. Iha loron 30 fulan-Jullu 2019 no kontinua hosi Prezidente Interinu Arsenio Paixão durante loron 120, depois iha loron 6 fulan Novembru proposta rezolusaun hosi Governu ne’ebé aprezenta hosi Xefe Governu no hetan aprovasaun liu hosi reuniaun Konsellu Ministru. (BT)