DÍLI----Ohin loron politika Timor-Leste esforsu oinsa bele adere ba iha organizasaun Regional ho naran The Association of Southeast Asian Nations (ASEAN) no husi politika refere iha seitor privadu barak mak sei preokupa tanba seitor privadu seidauk bele kompete iha Ekonomia.

Maibe hare fila fali ba seitor privadu balun hateten katak wainhira Timor-Leste involve iha organizasaun refere sei lori benefisiu diak ba iha Timor-Leste liu-liu iha area negosiu nian maibe laos fasil ba atu bele kompete ho membru nasaun sira seluk.

Tuir Diretór Timor Plaza Tony Jape katak hare ba númeru populasaun iha nasaun ASEAN ne’ebé mak boot tebes hodi fahe tiha negósiu ba parte tolu, negósiu iha nivel altu, negósiu iha nivel médiu no negósiu iha nivel ki’ik no husi ida ne’e katak la fasil ba timoroan sira atu bele kompete ho nasaun sira ne’ebe kleur ona sai membru ba organizasaun refere.

“Ba parte tolu ne’e husi investor Timoroan sira mós oras nee tenke preparadu no prontu ona atu bele kompete, tanba sai membru ASEAN nu’udar Timor-Leste bele hetan oportunidade di’ak ida atu bele halo investimentu ho nasaun ASEAN nian. Sai membru ASEAN sei loke odamatan boot ba komunidade ASEAN sira atu tama mai iha Timor-Leste ida nee sai pontu ida pozitivu tebes,” dehan diretor Timor Plaza Tony Jape ba BT iha nia knar fatin, Timor Plaza, Kuarta-Feira (04/09).

Nia dehan Maski la fasil atu kompete husi setór privadu rai laran iha nivel altu tanba husi nasaun sira ne’ebé mak adere aan ona ba ASEAN iha kapasidade boot tebes hanesan parte rekursu umanu, finansiamentu, teknolojia no seluk tan maibé pelumenus TL bele hetan oportunidade balun atu bele halo investimentu ho sira.

“Ita komprende katak membru nasaun ASEAN sira iha kompañia mesak boot no ho estrutura ne’ebé mak di’ak no forte tebes iha setór orsamentu, iha koñesimentu kle’an no esperiénsia barak,” katak nian. Nia mos dehan Timor-Leste nudar nasaun ne’ebe foin hahu hodi halo selebrasaun ba-17 anus no sira ne’ebe adere to’o ona tinan 70 sai membru ASEAN ho durasaun ne’ebe kleur sai membru ASEAN iha ona esperensia, kapasidade iha kompania inklui mos iha mos kompania ne’ebe avansado tebes.

“Ita foin mak atu hahú maibé oras nee sira tama ba ona selebrasaun aniversáriu ba dala-70 hodi adere aan ba membru ASEAN. Ho durante tempu kleur sai membru ASEAN mak sira iha ona esperiénsia no kapasidade tomak iha sira nia kompañia ne’ebé mak boot sira hodi hala’o investimentu, Dehan Tony Jape.

Tony mos afirma tan katak iha setór privadu iha Timor-Leste tenke prepara aan atu bele hadi’a estrutura kompañia hodi bele identifika kategoria ba kompañia atu nune’e bele preparadu hodi kompete ho investor husi membru ASEAN nian, tanba hare ba emprezáriu Timoroan sei menus tebes koñesimentu ba area emprezáriu nian. Tan ne’e husi problema hirak ne’e presiza iha apoiu husi parte governu atu bele hetan preparasaun didi’ak entermu de kapasidade.

Tanba Atualmente hare kapasidade menus no kompara ho membru ASEAN no nia konsidera katak seitor privadu iha rai laran nia kapasidade sei atradu tebes tan ne’e governu tenke tau atensaun ba kapasitasaun umanu hodi bele fó tulun ba ema hotu atu bele preparadu ona abilidade, talentu no mentalidade atu bele kompete ho ema sira ne’ebé mak mai husi nasaun mais avansadu.

Nia mos klarifika katak adesaun Timor-Leste nudar oportunidade ida nomos sei fo Benefísiu di’ak ba Timor-Leste atu adere ba membru ASEAN, tanba TL lori investor sira mai halo investimentu iha nasaun Timor-Leste. “Tanba bainhira ita simu investor membru ASEAN nian mai halo investimentu iha nasaun Timor-Leste, sei bele loke oportunidade serbisu barak mai nasaun Timor-Leste, no mós ita bele hasa’e kresimentu ekonomia iha ita nia nasaun, iha razaun ida tan mak ita lori investor boot sira husi membru ASEAN nian atu bele mai dezenvolve ita nia nasaun.

Duke ita lori osan ba investe iha nasaun seluk, tanba ita bele lori ASEAN nia osan mai investe iha ita nia nasaun,” dehan nia. Nia mos husu ba governu atu bele hahu esforsu makas hodi fo apoiu formasaun profisional ba setór privadu iha Timor-Leste atu bele hasa’e koñesimentu no kapasidade hodi bele servisu hamutuk ho investor husi membru ASEAN nian tanba TL nia seitor privadu presiza hetan oportunidade atu bele servisu hamutuk ho membru ASEAN.

“Bainhira ita adere ona ba membru ASEAN mak husi parte investor sira barak sei mai halo investimentu iha nee tan nee ita presiza preparadu atu bele servisu hamutuk. Ita nia nasaun iha governu ida ne’ebé mak transparénsia tebes no iha lei atu bele asegura ba investor rai liur atu bele mai investe iha nee, oras nee ita estabelese di’ak tebes hodi fó fatin ba ema rai liur atu bele hala’o negósiu,” katak nia.

Tony Jape klarifika katak oras nee daudaun ekonomia Timor-Leste ne’ebé mak monu makas tebes, tan nee bainhira Timor-Leste tama iha membru ASEAN sei bele hadi’a ekonomia rai laran tanba bele loke merkadu iha ASEAN no Timor-Leste bele hetan kresimentu ekonomia ida ne’ebé mak di’ak tebes tanba Timor-Leste bele loke ona odamatan boot merkadu ba iha nasaun ASEAN sira hodi lori tama osan mai Timor-Leste.

Tan ne’e atu taka Tony Jape mos hato’o mensagen katak bainhira de’it mak Timor-Leste atu adere ba membru ASEAN nee parte seluk ida, maibé preparasaun mak prinsipál tebes ba emprezáriu sira hotu iha Timor Laran tomak. “Tenke prepara imi nia kapasidade, koñesimentu, skill, finanseiru, estrutura kompañia labele hein tan tempu, hahú agora tenke preparadu ona, tanba odamatan merkadu boot sei nakloke no ita hatene ona oinsá atu bele simu situasaun investimentu no negósiu ida ne’ebé mak sei kompetetivu tebes ho membru sira husi Asosiasaun Nasaun Sudeste Aziátiku (ASEAN),” husu nia. (BT)