DÍLI----Loron 30 fulan Agostu tinan 1999 nudar loron Konsulta Popular hodi hatur istoria determinasaun indepedensia Timor-Leste hodi sai nasaun soberania ida, tan ne’e iha selebrasaun loron konsulta popular ba dala-20 Timor-Leste marka tan istoria ida hamutuk ho Nasaun Vizinu Australia hodi troka nota Diplomatika ratifikasaun Tratadu Fronteira Maritima iha Tasi Timor.

Troka nota Diplomatika ratifikasaun Tratadu Fronteira Maritima iha Tasi Timor hodi lori nasaun rua hanesan Timor-Leste no Australia sai ezemplu ida ba iha mundu ohin loron tanba realidade iha nasaun boot balun konflitu fronteira Maritima kuaze tinan barak ona seidauk hakotu inklui hamosu mos funu. Maibe liga fali ba problema Fronteira Maritima iha Tasi Timor nasaun rua hanesan Timor-Leste no Australia lao ho dame sai ezemplu ida ba iha mundu tomak. 

Iha sermonia ofisial troka nota diplomátika sira kona-ba ratifikasaun tratadu fronteira marítima iha Tasi Timor” ireitamente husi xefe governu Taur Matan Ruak nomos Primeiru-Ministru Austrália, Honoravel Sr. Scott John Morrison. Iha Sermonia refere Xefe Governu Taur Matan Ruak hateten TL no Australia Troka Nota Diplomátika refere hahú kapítulu foun ida kona-ba relasaun bilaterál entre nasaun rua.

“Momentu ida ne’ebé hatudu ita-nia vontade mútua ne’ebé firme atu alkansa akordu ida justu no ekuitativu, hafoin prosesu negosiasaun nian ne’ebé la’o ho susesu, ne’ebé ba dala uluk mak utiliza mekanizmu konsiliasaun sira, ne’ebé prevee iha Konvensaun Nasoins Unidas kona-ba Direitu Tasi nian (UNCLOS),” dehan Xefe Governu Taur Matan Ruak iha nia Diskursu wainhira Troka Nota Diplmatika Ratifikasaun Tratadu Fronteira Maritima iha Palasio Governu SestaFeira (30/08).

Tan ne’e ho troka nota Diplomasia refere sai orgullu boot ida ba Timor-Leste tanba marka entrada iha vigor tratadu refere no husi nasaun rua ne’e sai ezempu ida ba mundu oinsa bele rejolve problema ho daomen. “Tanba ne’e, maka ho orgullu boot ita marka entrada iha vigór tratadu ida-ne’e nian, iha nasaun rua ne’e, hanesan ezemplu di’ak ida ba Mundu, kona-ba oinsá rezolve konflitu ho dame, ho forma kooperativa no kolaborativa,” katak nian.

Nia mos esplika katak Austrália no Timor-Leste fahe lisuk prinsípiu no valór fundamentál sira-ne’ebé hanesan kona-ba Direitu Internasionál no Direitus Umanus nian no Relasaun di’ak, besik no pozitivu refere, eziste nafatin durante tinan barak iha nivel bilaterál, liu hosi kooperasaun iha domíniu hotu-hotu ne’ebé sai hanesan interese komún, liu-liu iha defeza no seguransa, iha saúde no edukasaun no iha fortalesimentu sosiedade sivíl, liu-liu iha lasu sidadania sira nian.

“Maske ita-nia relasaun metin tebetebes, ha’u hakarak hato’o ba V. Exa. (Vosa Exelénsia), Sr. Primeiru-Ministru, ami-nia kompromisu firme atu investe tempu no esforsu maka’as liután, atu habelar no hametin ita-nia relasaun iha nivel hotu-hotu, hodi hatan tuir ita-nia povu sira ninia espetativa,” katak nian. Taur mos esklarese katak Espíritu husi Tratadu Fronteira Marítima permanente refere sai hanesan fonte inspirasaun no enkorajamentu ida, ne’ebé fó aten-boot mai TL atu la’o ba oin.

“Ha’u fiar katak espíritu ida-ne’e sei ajuda duni ita-nia Governu rua hodi serbisu ho empeñu foun, tantu bilaterál no mós kooperativu, ba ita-nia rain nia di’ak no ba ita-nia populasaun sira-nia moris-di’ak,” katak nia. Nia mos informa katak Austrália no Timor-Leste serbisu hamutuk nafatin, nune’e bele kumpre, ho dalan ne’ebé prátiku liu no dilijente liután, hodi Povu rua ne’e ninia hakarak no aspirasaun loloos. Iha sermonia nee marka prezensa husi Bainaka sira husi nasaun sira ne’ebe partisipa iha sermonia Konsulta popular inklui mos marka prezensa maksimu husi Estrutura VIII governu nomos Estidade sira seluk. (BT)