DÍLI----Kompañia Telekomunikasaun CESLINK sei publika rezultadu rekrutamentu funsionáriu ne’eb’e pasa iha selesaun atu servisu iha tempu besik no sei tau prioridade ba traballadór timoroan sira.

CESLINK prioritiza Timoroan atu bele servisu iha area telekomunikasaun no sei la fó oportunidade ba traballadór estranjeiru tanba ne’e mak oras ne’e prosesu rekrutamentu hala’o ho kuidadu tebes. Jerente Marketing Monis Maia hatete, oras nee prosesu rekrutamentu ba kandidatu sira hodi servisu iha kompañia CESLINK hahú remata ona, iha tempu badak sei publika sai atu kandidatu sira bele preparadu hakat ba faze ezame eskrita no entrevista nian.

Atu bele hare nia kle’an liutan ba kandidatu sira nia koñesimentu tuir ida-ida nia area mak CESLINK hodi rekruta funsionáriu foun sai fatór fundamental ida atu bele realiza lansamentu iha nivel sentrál ne’ebé tuir planu sei hala’o iha fulan Novembru no Dezembru 2019. “Oras ne’e daudaun CESLINK hein hela ba Kompañia Nain hodi fila hikas mai Timor iha tempu badak atu bele asina no formalmente bele publika sai naran kandidatu sira ne’ebé mak pasa ona iha faze primeiru. Dehan Jerente Marketing Monis Maia ba Jornalista Business Timor iha Edifísiu Bidau Lesidere, Tersa-Feira (24/09).

Nia informa tan katak atualmente nain husi kompañia CESLINK Sr. Mahoka sei hala’o hela viajen servisu ba estranjeiru no sei fila mai Timor iha tempu badak. Oras ne’e ekipa selesaun hetan ona kandidatu hamutuk liu atus lima liu prosesu selesaun dokumentu. Nia dehan prosesu rekratamentu atraza uitoan tanba CESLINK hakarak buka rekursu ne’ebé mak prense duni kritériu hodi prensa servisu tuir ida-ida nia departmentu. CESLINK mós hakarak tebes atu rekruta Timoroan la presiza lori traballadór husi rai liur mai tanba bele loke kampu de traballo iha ita nia rain rasik.

Oras nee CESLINK sei uza traballadór estranjeiru na’in ida hodi apoiu ba servisu tékniku maibé ba futuru bainhira Timoroan sira hetan formasaun ho bele hala’o servisu tékniku rasik no ita sei husik traballadór estranjeiru sira. CESLINK sei rekruta funsionáriu direita hamutuk pesoál atus lima 500 no ba funsionáriu indireta mak to’o rihun lima 5.000. Tan nee CESLINK sei rekruta funsionáriu 10% hodi apoiu ba operasaun iha munisípiu Dili, no seidauk bele hala’o iha Munisípiu sira hotu, dehan nia.

Mensajen Husi Jerente Marketing ba kandidatu sira hotu, oras nee husu pasiénsia ba kandidatu sira ne’ebé mak mai aplika ona vagatura iha kompañia CESLINK tanba selesaun dokumentu ida rigorozu tebes ba kandidatu liu husi rihun lima tan nee presiza tebes atu bele hare ho kuidadu. Husu ba kandidatu sira hotu la bele fuan ki’ik no pasiénsia nafatin hein tanba rezultadu ba vagatura sei taka iha tempu badak. (BT)