DÍLI----Governu Timor-Leste liu husi konsellu Ministru iha tinan 2014 konsege harii ona Centru Bambu Tibar nu’udar Instituisaun Publiku estadu nian nomós funsionamentu Centru Bambu mos mai hetan finanseiru husi Governu Timor-Leste liu husi Orsamentu Jeral Estadu ne’ebe mak kada tinan aprova husi parlamentu nasional.

Hare fila fali ba utilizasaun Produtu ne’ebé prodús hosi Au ne’ebe Centru Bambu produs, produtu hirak ne’e barak liu sosa husi ajensia Internasional sira halo komparasaun ba Governu ne’ebé nudár nain ba Centru ne’e.

Tuir observasaun maske Centru Bambu konsege dezenvolve ona Au hodi transforma ba produtu mobiliariu oin-oin maibe iha instituisaun estadu barak mak seidauk utilize produtu hirak ne’e iha sira nia servisu fatin tanba numeru sei ki'ik tebes no maioria sei uza produtu importasaun liu-liu Kadeira, Meza, Armari feitu sira.

Diretor Ezekutivu Centru Bambu Tibar Sabino Rua deklara hahú husi tinan 2009 bainhira reativa fila fali Centru Bambu hodi halo produsaun Au ba produtu mobiliariu to’o iha tinan 2018 produtu Centru ne’e nian barak liu hola husi Ajensia Internasional sira kompara ho Governu rasik.

“Agora dadauk kliente barak liu ita haree ba ninia kuantidade Ajensia Internasional ho komunidade Internasional, maibe ida ne’ebe mak hela iha Timor ne’e mak hola barak liu, ba ema lokal sira, balun mai sosa komesa ida ne’e ita haree tinan kotuk mai to’o ohin loron,” dehan Diretor Ezekutivu Centru Bambu Tibar Sabino Rua ba BT iha nia knar fatin Tibar, Kuarta-Feira (10/07).

Nia dehan númeru ema ne’ebé sosa produtu ne’ebé prodús hosi Au ne’e sae maka’as hosi Ajensia Internasional no komunidade Internasional inklui mós komunidade sira ne’ebe gosta uza produtu Au no Governu nia interese hola produtu Au foin mak liu husi Universidade Nasional Timor Lorosa’e (UNTL) de’it.

“Tanba ne’e mak sira iha interesante tanba produtu ita nia rasik, rekomedasaun boot liu agora dadauk mai tinan 2019, boot liu sei mai husi estadu liu husi universidade UNTL, hanesan agora hameno 10 mil obriga ami servisu tuku 6 to’o tuku 10 kalan,” katak nia. Nia afrima katak durante ne’e funsionamentu Centru Bambu depedensia mos ba iha orsamentu Estadu tanba ne’e iha tinan 2016 no 2017 mosu impase politika nia afeitasaun mos ba dezenvolvimentu Centru Bambu nia rendimentu mos.

“Tinan kotuk liu tinan 2016 sa’e oituan, maibe to’o tinan 2017 tun fali tanba ida ne’e instituto publiku ne’e depedensia ba orsamentu Jeral Estadu,” afirma nia. Maske reseita ne’ebe mak Centru Bambu hetan la utilize direitamente husi sira maibe tenke depositu hotu ba iha kofre estadu tanba estadu la autoriza atu bele utilize direitamente maibe tenke liu husi sistema ne’ebe mak iha.

Centru Bambu harii la’ós fo benifisiu deit ba Governu maibe benefisiu direitamente ba povu sira tanba ohin loron kuaze Grupu 12 mak hahú establese iha munisipiu 12 hodi fornese Au rifas ba Centru hodi produs ba produtu oi-oin maibe Governu rasik lautiza produtu ne’ebe mak Centru produs hanesan Meja, Kadeira nomos produtu sira seluk tan.

“Agrikultór mak sai hanesan benefisiáriu direita, tanba bele kolabora no serbisu maka’as ho sira hodi kria veveru ba Au sanak atu bele halo replantasaun. Oras ne’e iha ona pesoál tékniku nain 4 ne’ebé mak iha kualifikadu di’ak kona-ba oinsá atu halo plantasaun ba veveru Au-oan sira.

Oras ne’e mais ou menus iha ona 40.000 Au-oan ne’ebé mak kuda fali ona, iha tinan 2011 iha total 100.000 hectares. Maibé iha agrikultór balun ne’ebé mak kuda fali iha fatin ne’ebé mak fasil ba animal sira atu ultrapasa hodi fóestragu tan ne’e tuir observasaun no relatóriu ami hetan karik iha ona 25% mak hetan estragu no iha 75% mak hetan aseguradu,” dehan nian.

Nia mós afirma katak kualidade produtu refere nu’udar kualidade internasional tanba hetan mos apresiasaun husi kompana internasional balun liu-liu iha tinan 2014 banhira Centru Bambu tuir espozisaun iha Malaysia hetan Certifikadu Apresiasaun ida iha momentu ne’eba no sai orgullu ida ba iha Timor-Leste.

Tan ne’e husi dezenvolvimentu Bambu sempre fo reseita ba instituisaun estadu tanba Centru Bambu nu’udar Institutu Publiku ne’ebe nia benifisiu ba iha parte rua mak hanesan primeiru mak sosial benefit liu-liu oinsa komunidade bele hetan benefisiu ne’ebe mak di’ak, nomos bele rekopera Centru nia kustu ne’ebe operasional hodi hatama reseitas ba kofre estadu.

“To’o ohin loron komesa husi fulan inisiu to’o fulan Juñu tinan ne’e ita hatama osan kuaze $686 mil reseita ne’ebe mak ita hatama ba iha kofre estadu, Tinan kotuk liu tinan 2016 sa’e uitoan, maibe to’o tinan 2017 tun fali tanba ida ne’e instituto publiku ne’e depedensia ba Orsamentu Jeral Estadu,” dehan nian. (BT)