DÍLI----Atu Ajuda dudu kreximentu ekonomia rai laran setór privadu tenke promove dezempeñu sai pro-ativu kriativu no Inovatinu atu bele kompete iha area komérsiu no indústria. Timor-Leste tinan-tinan sempre dependente ba orsamentu jerál de estadu, no estadu sempre dependente ba orsamentu husi fundu minarai, kreximentu sustantabilidade fraku no halo setór privadu barak obrigadu tenke taka sira nia atividade negósiu tanba menus ba kriatividade no jestaun.

Reitór IOB Agusto da Conceição Soares hateten oras ne’e Timor-Leste hasoru hela problema kona-ba dezempeñu komérsiu no indústria. Emprezáriu Timoroan sempre dependente ba orsamentu jerál de estadu e pior liu tan governu mós sempre dependente ba fundu mina rai.

Atu rezolve ba problema dependente, tenke husi parte setór privadu tau prioridade ba fatór rekursu umanu atu eleva kapasidade iha area komérsiu hodi sai profisionál liu tan. Oras ne’e Timor-Leste adopta merkadu libré ida ne’e sai dezafiu boot ba emprezáriu Timoroan atu kompete iha merkadu iha rai laran tanba bainhira emprezáriu rai laran la preparadu ho di’ak atu hasa’e abilidade iha area negósiu nian.

Fator oinsá mak atu bele kompete mak tenke sai super kriativu hodi hamosu inovasaun ba produtu ruma atu nune’e hetan valor iha merkadu hodi bele fó rendimentu di’ak. nia salienta tan katak Setór privadu iha Timor-Leste oras ne’e ladún iha kapasidade atu dezenvolve aan tanba realidade hatudu katak maioria emprezáriu Timoroan hakarak de’it mak kaer projetu hodi depende ba osan estadu, maibé la hanoin atu kria serbisu rasik atu la bele depende ba osan estadu.

“Ida ne’e signifika katak ita fo vantajen di’ak ba ema estranjeiru hodi mai loke negósiu hodi hetan lukru bot tanba ita sempre ba sosa sira nia produtu, maibé ita rasik la produs produtu rai laran, dehan Reitor IOB atuál Agusto da Conceição. Parte akadémika sempre fo nafatin apoiu liu husi formasaun formal atu forma ema ida sai enprederiarismu iha futuru atu bele hetan abilidade oinsá atu bele promove iha area komérsiu e indústria nian.

Reitór ne’e mós salienta tan katak atu labele depende demais ba fundus mina rai mak governu tenke tau prioridade ba parte, Turizmu, Agrikultura, Indústria no Edukasaun tanba, ida ne’e mak sai fatór determinante atu bele kria kampu de traballu hodi bele aumenta osan ba kofre do estadu.

Durante ne’e povu Timor-Leste moris ho osan de fundu petrolíferu no estadu konsege foti ona osan hamutuk 11 biliaun dollar Amériku, no oras ne’e Timor-Leste iha hela ona husi fundu mina rai nian hamutuk 16 dollar Amerikanu. Hanoin katak iha tinan ida mina sei maran tan ne’e, oras ne’e tenke tau prioridade duni ba setór Komérsiu, negósiu no indústria atu kontribui reseita ba kofre de estadu. (BT)