DÍLI----Preparasaun ba rekursu umanu ho kualifikadu hodi kompete iha merkadu traballu sai nudár responsabilidade ba ensinu superior sira tanba ne’e Universidade Dili (UNDIL) kontinua tau importánsia hodi prepara rekursu umanu ne’ebé ho kualidade hodi responde ba nesesidade nasaun nian.

Vise-Reitora Assuntos Kooperasaun UNDIL, Cesaltina Ȃngela Soares hatete Universidade Dili kontinua prepara rekursus umanus ho kualidade iha area oin-oin hodi kontribui ba dezenvolvimentu nasaun nian.

“Agora atu prepara rekursu umanu ba futuru, ami iha departamentu sanulu katak rekursu ne’ebé mak ami prepara atu hasoru kualker dezenvolvimentu iha nasaun ne’e nian, ami hosi Universidade Dili prepara ba setór ne’ebé importante no Universidade prepara hela 7 mil estudante ne’ebé la’o hela ba futuru nasaun nian hanesan fini ida,” hatete Vise-Reitora Assuntos Kooperasaun UNDIL, Cesaltina Angela Soares ba jornalista BT iha nia knaar fatin UNDIL, Kinta-Feira (05/09).

Nia dehan atu prepara rekursus umanus ho kualidade UNDIL mos hadi’a fasilidade sira hodi bele hetan mós akreditasaun hosi Agencia Nacional Avaliacão e Acreditação (ANAA). “Ami nia preparasaun kualidade mak hadi’a fasilidade sira ne’e nune’e mós prepara para hetan akreditasaun hosi ANAA, ami nia rekursu sira ne’e maioria hetan akreditasaun programa hosi ANAA ne’e rasik hanesan Relasaun Internasional, Siensia Direitu, Jestaun, Kontabilidade, Inglesh, Industria sira ne’e tama ona ba akreditasaun tanba ne’e mak atu haree ba kualidade ami nian, preparasaun hanesan akademika jatamente rekursu umanu UNDIL ne’e barak ona,” dehan nia.

Rekursus umanus ne’ebé UNDIL prepara ohin loron servisu iha instituisaun sira estadu nian hanesan iha Ministériu sira no iha mós instituisaun setór privadu sira nian. Alenede ne’e Vise-Reitora Assuntos Kooperasaun ne’e hatete TL ohin loron esforsu-aan hela atu tama ba ASEAN nune’e rekursus umanus ne’e sai nudár pilar ida importante tebes tanba Adere ba ASEAN katak TL tenke prepara rekursu ne’ebé mak naton atu bele servisu iha setor ne’ebé mak iha tanba ne’e ba UNDIL prepara rekursu umanu iha area ne’ebé mak importnate hodi simu no kompete iha dezenvolvimentu tempu oin mai.

“Ami prepara rekursu umanu tuir estatistika ba dosente sira mos atu prepara ba kualidade ne’e dosente hosi ami nia Universidade nian rasik kuaze pursentu 70 doutoramentu i pursentu 30 mak sei iha lisensiatura maibe pursentu 30 ne’e mos sira funsionariu deit iha administrasaun nian,” nia informa. Ne’ebé ida ne’e ba oin espera katak sei buka meius para bele kontinua hasa’e sira nia abilidade no sira nia kualidade iha nivel altu tempu mai tan.

Entaun UNDIL tuir padraun governu ka tuir padraun mai hosi Ministeriu Edukasaun katak Lisensiatura labele hanorin Lisensitura e Mestradu ka Doutoramentu mak tenke hanorin Lisensiatura tanba ne’e UNDIL sempre la’o tuir padraun ne’ebé mak mai hosi governu. UNDIL mós kontinua halo preparasaun hodi forma rekursu ne’ebé ho kualifikadu ba universidade nune’e kontinua fó espasu ba dosente sira hodi ba hala’o sira nia estudu ho nivel mestradu no doutoramentu iha nasaun sira hanesan Indonesia no Portugal.

“Ami haruka ba kontinua nune’e aban bainrua mai fila fali bele habelar fali manetek ba estudante sira hodi nune’e aban bainrua bele kompete fali iha rai doben ida ne’e, Tanba ne’e mak rekursu ne’ebé mak UNDIL prepara bele benefisiu ba Estadu Timor-Leste, tanba rekursu ne’ebé ami oferese tenke fo hela esperansa ba sira atu bele rekursu ne’e iha duni kualidade hodi bele serbi rai ne’e ho di’ak liutan,” Informa Vise Reitora Asunto Kooperasaun ne’e. (BT)