DÍLI----Rekursu humanu importante tebes ba iha Timor-Leste hodi bele kompete wainhira Timor-Leste adere ba iha Organizasaun ASEAN tan ne’e ohin loron liu husi Universitariu sira garantia ona rekurusu hodi kompete iha ASEAN.

Rajaun rekursu humanu preparadu tanba durante ne’e Universidade produs ona rekursu humanu maibe kampu servisu barak hodi halo numeru dezempregu kontinua aumenta iha Timor-Leste, tanba ne’e bainhira Adesaun sei minimize dezempregu ne’ebe mak iha.

Dekanu Fakuldade Science Sosiál e Polítika Camilo Ximenes Almeida hateten, atu sai membru ASEAN Timor-Leste oras nee tenke preparadu iha aspetu hotu-hotu, liu-liu iha area infraestrutura no kapasitasaun humanu no finansiamentu maibe hare ba rekursu humanu durante ne’e Universidade produs ona rekursu barak hodi prepara atu kompete iha Merkadu ASEAN.

Nia dehan hare ba rekurusu humanu laiha problema maibe Governu iha responsabilidade atu bele aselera lalais infraestrutura iha país nee no tenke ajuda mos hodi hadiak liutan ba rekursu humanu. “Nu’udar akadémika iha pontu de vista hodi hatudu realidade katak oras nee rekursu humanu ne’ebé mak forma liu husi edukasaun formal oras nee preparadu 75 porsentu atu bele servisu bainhira Timor-Leste adere ba membru ASEAN,” Dekanu Fakuldade Science Sosiál e Polítika Camilo Ximenes Almeida iha nia knar fatin, Tersa-Feira (02/09).

Nia klarifika katak husi Universidade tomak iha Timor Laran iha prosesu preparasaun ida ne’ebé mak di’ak hodi bele kompete iha kampu de traballu bainhira nasaun Timor-Leste sai mós hanesan membru husi Asosiasaun Nasaun Sudeste Aziátika (ASEAN). Maski TL nia rekursu liu husi edukasaun formal sidauk bele garante 100 porsentu maibé nafatin optimista katak iha ona rekursu humanu balun.

Tan ne’e atu asegura di’ak liu tan presiza mós parte governu nia apoiu hodi hasa’e kapasidade rekursu humanu. “Hare ba kapasitasaun ba rekursu humanu hodi kompete iha merkadu ASEAN Timor-Leste tenke mós prepara iha kapasidade ba setór privadu atu nune’e bele hetan benefísiu ruma, selae bainhira Timor-Leste sai membru ASEAN, la bele kompete iha merkadu tan nee membru ASEAN husi nasaun seluk mak sei mai hetan benefísiu fali iha ita nia rain, tanba iha la iha kapasidade humanu atu kompete. Presiza tebes governu nia apoiu liu husi setór ekonomia no kapasitasaun humanu,” dehan nia.

Nia mos afirma katak wainhira Timor-Leste adere sei hetan vantajen boot tanba geografikamente Timor-Leste sei sai odamatan boot ba tránzitu ba prosesu merkadorias no sei lori roo barak mak ultrapasa iha ita nia nasaun hodi bele kontribui ba reseita doméstika rai laran liu husi taxa. Oras nee Timor-Leste sai mos membru CPLP hodi bele promove produtu husi nasaun Europa ba iha merkadu ASEAN.

Camilo Ximenes Almeida hakarak husu ba parte setór privadu no mós graduada husi Universidade atu kontinua eleva koñesimentu hodi iha abilidade ne’ebé mak di’ak liu atu nune’e bele mós kompete iha merkadu rai laran no merkadu ASEAN tanba lakleur tan Timor-Leste sei sai mós membru husi Asosiasaun Nasaun Sudeste Aziátika (ASEAN). “Selae mak ita rai nain sei sai fali hare nain iha ita nia nasaun rasik no ema seluk mak sei aproveita,” informa nia. (BT)