DÍLI----Centru Logistiku Nasionál (CLN) tinan ne’e aloka Orsamentu ho montante $14 Mil hodi Sosa hare kulit 428 Tonelada iha Munisipiu Bobonaro postu administrativu Maliana.

Prezidenti CLN Augustu Juniór Trindade hatete, tinan ne’e CLN sosa hare kulit iha Maliana hamutuk 428 Tonelada no iha Postu Hatulia hamutuk 120 Tonelada. “CLN sosa hare kulit iha Munisípiu Maliana 428 Tonelada no Munisípiu Ermera husi Postu Administrativu Hatulia 120 Tonelada,” dehan Prezidenti Centru Logistiku Nasionál (CLN) Augustu Juniór Trindade, ba Jornalista Business Timor iha nia kna’ar fatin Fomentu Bebora Mandarin Dili, Segunda-Feira, (29/07).

Prezidenti hatutan tinan ne’e CLN aloka Orsamentu ba sosa hare kulit hamutuk $14 Mil maibe tuir orientasaun husi superior sira katak, iha komunidade produsasaun rai laran sa’e makás, bele halo tan pedidu atu nune’e bele hetan apoiu hodi bele sosa tan produtu lokal sira iha munisipiu sira seluk. Tanba ne’e sosa ona iha Maliana, lori ba Armajen ne’ebé mak husi kompañia Agroprassa prepara, atu nune’e dulas iha kompañia refere. 

Prezidenti esplika agora bele atinji ona 30% husi prosesu hare kulit ne’ebé mak CLN sosa, no kualidade fós ne’ebé mak diak, tanba fós ne’ebé mak foun. Augusto hatutan agora sosa hare kulit iha Postu Administratuvu Hatulia, Saré no Bilimau, tanba sira laiha Makina ne’ebé mak atu dulas hare kulit, tanba ne’e sira lori mai Armajen iha kapital Dili hodi dulas. Nia informa CLN komesa ona prosesu atu dulas hare kulit, maibe CLN tenki haree mákina ne’ebé mak dulas hare kulit ne’ebé mak ho nia kualidade ne’ebé diak.

Tanba ne’e pedidu husi Ministeriu Agrikultura no Peska, Hare Kulit ne’ebé diak ho kualidade ne’ebé mak CLN atu sosa no tenki garante mákina ne’ebé mak atu utiliza ne’e ho kualidade hodi dulas hare nune’e bainhira sai fós nia tenke ho kualidade. Nia hatutan prosesu pagamentu nian ohin loron CLN hasoru hela difikuldade ida, tanba tuir prosedimentu aprovisionamentu nian, ho regra ne’ebé mak rigoroju uitoan, tanba ne’e mak tenki priense rekrejitu.

“To’o ohin loron kuaze fulan ida ho balun atu tama fulan rua, maibe pagamentu seidauk to’o iha komunidade sira nia liman, ida ne’e sai hanesan rsponsablidade ba CLN nian, CLN hanesan Merkadu, maibe iha parte seluk ita nia problema iha prosesu pagamentu,”dehan nia. Maske nune’e Prezidenti ne’e esplika CLN nafatin buka dalan halo diskusaun ho Ministériu Finansas, atu nune’e bele habadak prosedor sira, hodi bele halo pagamentu ho lalais ba komunidade sira.

Tanba ne’e iha Munisipiu sira seluk parte CLN hanoin ona, agora CLN komesa ona husi Munisipiu Maliana, no husi Postu Administrativu Saré, agora CLN hein hela MAP hodi aprezenta ona iha Oebaba iha Munisipiu Kovalima, CLN prepara atu hare prosesu pagamentu sira, CLN komesa ba ona Oebaba hodi Sosa Hare Kulit. Tuir mai mak husi Munisipiu Viqueque, Baucau, Manatutu tenki hetan pedidu ida husi MAP sira prontu mak, CLN tun ba Hola Hare Kulit. (BT)