DÍLI----Governu Timor-Leste liu husi Sekretariu Estadu Formasaun Profisional no Empregu (SEFOPE) planu sei harii Sentru Formasaun ida ho Estandar Kualifikadu diak liu iha nasaun sira iha ASEAN.

Objetivu husi harii Sentru Formasaun ne’e oinsá bele akumula Juventudi Timor-Leste bele tuir formasaun ne’ebé profisional hodi prepara ba kampu servisu iha rai laran no rai liur.

Sekretariu Estadu Formasaun Profisional Empregu (SEFOPE) Julião da Silva hateten katak bazea ba politika refere oras ne’e dadaun SEFOPE preve ona orsamentu hamutuk millaun $15 ba iha Komisaun Revisaun Orsamentu nomos aprezenta ona planu refere ba iha Komisaun Fundu Infranstrutura atu bele haree politika refere.

“Saida mak agora ita halo primeiru saida mak ita boot sira akompana katak foin lalais iha revisaun orsamental, ita aprezenta ona ba komisaun fundu infrasntrutura SEPFOPE husu Orsamentu mais memus Millaun $15 atu establese sentru formasaun ida ne’ebé kualifikasoens diak iha Asia, objetivu husi sentru ne’e atu akumula ita nia joven sira mais 5 mill joven atu tuir formasaun,” dehan sekretariu Estadu Formasaun Profisional no Empregu (SEFOPE) Julião da Silva ba Jornalista sira iha Sentru Convensaun foin lalais ne’e.

Nia esplika katak politika governu harii Sentru formasaun refere oinsá bele ajuda joventude sira bele tuir formasaun iha area tematiku sira ne’ebé mak iha nune’e prepara rekursu Mao de Obra hodi kompete iha kampu servisu iha rai laran nomos iha rai liur.

“Planu harii centru refere la’ós deit atu servisu iha area ida deit hanesan Mina no Gas maibe ba iha programa auto de empregu sira seluk hanesan Hotelaria, Restorante, Mekaniku nomos buat sira seluk tan,” katak nian.

Nia afirma katak Sentru refere planu sei harii iha tinan 2020 maibe to’o ohin loron la taka dalan ba SEFOPE hodi fo formasaun ba joven sira iha area ne’ebé importante sira hanesan Mina no Gas tanba oras ne’e dadaun SEFOPE hahú fo formasaun ba joventude hamutuk nain 30 iha Munisipiu Viqueque liu-liu parte Beacu iha area Mina No Gas.

Formasaun ida ne’e nudar dalan ida hodi prepara joven sira hodi kompete iha kampu servisu iha projetu Tasi Mane ninian. “Enfelismente iha tinan ida ne’e ita hahú fo formasaun ba ita nia joven sira 30 resin ne’ebé husi munisipiu viqueque parte Beacu ninian hodi tuir formasaun iha Mina no Gas ninian, la’ós ne’e deit maibe hahú kedas husi IV governu konstitusional tesik mai ita hahú fo formasaun ba ita nia joven sira lubuk ida iha centru Tibar nomos Sentru Formasaun Senai Becora oinsá bele servisu iha Mina no Gas,” katak nia.

La’ós ne’e deit maibe SEFOPE Mos kontinua hasae kuinesimentu Joventude sira nian iha area oin-oin hanesan Area Eletrisidade, Kanalizasaun nomos soldadura. Maske formasaun hira ne’e SEFOPE Fornese ona ba joven lubuk ida ohin loron sirkula iha rai laran maibe SEFOPE kontinua esforsu oinsá bele forma joven sira iha kualifikasaun Standar Kopitu nudar standar ida hodi lori joven sira kompete iha kampu servisu rai laran nomos mundial.

“Agora iha buat ida ne’ebé ita presiza haree mak kualifikasaun standar kopitu nudar standar ba iha Mina no gas ninian hodi bele utilize ita nia joven sira ne’ebé kualifikadu iha mao de obra sira nian, Standar ida ne’e la’ós deit apply iha Timor Deit maibe bele apply ba iha mundu tomak no formasaun ida ne’e ita hahú ona iha centru Tibar,” katak nia.

Nia mos informa katak SEFOPE Mos esforsu oinsá bele kria formasaun ida ne’ebé interligadu nomos akompanamentu ba joven sira nune’e bainhira remata formasaun labele kontinua dezempru maibe tenke hetan servisu nune’e kompete iha Merkadu Rai laran nomos rai liur.

Iha fatin seluk Prezidente Camara Comersiu Industria Timor Leste (CCI-TL) Oscar Lima hateten katak Timor-Leste presiza tebes prepara rekursu umanu liu-liu servisu Mao de Obra hodi kompete iha Merkadu Traballu tanba Timor-Leste sei hasoru ondas boot iha kompitisaun kampu servisu iha rai Laran.

“Ita Timor-Leste presiza tebes fo formasaun ba ita nia Joventude sira iha area mao De Obra tanba Timor-Leste sei hasoru ondas boot ida tanba ne’e ita espera ida ne’e governu tenke tau atensaun,” hateten Prezidente CCI-TL Oscar Lima ba BT Iha nia knar fatin, Comoro Foin lalais ne’e. Nia dehan ho problema refere CCI-TL konsege hasoru malu ona ho SEFOPE hodi hato’o rekomendasaun refere oinsá bele tau atensaun.

“Ita konsege hasoru malu ho SEkretariu Estadu Formasaun Profisional no Empregu (SEFOPE) senhor Julião da Silva no ita apresia tebes ho politika ne’ebé mak iha no ita louva tebes ninia servisu,” katak Oscar Lima. Nia mos afirma katak rajaun fundamental governu presiza atu ajuda hodi forma joven sira atu nune’e bainhira Timor-Leste adere ba Organizasaun ASEAN Timor-Leste labele sai bainaka iha nia rai nomos tenke kompete mos kampu servisu iha nasaun seluk mos. (BT)