DÍLI----Ohin loron mundu hahú moris iha era Globalizasaun no Modernu, sistema teknolojia hahú buras no dezenvolve maka’as iha mundu no fasil tebes ba ema atu uza hodi hala’o atividade oin-oin inklui atividade negósiu ne’ebé bele fó rendimentu.

Ema barak mós ohin loron lakohi lakon tempu hodi ba kompras (sosa) sira ninia presiza iha Loja ka Supermerkadu sira no utiliza sira nia tempu barak liu hodi asesu ba internet no hodi hameno (pesan) sasán ne’ebé sira presiza no gosta liu hosi de’it sira ninia Telemovel bainhira tama iha aplikasaun sira hanesan Facebook, WhatsApp, Instragram no Aplikasaun sira seluktan.

Utilizasaun Sistema Teknolojia iha nia vantajen mak sei hamenus ema nomós uza ema nia forsa atu bele halo servisu ruma no uza Teknolojia hotu mak servisu maibé nia des vantajen mak sei aumenta númeru dezempregu inklui mós bele hamosu mafia tanba servisu hotu sira uza iha negósiu ho sistema Online.

Husi sistema Online bele lori dezastre boot ba iha nasaun tanba dala ruma sira halo negósiu (bisnis) la hetan lisensa hodi kria dezastre boot ba iha nasaun hanesan hamenus taxa inklui mós hasa’e númeru Dezempregu iha nasaun ida.

Hare husi uza sistema negósiu Online ohin loron la’o namanas iha Mundu tantu nasaun dezenvolvidu sira hanesan Amerika, Xina, Rusia inklui mós nasaun sira seluk.

Bisnis Online dezenvolve husi Nasaun Dezenvolvidu sira hodi invade nasaun sira ne’ebé foin dezenvolve liu hanesan Timor-Leste, tanba Timor-Leste nudar Nasaun ne’ebé foin dezenvolve no adapta sistem Merkadu Livre hodi loke livre ema husi nasaun ne’ebé deit bele halo sira nia atividade negósiu iha Timor-Leste.

Haree husi hahalok refere hahú mosu preokupasaun ba Timoroan sira ne’ebé hola parte mós iha atividade Negósiu ne’ebé durante ne’e fó kontribuisaun ba dezenvolvimentu nasaun nian hanesan kria kampu servisu ba timoroan inklui mós selu taxa ba iha Estadu Timor-Leste.

Diretora Jacinto Departament Store Claricia Lay hateten katak tuir esperiénsia durante ne’e sira haree iha Timor-Leste ema barak mak utilize negósiu Online maibé iha negósiu online Balun la merese atu utilize iha TL hodi hamate negósiu ki’ik sira iha rai laran.

“Durante tuir espriensia haree katak agora hotu-hotu iha Online, Mai Online iha buat balun bele Online no iha buat balun la’ós bele naran Online tanba hanesan ema estranjeiru mai loke bisnis ka halo negósiu ki’ik hanesan oho animal iha Timor uja Online, ida ne’e bele hamate negósiu ki’ik iha rai laran,” dehan Diretora Jacinto Departamentu Store Claricia Lay ba BT iha nia knar fatin Kuluhun (Dili), Segundu-Feira (27/05).

Nia esplika katak haree husi emprezariu husi nasaun Estranjeiru hanesan Xina, India, Filipina ne’ebé mai halo atividade negósiu iha Timor-Leste barak mak hahú uza Teknolojia hodi halo sira nia negósiu iha Timor-Leste.

Husi Online ne’ebé sira utiliza liu husi grupu hanesan Rede Facebook, Whatsap, Instagram, hodi halo negósiu balun ne’ebé mak la merese atu uza iha Timor-Leste, maibé tanba Timor-Leste uza Sistema Adaptasaun Merkadu Livre hodi kria dezastre refere iha país foun ne’ebé foin independénsia ne’e.

“Agora Xineza sira kria grupu ne’e atu halo bisnis Online hanesan oho Karau, oho Bibi fa’an tuir Online deit ba sira nia maluk Xineza sira, Xina sira oho Fahi, oho Manu, oho Karau saida de’it, Ikan hotu ka saida deit ne’e mesak sira nian deit tanba realidade hau gabun iha grupu balun iha ne’e,” dehan Claricia Lay.

Nia dehan grupu Online ne’ebé mak oras ne’e nia identifika Besik atus Lima Nulu resin mak lao iha Timor-Leste maibé maioria mai husi Xina. Claricia Konsidera aktu refere sidadaun estranjeiru halo la’o tuir sistema ne’ebé mak Timor-Leste iha maibé sira halo tuir sira nia hakarak tanba impaktu husi kontrolu Governu nia ba iha Negósiu Online ne’ebé oras ne’e buras iha Timor-Leste.

“Sei oho Karau, Fahi, Bibi ba han ne’e buat ketak ida, mais sei oho atu fa’an liu husi Online ne’e dilaran tanba saida? tanba fo serbisu ba ema ka lae? selu taxa ka lae? depois iha seguransa sosial ka lae? iha aluga fatin, buat hotu livre laiha lei ida atu bandu ne’e ha’u sente la satisfeita ho buat ida ne’e, buat sira hanesan ne’e tenke halo kontrolu,” rekomenda eis vise Prezidente CCI-TL ne’e.

Nia halo komparasaun katak ohin loron iha Timor Xina sira la uza taxi ne’ebé Timor Leste iha maibé sira uza de’it online hodi bolu kareta ne’ebé sira uza, inklui mós sira la hola produtu ne’ebé mak Timoroan sira fa’an nomós konsume produtu ne’ebé mak sira kuda nomós mai husi sira nia nasaun.

