DĺLI----Institutu Nasionál Dezenvolvimentu Mão De Obra (INDMO) kontinua prepara abilidade ba joven iha area Tékniku Vokasionál hodi kompete iha kampu servisu iha nasionál no internasionál.

Tuir jerente Institutu Nasionál Dezenvolvimentu Mão De Obra Jerente Isabel Fernandes De Lima hateten INDMO estabelese iha tinan 2008 ho hetan ona progresu balun ne’ebé mak pozitivu liu husi instalasaun sira iha territóriu laran, ne’ebé mak hetan ona akreditasaun hodi fó formasaun ba joven sira iha area tékniku vokasionál hodi bele kompete iha kampu servisu nasionál no mós iha internasionál.

‘Hakarak atu avalia ba progresu hotu ne’ebé mak durante nee INDMO alkansa ona, ohin loron hakarak atu realiza konferénsia internasionál ida hodi konvida orador internasionál sira hodi bele mai fahe esperiénsia kona-ba progresu saida mak sira hetan iha sira nia nasaun, kona-ba preparasaun ba joven sira hodi kompete iha merkadu internasionál’’, Dehan Diretora Institutu Dezenvolvimentu Mão De Obra Isabel Fernandes De Lima ba Media Business Timor iha Otel Novo Turizmo, Sexta-Feira (15/11/2019).

Nia afirma katak atu hasa’e kualidade formasaun ba instituisaun informál ba tékniku vokasionál mak presiza regula insitasaun hirak nee liu husi esperiénsia ne’ebé mak ajénsia internasionál hanesan International Labor Organization ILO sei fahe esperiénsia INDO hodi hadi’a ba sistema sira ne’ebé presiza.

Nia mos dehan katak presiza regula mós eskola tékniku professional sira tanba ligadu ba lei de traballu hodi utiliza atu bele fó benefísiu ba prosesu formasaun ne’ebé mak di’ak atu forma joven sira sai traballadór ida ke’e professional tuir nia abilidade ne’ebé mak iha.

‘’Oras nee Timor-Leste hasoru problema menus kampu de traballu tan nee INDMO iha responsabilidade boot atu oinsá bele koopera ho instituisaun sira hodi prepara formasaun ida di’ak ba joven sira iha area tékniku vokasionál atu sira bele hetan abilidade hodi kria servisu ba sira nia aan rasik la presiza atu tenke ba servisu iha rai liur.

Presiza duni atu tau atensaun másimu ba kapasitasaun joven sira iha area tékniku vokasionál tanba joven barak mak seidauk iha abilidade atu bele kompete iha kampu de traballu.’’ Dehan Diretora Isabel. Ministru Asuntu Deformasaun Lejizlasaun Parlamentár Fideliz Leite Magalhães hateten katak Parte Governu sempre fó apoiu tomak ba instituisaun públiku sira atu bele forma joven sira ho rigorozu atu bele hasa’e sira nia talentu hodi kompete iha merkadu.

Nia subliña tan katak oras nee governu Timor-Leste implementa hela polítika ba kapasitasaun eskola informal hodi prepara joven sira iha tékniku vokasionál tanba bele apoiu kresimentu ekonomia ba país ida nee. ‘’64 porsentu husi komunidade Timor Laran tomak husi idade 30 anos ba kraik seidauk iha abilidade di’ak tan nee presiza hetan formasaun ida ne’ebé di’ak.

Dala barak instituisaun sira sempre fó formasaun ba ema sira ne’ebé mak merkadu ladún presiza sira, maibé liu husi konferénsia ida nee presiza atu fó formasaun hodi hasa’e rekursu ba pontu importante rua mak hanesan fornesimentu abilidade ba merkadu no mós demanda ba nesesidade iha merkadu.’’ Dehan Ministru Asuntu Deformasaun Lejizlasaun Parlamentár Fideliz Leite Magalhães ba Jornalista sira iha Otel Novo Turizmu, Sexta-Feira (15/11/2019).

Husu ba instituisaun ne’ebé fó formasaun ba joven atu akredita ba joven sira ne’ebé mak merese duni atu hetan liu husi abilidade ne’ebé mak iha, atu nune’e bele kompete iha merkadu nasionál no mós internasionál hodi kontribui ba kresimentu ekonomia iha Timor-Leste. (BT)