DÍLI----Ministériu Koordenadór Asuntu Ekonómiku (MKAE) Interinu Fidelis Manuel Leite Mangalhães foin lalais ne’e konvoka reuniaun Interministeriál hodi ko’alia kona-ba Dezenvolvimentu iha Área Turizmu nian iha Timor-Leste.

Enkontru komité Interministeriál ne’e lidera husi MAKE Interinu Fidelis Manuel Leite Mangalhães ne’ebe ho partisipante sira mai husi Ministériu Obras Públiku (MOP), Sekretáriu Estadu Komunikasaun Sosiál (SEKOMS), Sekretáriu Estadu Ambiente (SEA), Sekretáriu Estadu Arte no Kultura (SEAK), no Reprezentante husi Ministériu Defesa no Seguransa (MDS) Ministériu Transporte no Komunikasaun (MTK) Ministériu Finansas (MF), no Parseiru Internasionál sira husi Bancu Aziátiku Dezenvolvimentu (ADB) no Asesór Prinsipál husi Ministériu Turismu Komérsiu no Industria (MTKI).

Tuir Minisériu Koordenadór Asuntu Ekonómiku (MKAE) Fidelis Manuel Leite Mangalães afirma enkontru ida ne’e hanesan enkotru da uluk ba komité Interministeriál sira hodi kualia konaba dezenvolvimentu iha Area Turismu iha Timor-Leste.

“Enkontru ida ohin ne’e marka historia foun ida, tamba foin mak primeira ves ba komite Inteministerial ba Setor importante ne’ebe mak hanesan Turismu, foin mak hala’o iha Timor-Leste,” dehan Ministru Koordenadór Asuntu Ekonómiku Interinu Fidelis Manuel Leite Mangalhães nia Diskursu ba iha Salaun CCD Merkadu Lama, Kinta-Feira (24/10/2019).

Governante ne’e haktuir enkontru ida ne’e importante tebes, tamba husi VIII Governu nia komprimísiu atu diversifika ba ekonómia hodi dezenvolve kampu servisu ba timor oan sira. “Ida ne’e hanesan enkontru inaugural ne’ebe Marka Historia no ida ne’e mos indikadór importante ida ba VIII Governu nia dezenpeñu, no ninia komprimísiu atu diversifika ekonómia atu dezenvolve kria kampu servisu,” dehan nia

Fidelis haforsa VIII Governu nia komprimísiu no ambisiona atu atinje ba nasaun nia rendimentu mediu altu iha tinan 2030, ita presiza 7% kresimentu annual, ne’ebe mak infrenta situasaun ida iha ita nia nasaun sei depende barak liu iha área Setór Mina Rai. Governante ne’e esplika VIII Governu ninia politika la nega ba kontribuisaun pilar importante iha ekonómia mak Mina Rai, maibe ita aproveita kondisaun ne’ebe Setór fo atu bele hala’o nafatin dezenvolve ba Setór sira seluk.

Ministru Interinu MKAE mos husu Ministériu relevante sira atu delega DJ no reprezentante téknika sira, atu tuir enkontru periodiku iha tempu oin mai, no husu mos DJ sira ne’ebe mak hatene ekonómia atu bele diskusaun ne’ebe mak klean no propoin. Tamba ida ne’e ita tenki iha duni mekanismu koordenasaun ida dezenvolvimentu turismu iha Timor-Leste. Ne’ebe mak durante tinan hirak nia laran seidauk sai prioridade ba númeru 1, tamba prioridade importante liu atu dezenvolve turismu tenki iha infraestrutura sira.

Fidelis dehan tenki hadia uluk infraestrutura sira ne’e bainhira infraestrutura prontu, hafoin dezenvlove fali turismu, tamba ita dezenvolve Sítiu Turismu ida ne’ebe tenki iha asesu Estrada Eletrisidade no Bee Moos. Ministru Fidelis ne’e mos rekomenda ba Liñas Ministeriais sira haree didiak Governu nia politika turismu nian, ne’ebe mak hasai iha tinan 2017, atu haree fali politika ida ne’e enkontru tuir mai hare no reflesaun ruma.

Iha parte sorin Ministériu Obras Públika (MOP) Salvadór Eugénio dos Reis Pires relata disponivel atu kolabora no presiza liu mak identifikasaun iha area turismu nian, ita presiza atu dezenvolve, atu nune’e MOP bele tau iha planu dezenvolvimentu ba Estrada, Eletrisidade no Bee Moos. MOP presiza koordena ho liñas Ministeriais sira ba dadus ne’ebe mak bele fo MOP, atu bele estabelese iha planu asaun iha proposta Orsamentu Jerál Estadu kada tinan bele inklina iha planu asaun. (BT)