DÍLI----Povu Timor-Leste entuziazmu tebes hodi ba partisipa iha loron votasaun iha dia 30 de Agostu 1999, maibé laran hakmatek iha loron balun de’it, bainhira remata vota hahú mosu ameasa no torturasaun.

Nain husi kompania Jacinto Claricia Lay haktuir hafoin votasaun ema hotu iha esperansa boot ba ukun rasik aan, no ne’e inimigu trasa planu atu bele taka moe hodi hamosu situasaun perigu ba vida hodi halo ema hotu neon lakon tanba hahú kedas iha dia 30 Agostu kalan mosu situasaun barullu husi kilat tarutu iha Dili laran tomak tan ne’e ema ida-ida haksubar aan iha fatin seguru hodi proteje aan.

Mosu duvida boot atu husu loos tulun ba see, atu ba loos ne’ebé no atu halo loos saida? Hakmatek aan iha uma laran hodi rona kilat tarutu iha kalan tomak nia laran, hodi akompaña de’it situasaun ho laran taridu husu ba aan rasik lahatene belun se loos mak mate ona no se mak sei moris.

Iha loron tuir mai rona katak viziñu balun iha parte Audian hetan tiru no mate hamosu tan trauma no duvida boot saida mak sei akontese iha loron no kalan tuir mai. Mosu ta’uk tanba keta Milísia sira koñese ita nu’udar ema hakarak ukun rasik aan. Hahú haree ahi suar iha loron tuir mai no rona ema seluk halerik katak milísia hetan apoiu husi POLRI no ABRI hahú sunu ona iha fatin-fatin.

Nia haktuir tan katak Tuir informasaun rezultadu ba eleisaun sei fó sai iha dia 09 de Setembru 1999, maibé rezultadu fó sai antes iha dia 04 de Setembru, tanba ne’e milísia Indonesia hahú hala’o violénsia, krime hodi oho, sunu no na’ok ema nia sasán. Hakarak ka la kohi tenke buka planu atu bele evakua se lae mate iha uma laran, hare katak uma no loja JACINTO komesa sunu no milísia na’ok sasán hotu no la husik hela buat ruma.

“Osan laiha no hahán menus no sentimentu komplikadu atu sai husi uma sinte ta’uk ho inimigu maibé bainhira hela iha uma sei sunu mutuk no mate iha uma laran,” haktuir Claricia Lay ba BT iha nia knaar fatin hodi relembra hikas akontesementu ne’ebé akontese hafoin eleisaun iha 30 de Agostu 1999. Nia dehan haree ba situasaun ne’e hakarak ka lakohi tenke buka dalan ba fatin seguru hodi dezloka ba Australia maibé dalan laiha tan ne’e buka informasaun atu liu ba Australia tenke liu husi Indonesia.

Situasaun ne’ebé mak ameasadu tebes ba vida tan ne’e obrigadu tenke la’o ho liman mamuk no oan sira ne’ebé sei ki’ik hodi ba husu tulun ba belun sira iha Indonesia hodi bele apoiu hakat liu ba nasaun viziñu Australia. Loron 30 de Agostu sai loron istórika ida hodi fó reflesaun fali ba sitasaun pasadu ne’ebé mak difisil tebes no la fasil ba Timor-Leste Ukun Rasik Aan.

Bainhira nasaun Timor-Leste hetan situasaun normal fila hikas mai rai doben Timor-Leste hodi kontinua vida emprezariál hahú husi zero no ikus mai bele hetan duni rezultadu balun ne’ebé mak konsidera sai nu’udar sakrifísiu tomak ba iha prosesu kontribuisaun ba luta ukun rasik aan nian, oras ne’e nafatin fó kontribuisaun ba nasaun hodi dezenvolve iha setór emprezariál nian hodi loke kampu de traballu ba joven feto no mane liu rihun ida resin.

Mensajen espesiál husi Nain ba Jacinto Group Claricia Lay, husu ba joven mane no feto sira atu bele hetan susesu mai husi ita nia vontade esforsu aan tanba ita ema ida-ida moris mai mundu Maromak tau ona planu. Maibé atu alkansa ba moris di’ak tenke esforsu no serbisu makas la bele baruk no tenke prontu hasoru dezafiu ne’ebé mak enfrenta iha ita nia moris. No tenke prontu atu foti desizaun ba futuru di’ak tuir dalan própriu ida. (BT)