DÍLI----Relasiona ho planu Involvimentu Timor-Leste ba iha Organizasaun Association of Southeast Asian Nations (ASEAN) hetan apoiu másimu hodi lori Timor-Leste hola parte iha Organizasaun ne’e hamutuk ho membru husi nasaun 10 seluk mak hanesan Brunei Darussalam, Cambodia, Indonesia, Laos, Malaysia, Myanmar, Philippines, Singapore, Thailand, no Vietnam.

Durante ne’e Lider Politiku sira esforsu maka’as oinsá bele lori Timor-Leste bele hola parte iha organizasaun refere maibe iha Timor-Leste sei mosu pro no kontra ho rajaun oin-oin mak hanesan haree husi politikamente Timor-Leste bele ona sai membru maibe haree ba iha Ekonomia Timor-Leste seidauk tanba laiha forsa atu bele kompete ho nasaun sira ne’ebé mak kleur ona dezenvolvidu kompara ho pais TL ne’ebé sei iha faze dezenvolve. Tan ne’e hare ba distinu Timor-Leste nian hakarak ka lakohi, sedu ka tarde tenke hola parte mos tanba ohin loron nasaun 10 ne’ebé sai membru ona iha Organizasaun ASEAN durante ne’e apoiu másimu Tebes oinsá lori TL hamutuk iha mahun refere. 

Ministru Koordenador Asuntu Ekonomia (MKAE) Fidelis Magalhães Leite hateten katak iha Organizasaun ASEAN iha Dokumentu ida fase importante tebes mak naran ASEAN Economy Community (AEC) ka Komunidade Ekonomia ASEAN ne’ebé ijiji pais sira hotu tenke tuir tanba AEC ingradu ne’ebé diak tebes iha Regional. Tan ne’e hakarak ka lakohi Timor-Leste tenke involve sai organizasaun refere tanba antes ne’e iha nasaun balun nia ekonomia at liu Timor-Leste konsege hola parte ikus mai hetan rejultadu ne’ebé diak tebes. 

“Ita labele duvida ida ne’e tanba kompara ho nasaun sira seluk ne’ebé tama ASEAN hanesan Vietnam, Laos sira nia ekonomia uluk at liu ita nian, maibe ita ne’e iha ekonomia ida ne’ebé nakloke tiha ona no ekonomia ida ne’ebé integradu tiha ona iha rejiaun, ita mos iha ema movel ba mai, ne’ebé laiha rajaun ida dehan ekonomikamente ita seidauk bele,” dehan Ministru Kordenador Asuntu Ekonomia (MKAE) interinu Fidelis Magalhães ba BT iha Parlamentu Nasional Tersa-Feira (24/09).

Nia dehan durante ne’e motivu atu lakohi Timor-Leste tama iha ASEAN ne’e la’ós ekonomia maibe iha motivu seluk. Hatán kona-ba problema ne’ebé setór privadu hasoru no seidauk prontu atu tama Ministru Fidelis hatan katak se wainhira Timor-Leste kontinua tau problema hodi hatauk pozisaun Timor-Leste hodi adere mak difisil tebes atu iha mudansa iha ekonomia. 

“Se problema laiha ona mak tama ne’e bainhira mak bele tama, Buat ne’e hanesan ne’e wainhira ita atu tama ba iha organizasaun ASEAN ne’e nudár oportunidade ida atu hadia ita nia an tan ne’e mak ita nia objetivu klaru, sasukat klaru hodi prepara ita nia an wainhira ita tama,” katak nian. Nia dehan maske ohin loron setór privadu prekupa kona-ba fosa atu kompete iha ASEAN maibe haree realidade ne’ebé iha maske Timor-Leste seidauk hola parte iha ASEAN ekonomia nakloke ona no setór privadu atualmente infrenta hela problema refere ohin loron.

“Hanesan hau dehan ona ita nia ekonomia nakloke antes ona ne’ebé setór privadu iha Timor atualmente mós infrenta hela kompetisaun ona tan ne’e wainhira ita loke ba iha ASEAN ne’e la’ós ita atu lakon maibe ita loke ba ASEAN ne’e signifika katak ita nia setór privadu mós sei asesu ba iha merkadu sira seluk hanesan Indonesia, Singapura, Thailandia, ne’ebé la’ós satu arah deit maibe ida ne’e 2 arah tanba ita mós hetan vantajen no dez vantage mós iha pontu balun maibe ita mos sei asesu ba merkadu ema nian,” katak nia.

Nia mós informa katak ohin loron governu mós esforsu oinsá bele haree setór balun ne’ebé iha ligadu ba iha lista negativu liu-liu iha materia sira ne’ebé mak involve asuntu estratejia ruma hanesan Defeza Nasionál, Siguransa Nasion’al, Saúde Públika maibe kona ba ekonomia iha mundu ohin loron nasaun ida labele taka nia an iha ekonomia wainhira taka ekonomia ba ema estranjeiru atu investe tenke ha motivu seluk. “La bele dehan ami hakarak taka no taka deit maibe tenke iha motivu ruma, ne’ebé motivu ne’e ohin hau dehan iha lista negativa ne’ebé TradeInvest prepara hela no MKAE sei halo apresiasaun hafoin aprova maibe rajaun ne’e mak tenke profunda didi’ak,” informa nia. 

Alende ne’e iha fatin seluk Prezidente Kamara Komersiu Indústria Timor-Leste (CCI-TL sigla Portugés), Oscar Lima hateten katak Adezaun Timor-Leste ba ASEAN antes ne’e la konkorda atu TL adere maibe konsege iha esplikasaun klean husi Ministeriu Negosiu Estranjeiru no Kooperasaun, Sekretariu Timor-Leste ba Asuntu ASEAN nomós Diretor Asuntu ASEAN no haree ba politikamente Timor-Leste tenke tama ba ASEAN maibe ekonomikamente difisil tebes atu kompete.

