DÍLI----Ministériu Edukasaun ofrese oportunidade ba estudante sira ne’ebé mak para Eskola atu bele kontinua eskola liu husi programa ensinu rekorrente. VIII Governu liu husi Ministériu Edukasaun Juventude no Desportu realiza programa ensinu rekorrente iha munisípiu 13 hodi fó oportunidade ba estudante sira ne’ebé mak la konsege remata eskola no mós ba analfabetizmu sira hodi bele kontinua sira nia estudu to’o remata iha nivel sekundáriu nian.

Diretór Jerál Polítika, Planeamentu no Kooperasaun MEJD Antoninho Pires hateten Ensinu Rekorrente nu’udar edukasaun noun formal ida ne’ebé mak sei ofrese oportunidade ba joven sira ne’ebé mak para eskola no la remata sira nia estudu no mós ba alfabetizmu sira hodi bele kontinua estudu to’o remata.

Programa ida ne’e sei bele realiza de’it iha tinan 3 nia laran maibe iha disponiveldade bele iha kontinuasaun. Maibé ba estudante sira ne’e hotu sei atende iha ensinu ekivalénsia hodi bele hetan valor no husi valor ne’e mak sei determina atu bele asegura kontinuasaun iha segundu séklu karik iha dispolniveldade. Tinan kotuk ministériu edukasaun gradua ona 130 estudante ho tuir planu sei kontinua tan programa ne’e durante tinan tolu nia laran.

Matéria ne’ebé mak sei simu hodi atende ba ezame mak ezame ne’e mai husi ensinu báziku, ensinu pre-sekundáriu no mós ensinu sekundáriu maibé durante de eskola mak la tuir eskola formal nian tanba tuir kurríkulu eskola formal tenke eskola tinan 9 maibé ba ensinu rekorrente sei hetan tinan tolu de’it.

Nia hatutan tan katak oras ne’e sidauk iha data fixu ba estudante hirak mak sei kontinua tan iha ensinu rekorrente maibé nafatin husi parte Ministériu Edukasaun Juventude no Desportu sei nafatin halo peskiza hodi foti dadus konkreta. Ba estudante rekorrente sira tenke ba aprezenta faktu ruma hanesan kaderneta ou deklarasaun ruma husi eskola pasadu atu nune’e prense rekizitu hodi bele kontinua estudu iha ensinu rekorrente.

Nia husu ba inan aman sira atu bele apoiu oan sira hotu ne’ebé mak la konsege remata eskola ou para eskola bele hetan disponiveldade hodi bele atende iha programa ensinu rekorrente atu bele nune’e estudante sira bele hetan direitu hodi kontinua sira nia estudu iha tuir mai to’o nivel ensinu superior tanba nasaun Timor-Leste adopta ona lei ida hodi fo oportunidade hanesan ba Timoroan hotu bele asesu ba edukasaun. (BT)