DÍLI----Instituisaun Bambu ne’ebé mak harii iha tinan 2005 to’o ohin loron konsege hatudu progresu boot tanba bele transforma Au ba iha mobiliáriu ne’ebé bele produs produtu oin-oin hodi fa’an ba publiku hodi hatama osan ba iha kofre estadu.

Liu husi timoroan sira ne’ebé hala’o servisu iha Centru ne’e ninia kreativu oras ne’e dadaun Centru Bambu konsege Transforma Au ba produtu hamutuk 6 mak hanesan Mobiliáriu, Artejenatu, Au-kabelak, Anar, Kurtina, no Kesak ba Sate.

“Oras ne’e Institutu Bambu produs ona produtu modelu 6 no besik atu ba 7. Produsaun Au-Kabelak, Mobiliáriu, Artejenatu, Anar, husi Au u'ut ne’ebé bele utiliza ba estrumu no Anar, Kurtina, Sate Kesak no tinan oin sei produs tan Paulitu. Indústria Au bele produs produtu liu rihun ida, maibé iha Timor-Leste foin mak produs produtu 6 no sei ba 7 iha tinan oin,” dehan Diretor Centru Bambu Tibar Sabino Rua ba BT iha nia knaar fatin, Tibar, Kuarta-Feira (10/07).

Maske Dezenvolvimentu Instiuisaun Bambu la’o ho dezafiu oin-oin hahú husi tinan 2005 ne’ebé mai ho hanoin ida hakarak produtu Au nakfilak ba iha Au-Kabelak hodi fornese ba iha sentru karpintaria sira maibe ikus mai la realiza tanba lakon hodi kompete ho Ai-Kabelak sira ne’ebé mai husi Ai-Teka nomos Ai sira seluk tanba presu baratu liu kompara ho Au.

Tan ne’e iha tinan 2005 depois harii Instiuisaun Bambu tenke paradu ba operasaun ho rajaun Timor-Leste hasoru problema boot iha rai laran hanesan krize politika iha tinan 2006 fo afeitasaun ba dezenvolvimentu Centru refere tanba ne’e tenke paradu atu halo produsaun, la’ós ne’e deit maibe Centru refere mos hasoru problema Finanseiru inklui Rekursu Humanu oinsa bele dezenvolve Au sai produtu ida ne’ebé bele reprezenta produtu origin Timor-Leste nian.

Maske Centru Bambu harii iha momentu ne’eba sei lakon atu kompete ho nasaun dezenvolvidu sira hanesan Amerika nomos nasaun Xina nia produtu sira ne’ebé produs husi Au hodi importa mai iha Timor-Leste tanba seidauk iha koñesimentu di’ak hodi bele transforma Au ba produtu Mobiliariu hodi bele hetan rendimentu ne’ebé di’ak.

Diretór Ezekutivu Centru Bambu Tibar Sabino Rua konta tuir katak bainhira nasaun Timor-Leste hasoru krize iha tinan 2005 ne’ebé afeta ba Centro Bambu kuaze tinan 3 resin abandona maibe tanba indústria Au nu’udar indústria ida ne’ebé di’ak tebes tanba hetan apoiu ekipamentus balun husi organizasaun Internasional hanesan United Nation Industry Development Organization (UNIDO), nune’e konsege husu Governu atu proteje ekipamentus sira ne’ebé mak sira apoiu ba iha Centru ne’e.

“Ida nee sai responsabilidade boot ida atu bele rehabilita tiha fatin hodi bele salva guarda ba mákina sira hodi bele utiliza ba operasaun produsaun, no iha tinan 2009 hahú hala’o operasaun husi membru nain 4 no hanoin rekruta tan pesoál balun tan no hamutuk iha traballadór 12.

Nu’udar faze preparasaun iha tinan 2009 to’o 2010 hodi prepara kapasitasaun no formasaun ba traballadór sira no ikus mai iha tinan 2011 iha preparasaun massal sai medium tuir kbiit ne’ebé mak iha hodi hatudu rezultadu pozitivu tanba iha kliente balun ne’ebé mak hahú mai sosa produtu Bambu,” haktuir Diretór Centro Bambu Tibar.

Hare ba dezenvolvimentu Indústria Au ne’ebé kontinua hatudu nia progresu liu-liu iha produtu no kualidade tan ne’e iha tinan 2014 liu husi Primeiru Ministru Xanana Gusmão hodi rekomenda ba Ministru Ekonomia no Dezenvolvimentu ne’ebé iha momentu ne’e João Goncalves hodi halo renegosia ho UNIDO ne’ebé momentu ne’e apoiu Centru Bambu hanesan projetu pilotu hodi bele funsiona fila fali.

Tan ne’e iha momentu ne’e kedas konsege aprovasaun husi Governu Timor-Leste liu husi Konsellu Ministru hodi aprova estatutu ba Centru Bambu nu’udar Instituisaun Publiku iha Timor-Leste.

