DÍLI----VIII Governu Konstituisional liu hosi Reuniaun Konsellu Ministru (KM) foin lalais halo ona aprovasaun ba orsamentu tetu fiskal 2020 ho montante Billaun $1.6 ne’ebé sei tau prioridade ba setór tolu iha tinan oin.

Ministra Finansas Interina, Sara Lobo Brites hatete Governu liu hosi Konsellu Ministru Aprova ona Tetu Fiskal nasional ba tinan 2020 nian, no tetu fiskal ne’e tau prioridade nasional ne’ebe sei preve iha orsamentu jeral do estadu 2020 nian hamutuk $1.6 Biloens ba prioridade tolu.

“Ohin Konsellu Ministru Aprova ona tetu fiskal ne’ebe mak aprezenta hosi Ministeriu Financas ho montante $1.6 Biloens maibe ida ne’e aprova hodi bele distribui ba prosesu dezemvolvimentu nian, I preve orsamentu ne’e ba preoridade tolu, KM prova mos tetu desgaradu ba iha Ajensias hot-hotu, Ministeriu hot-hotu hafoin ita sei iha distribuisaun envelope iha dia 6 de Agostu ba Minnisteru ida-idak para hodi prepara ninia instituisaun,” dehan Sara Lobo, depois de reuniaun iha Palasiu Governu, Tersa-Feira (30/7).

Nia dehan Konsellu Ministru aprova mos kalendariu ba preparasaun Orsamentu Jeral Estadu 2020 tanba foin dadauk hetan atraza uitoan tanba tuir loloos aprova ba tetu iha 17 de Jullu maibe governu deside hola atensaun ba leis ne’ebe mak foin liga ho Fronteira Maritima entaun kuaze Ministeriu Financas, Konsellu Ministru okupadu iha leis sira ne’e.

Nia haktuir katak, tanba ne’e mak atrazu I foin mak hetan aprovasaun iha ohin, tantu tenke halo fali ajusta ba kalendariu Financas ho Ministeriu hot-hotu tenke halo esforsu para bele submete nafatin orsamentu tuir rekejitus da lei antes de loron 25 de Outubru. Nia hetutan, ultimo dia 15 de Outubru agora iha Parlamentu Nasional, portantu sei halo esforsu para submete ba parlamentu nasional ho rekejitus.

Alende ne’e mos Presidente Konsellu Ministru (KM) Hermenegildo Agostu Cabral Perreira haktuir tan katak, ohin Finalmente KM aprova tetu fiskal ho montante 1.6 Biloens ba Orsamentu Jeral do Estadu (OJE) 2020 ne’e tanba iha opsoens tolu mak MF hato’o. Nia dehan tanba ne’e KM hare katak ho preoridades ne’ebe VIII Governu nian uluk aprova iha parlamentu tuir mos programas ne’ebe governu sei aprezenta ba parlamentu hare katak 1.6 Bilones ne’e maka mais apropriadu atu kobre preoridade sira ne’ebe mak iha.

Nia haktuir tan, “mas ita bo’ot sira hatene Konsellu Ministru tenke hatun ba parlamentu proposta OJE 2020 antes loron 15 fulan Outubru nia laran,” katak nia. “Preoridades barak governu hare programas importantes konsiderasaun atu sosa berkasa tolu hodi tulun transporte notariais ba distritu sira hosi tasi, ne’e para evita tramiaun sira mai hotu, bele tulun estrada,” informa KM. (BT)