“Se kuandu ema husi Xina mai halo ninian, ema husi India mai halo ninian, husi Filipina mai halo ninian tuir nia hakarak halo arbiru entaun Timoroan ne’ebé mak loke Loja no Supermerkadu fa’an na’an hanesan na’an Karau, na’an Bibi depois fa’an na’an iha merkadu sira ne’e, ema bele ba hola ka lae, tanba hanesan agora komesa akontese Online ne’e ema hotu oho animal depois liu husi Online de’it entaun ne’e ema sei la hola iha loja ho Supermerkadu ne’e,” katak nian.

Hahalok ne’ebé husi sidadaun Xineza sira halo nudar hahalok ida hodi oho produtu lokal iha Timor-Leste tanba sira mai halo tuir sira nia hakarak, tanba ne’e husu ba Governu Timor-Leste tenke kuidadu no halo kontrola didiak ba problema refere. Tan ne’e bainhira laiha kontrolu mak sei fo impaktu ba iha folin produtu lokal inklui mos sei hamate produtu lokal ne’ebé iha.

Claricia mos hateten katak la’ós de’it Online implementa ba iha sosa sasán hanesan naan de’it maibé mós ohin loron Xina hahú uza transporte Online hodi tama iha area aeroportu Internasional hodi tula sira nia emar sira bainhira to’o iha Timor-Leste inklui mós loke ajensia Travel ba turista sira rasik.

Nia mós konsidera katak aktu ne’ebé Xina uza konsidera hanesan Timor nudár lixu ba sira no to’o ohin loron la respeitu sistema no lei ne’ebé Timor Leste iha. “Tanba ne’e hau sente lamenta ho but sira hanesan ne’e, i nune’e bele hamate emprezariu timoroan tanba iha fatin hau ba merkadu ema ladun hola ona ternyata sira uja Online deit lansung ba direita iha sira nia maluk Xineza sira nia uma, tanba ne’e Governu presiza fó Atensaun ba Ema Estranjeiru loke bisnis Online,” salienta emprezaria timoroan ne’e.

Nia mos husu Governu atu bele kontrolu ba sidadaun sira ne’ebé mak mai iha Timor-Leste oinsa visa Turista nomos Investor labele fo oportunidade ba ema hodi halo negósiu ne’ebé mak la merese hodi taka dalan ba povu ki’ik sira ne’ebé mak hadau sira nia Moris.

Negósiu online hafanu Timoroan
Relasiona negósiu Online ne’ebé ohin loron buras iha Timor-Leste, tuir Reitor Universidade Da Paz (UNPAZ) Lucas Da Costa hateten katak iha vantajen n nomos des vantajen, nia vantajen mak hodi hafanu Timoroan sira Oinsá bele iha hanoin dezenvolve negósiu liu husi Online iha futuru.

Nia dehan liu husi Tranzasaun no sistema online ne’ebé mak sidadaun estranjeiru sira halo iha Timor lakontra lei maibe Timoroan mak lakohi atu dezenvolve uza negósiu Online ne’ebé ohin loron koñesidu iha mundu.

“Sidadaun estranjeiru sira rasik halo sistema Online, produtu sira ne’ebé sira fan mak hanesan Naan Karau, Naan Fahi ne’ebé sira uza sistema Online hodi asesu deit, ida ne’e sai hanesan dezafius ida ba Timoroan sira nia direitu,” dehan Reitor Universidade da Paz (UNPAZ) Lucas da Costa ba BT iha nia knar Fatin, UNPAZ, Manleuana Tersa-Feira (28/05).

Nia esplika katak sistema negosiu Online ne’ebé ohin loron buras sai matadalan ida ba iha Timoroan sira atu bele book an bele implementa iha sira nia negósiu.

“Hanesan Timoroan presiza book aan agora hodi kapasita ita nia a’an liu husi sisteme sira ne’ebé iha hodi hasa’e ita nia koñesementu atu nune Timoroan mós bele iha kapasidade kona negósiu ou bisnis online nian iha ita nia rai rasik,” katak nia.

Nia afirma katak sistema Bisnis Online ne’ebé Xineza sira uza iha Timor-Leste ba iha Faan Naan laos signifika sira lori Animal husi nasaun seluk maibe sira hola fali naan husi Timoroan sira hafoin sira uza negósiu online hodi faan tutan fali ba sira nia maluk sira ne’ebé mak oras ne’e hela iha Timor-Leste maibe Timoroan sira kontinua hetan benifisiu.

Alende ne’e iha biban seluk Retor Universidade Dili (UNDIL) Jose Bello Pereira afirma katak negósiu Online ne’ebé sidadaun Estranjeiru sira uza la fó benefisiu ba iha timoroan sira nomós lori impaktu boot ba iha nasaun Timor-Leste. Nia dehan maske negosiu Online buras hakarak ka lakohi Timor-Leste tenke simu tanba ohin loron mundu moris iha erra Teknolojia inklui Timor-Leste mós adapta merkadu livre iha rejiaun Asean.

“Agora ita moris ona ho erra teknolojia no merskadu livre tanba ne’e sistema sira ne’e mosu, relata tan katak hakarak ka lakoi hanesan timoroan ita presiza tetu no simu, Tanba Timor-Leste rasik sedauk iha ekipametus sira ne’ebé mak preparadu tanba ne’e mak sai hanesan difikuldade ba ita nia timoroan sira”, informa nia. (BT)