“IV Governu konstitusionál ne’ebé lidera husi Primeiru Ministru Kay Rala Xanana Gusmão iha inisiativa hodi rekomenda ba Ministru Ekonomia no Dezenvolvimentu João Gonçalves atu renegosiasaun ho UNIDO nu’udar projetu pilotu ida, bainhira hatudu duni rezultadu pozitivu, UNIDO informa ba Governu Timor-Leste katak iha mákina produsaun balun ne’ebé mak sosa no oras nee preparadu ona no Iha tinan 2014 Institutu Bambu reativa fali bainhira hetan estatutu espesiál liu husi IV Governu konstitusionál liu husi Konsellu Ministru,” dehan Sabino.

Maske statutu Centru Bambu hetan iha tinan 2014 maibe iha tinan 2009-20013 konsege hetan reseita ne’ebé mak di’ak tuir demanda husi kliente sira liu-liu Ajensia Internasional sira ne’ebé servisu iha Timor-Leste. “Iha inisiu tinan 2009 hahú rekolla ona reseita mais ou menus liu $1.000.00 sosa husi GIZ no hahú husi espasu hodi hetan reseita to’o $2.000.00 no to’o ba $3.000.00 no ikus mai hetan reseita bot tuir demanda aas husi kliente sira,” katak nia.

Nia haktuir maske antes ne’e tuir planu Centru Bambu nian atu produs deit Au-Nakfilak ba Ai-Kabelak maibe haree fila fali ba polítika refere la responde ho situasaun ne’ebé iha Timor-Leste, hodi muda estratejia hodi transforma Au ba indústria Mobiliariu. Tanba estratéjia ne’e konsege hatudu mudansa iha Centru Bambu tanba hahú hetan apresiasaun husi sosa nain sira liu-liu Ajensia Internasional sira ne’ebé hala’o sira nia knar iha Timor-Leste.

“Bainhira hatudu duni kriatividade ida pozitivu no fó fiar ba kliente sira hodi mai sosa produtu no aumenta rendimentu ho di’ak no ikus mai rekruta tan traballadór hamutuk 63 ne’ebé mak oras ne’e ativu ona serbisu iha ne’e,” dehan nia.

Hahú Establese Grupu Parseiru 12 iha Munisipiu
Alende ne’e haree husi dezenvolvimentu Au ne’ebé Centru Bambu transforma lori mós benefisiu direita ba povu sira iha Munisipiu ne’ebé mak pontesial ba produtu Au tanba liu husi transformasaun refere Centru Bambu Tibar konsege kria nia parseiru liu husi Grupu ne’ebé mai husi povu sira prepara Au hodi fornese ba iha Centru refere.

Ohin loron iha ona Grupu 12 ne’ebé ejiste iha Munisipiu la’ós ba munisipiu hotu-hotu maibe ba munisipiu sira ne’ebé pontensial ba Au inklui fornese Au ne’ebé ho folin baratu. Diretor ezekutivu Centru Bambu Tibar Sabino Rua hateten Grupu sira ne’ebé Centru Bambu establese kompostu husi Feto Mane kada Grupu mínimu ema nain 5 no másimu ema nain 10 ne’ebé mak servisu hodi fornese Au rifas ba Centru Tibar.

“Atualmente Institutu Bambu mós kria ona Grupu parseiru hamutuk 12 ne’ebé espalla iha komunidade sira hodi prepara Au no fornese mai iha Institutu Bambu ho modelu Ripas no ikus mai iha duni planu hodi realiza desentraliza atu fó mós oportunidade serbisu ba Grupu iha munisípiu sira atu bele mós partisipa iha serbisu ida ne’e, munisípiu Aileu Maurusa mak sai primeiru munisípiu ne’ebé hetan fiar hodi fornese Au-Betun mai no hetan duni susesu no to’o ohin loron eziste nafatin, Alende nee iha mós munisípiu hodi fornese matéria prima hanesan iha Venilale, Baucau, Viqueque, Aileu, Likisá Fatuhesi, Ainaru, Same, Manatutu,” klarifika nia.

Nia afirma katak indústria Au ne’ebé iha oras ne’e povu mak sai benifisiariu direitamente tanba bele fornese Au rifas inklui mos habarak nia volume plantasaun hodi nune’e iha futuru sai indústria ida ne’ebé mak boot iha Timor-Leste. Oras ne’e dadaun total plantasaun ne’ebé Grupu agrikultura sira kuda liu ona hetares rihun atus ida ho total Au hamutuk rihun hatnulu (40.000) maibe husi numeru refere 25% mak la uza ho rajaun hetan estragus husi Animal sira maibe 75% aseguradu.

Nune’e husi dezenvolvimentu Au ne’ebé iha konsege hetan apoiu maka’as husi parseiru dezenvolvimentu sira ne’ebé ohin loron iha Timor-Leste tanba parseiru dezenvolvimentu sira nia haree katak indústria refere fo benifisiu direita ba povu sira iha baze. Nia infroma katak husi produsaun ne’ebé iha Centru Bambu seidauk iha planu atu halo esportasaun ba iha merkadu Internasional maibe sei responde dahuluk iha Merkadu rai laran hafoin bele halo esportasaun. (BT)