“Ba hau nudár ema ida ne’ebé lidera setór privadu nasional hau husu mak ne’e deit, ita bele tama ba ASEAN maibe TL presiza prepara setór privadu nasional atu bele iha kompetisaun ne’ebé mak mai tanba ida ne’e nakloke ba ema husi nasaun sira ne’ebé mak dezenvolve ona,” katak Oscar Lima iha nia knar fatin Comoro Kuarta-Feira (24/09).

Nia dehan governu presiza prepara setór privadu nasional hanesan kapasita koñesimentu, apoiu Finanseiru ho jurus kreditu ne’ebé kiik hodi nune’e setór privadu rai laran bele dezenvolve hodi kompete ho membru sira iha ASEAN. “Se governu la haree buat sira ne’e hotu, hau hanoin susar no todan tanba ami laiha kapasidade infrenta dezafisu ida ne’e, hau bele hatete emprezariu boot ida mai husi rai liu, ami ema nain 10 ne’ebé imi hili ami nain 10 boot liu iha Timor ne’e hamutuk ida mós ami araska no ida ne’e la’ós buat kaman tanba ema nia empreza balun ko’alia ona triliun dollar no ko’alia ona ba Billoens dollar no ida ne’e la’ós buat ne’ebé fasil,” katak nia.

Tanba ne’e emprezariu nasaional ne’e husu ba Governu Timor-Leste labele ko’alia deit maibe tenke iha asaun hodi prepara setór privadu rai laran nune’e, Timor-Leste wainhira tama labele terus. Nia mós afirma katak ohin loron iha area Hotelaria empreza rai la laran iha nain rua ka tolu mak bele kompete, iha area kontruksaun iha empreza 1 ka rua maibe barak mak halo investimentu maibe ho kapital ne’ebé menimu tebes tanba ne’e presiza hetan apoiu makas husi governu no estadu.

“Bainhira Timor-Leste la prepara jurus ne’ebé kiik atu ema halo investimentu no Timor-Leste lakonsege kompete ho ASEAN tanba agora deit sasan ne’ebé ita konsumu mai hotu husi liur no Timor-Leste seidauk iha atu soe fali ba liur, tanba ita tama iha ASEAN ita tenke iha indústria atu fakar fali ba liur,”  Alende ne’e nia husu mós ba governu atu labele depedensia ba mão de obra husi setór privadu deit maibe presiza mós dezenvolve timoroan sira iha mao de obra hodi nune’e wainhira TL involve Timoroan labele infrenta iha kompitisaun kampu servisu.

Ohin loron liu husi CCI-TL kontinua enkoraja setór privadu rai laran oinsá bele unidade hodi infrenta problema ne’ebé mak iha. “Ami kontinua konsola malu oinsá setór privadu Timoroan unidus tanba bainhira laiha Unidus mak laiha forsa atu infrenta atividade ne’ebé ema lori husi liur mai, Se bainhira setór privadu Timoroan ne’ebé hanoin nia hakarak riku mesak deit ne’e hau bele hateten egoismu tan ne’e ita tenke hamutuk nafatin, tenke fo lima ba malu nafatin hodi infrenta problema ne’ebé sei mai,” katak nia.

Nune’e mos nia informa katak kona-ba lista negative ohin loron governu prepara ona maibe seidauk iha konkordansia hamutuk oinsá proteje setór balun ne’ebé tenke husik ba timoraon sira mak iha direitu investe. “Kona-ba Lista Negativu ami hasoru malu dala hira ona ho TradeInvest no Lista ne’e ami aprezenta ona maibe seidauk konkorda hamutuk entre setór privadu ho Governu tanba sei lori ba governu hare lai hafoin bele deside hamutuk,” informa nia.

Nune’e mos iha biban seluk Dosente Fakuldade Siensia no Politika iha Universidade Nasional Timor-Leste (UNTL) Julio Aparicio hatete katak adesaun Timor leste ba ASEAN sei iha vantage no des vamtage, vantage mak Empreza estranjeiru sei lori nia kapital investe iha Timor-Leste hodi kontribui ba dezenvolvimentu pais ninian maibe nia des vantage mak numeru dezempregu sei aumenta iha rai laran. 

Rajuan Numeru dezempregu sei aumenta tanba ohin loron joven no estudante barak mak laiha kuinesimentu iha lian Ingles tanba lian Inglesh nudár dalen ida ne’ebé uza iha Servisu nian maibe ohin loron menus tebes. “Estudante no joven barak mak la hetene lian inglesh, no agora oinsá ita atu kompete ho sira, atu kompete ho ema estranjeiru sira ne’e difisil oitoan, no hanesan politikamente ida hanesan maneira halo relasaun ho diak ho nasaun sira seluk, kuandu hakarak atu tama lalais ne’e lakon tanba juventude agora ne’e dezempregu barak, Governu presiza hare didiak,” katak nia.

Tan ne’e nia husu ba governu katak Governu labele indika povu sira kapasidade, povu nia koñesimentu, povu nia ekonomia, tan deit hakarak atu tama lalais ba iha ASEAN maibe presiza hare ba povu nia konsidaun moris ohin loron. “Labele tan deit buka naran maibe tenke hare povu nia kondisaun selae povu ne’e ema duni hotu ba moris iha foho, ba moris ida mukit nian no Timor mak sei sai fali bainaka iha ita rai ne’e rasik ezize tama lalais ba ASEAN la menui kriteriu ida,” katka nian. (BT)