DÍLI----Sai Orgullu boot ba Timor-Leste liu-liu iha area Edukasaun ninian tanba liu husi selesaun ba premiu Princeza Maha Chakri ninian iha tinan 2019 konsege lori profesora Lordes Rangel Gonsalves sai Manan nain ba iha Premiu refere.

Profesora Lordes Ranger Hetan premiu refere tanba konsege didika nia aan hodi halo mudansa ba iha eskola Primaria Matata Gleno sai eskola ne’ebe kualifikadu iha Timor-Leste.

Liu husi premiu refere konsege marka prezensa direitamente husi Dr. Krissanapong Kirtikara, Former Deputy Ministeriu Edukasaun Thailandia nomos Chairman of Princess Maha Chakri Award Foundation (PMCAF), inklui ho nia delegasaun hamutuk nain 15 hodi hakat mai iha Timor-Leste hodi hare direitamente ne’ebe mak profesora Lordes halao iha eskola refere.

Iha visita ne’e Krissanapong Kirtikara, Former Deputy Ministeriu Edukasaun Thailandia katak sai orgullu boot ida ba Princeza tanba liu husi kompitisaun ne’ebe mak iha, iha tinan 2019 Timor-Leste mak sai hanesan manan nain. Nia dehan ida ne’e sai nudar orgullu boot ida ba Princeza tanba programa refere halao ona iha nasaun barak inklui Timor-Leste no iha tinan ne’e Timor-Leste mak sai hanesan manan nain.

“Tinan ne’e Timor-Leste mak sai hanesan manan nain ba premiu refere no sai orgullu boot ida,” dehan nia ba BT iha Edifisiu Embaixada Thailandia, Farol Foin lalais ne’e. Nia espera katak liu husi premiu refere sei hatudu rejultadu ne’ebe diak liutan iha nivel edukasaun tanba esperansa ne’ebe mak iha hakarak Timor-Leste iha kualidade estudante ne’ebe diak iha futuru.

Iha biban ne’e mos Profesora Lordes Rangel Gonçalves sente orgullu tebes tanba ikus mai sai manan nain ba iha premiu ne’ebe mak iha. “Hau sente orgullu tebes tanba bele hatudu rejultadu ne’ebe diak iha Timor-Leste,” dehan nian. Nia kompromente katak kontinua nafatin oinsa bele hadia liutan kualidade edukasaun liu-liu iha eskola Matata hodi nune’e estudante sira bele kontenti hodi tuir aprendijazen.

Wainhira Princeza hili profesora Lordes sai manan nain ba tinan ne’e, haruka kedas delegasaun ida hamutuk ema nain 15 hodi halo visita direitamente ba eskola Matata ne’ebe lokaliza iha Postu administrativu Gleno Foho, iha visita delegasaun ne’e halao observasaun hodi hare direitamente kondisaun Eskola nomos dezenvolvimentu mentalidade estudante nian iha eskola refere.

Liu husi observasaun refere hatudu katak iha eskola refere hatudu prosesu ne’ebe diak ho kualidade ne’ebe ass maske eskola refere infrenta problema balun hanesan estrada liga ba eskola ladiak, infrenta bee moos maibe iha ambitu eskola mos, no buras tebes. Visita refere akompana mos embaxador Thailandia iha Timor-Leste ho nia ekipa, hodi entrega mos sasan desportu hanesan Bola, Net inklui mos sasan sira seluk tan. (BT)