DÍLI----Tuir Diretor Servisu Registu no Verifikasaun Emprezarial (SERVE) Florenco Sanches hateten katak ba sira ne’ebe halao kualker atividade iha Timor-Leste la hetan legalidade husi Governu mak sei hetan sansaun husi Governu ka Estadu.

Nia dehan ba publiku ne’ebe halao atividade Negosiu, Investimentu presiza halo registu hodi bele hetan legalidade husi Governu no bainhira la halo registu mak hetan no kaer sei selu multa ba Governu ho osan ho valor $50 ba leten tuir Atividade ne’ebe mak iha.

“Hakarak informa katak, ba sira ne’ebe mak agora dadaun halo atividade Online iha Timor-Leste presiza halo registu atu nune labele difikulta ba atividades ne’ebe ita boot sira iha, Atividade Online sira ne’ebe sen regista ida ne’e sei hetan penalidade husi SERVE ho montante $50,” dehan diretor SERVE Florenco Sanches ba BT iha nia knar fatin Kaikoli, Dili, Kuart-Feira (30/05).

Nia esplika tuir lei Tributariu ba numeru 8/2018 katak, se deit mak halão atividade comersiu, empreza no investimentu sen regista no la hetan sertifikadu ou konta ba atividade mak sei hetan sansaun hanesan.

“Iha lei Tributariu numeru 8/2018 ne’ebe iha hare kona-ba atividades hotu ne’ebe mak durante ne’e lao iha Timor-Leste sen regista ida ne’e sei hetan mos sansaun husi Ministeru Finansa liuhusi Dirasaun Geral Impostu nian mak sei fo sansaun ba iha atividades sira ne’ebe mak sein regista bazeia ba Lei Tributariu ne’ebé iha,” katak nia.

Nia klarifika katak Ministeriu Financas liuhusi Diresaun Servisu Registu no Verifikasaun Emprezarial (SERVE) to’o ohin loron konsege registu kompañia Nasional no internasional hamutuk rihun 225.

Tuir Diretor SERVE Florenco Sanches hateten katak husi numeru ne’ebe SERVE registu porsentu 90 nudar kompana Nasional. “Iha kompañia nasional no internasional ne’ebe mak hamutuk rihun ruanulu resin lima ne’ebe mak oras ne’e adopta iha Timor, maibe husi kompañia 225 ne’ebe mak iha kompañia nasional iha 90% maibe minimu liu ba kompañia internasional ne’ebe to agora ho numeru ne’ebe kiik no porsentu ne’ebe ladun boot,” dehan Diretor SERVE.

Nia informa katak husu kompañia sira ne’ebe registu sira nia kompañia hodi halão atividade iha Timor-Leste bazeia ba dekretu lei no 34/2017. Kompañia hamutuk porsentu 44 halai liu ba kontruksaun.

Alende ne’e mos tuir diretor SERVE katak husu numeru ne’ebe kompañia sira halo registu iha SERVE porsentu 44 mak halai liu ba iha area kontruksaun maske iha area kontruksaun ladun fo vantagen ba iha vida ekonomia nasaun nomos vida emprezariu rasik.

Maske area kontruksaun laos rendimentu ida ne’ebe metin ba futuru maibe nudar nasaun ne’ebé foun ema barak loke kompañia hodi halai liu ba kontruksaun. “Wainhira se deit mak atu halo atividade negosiu ruma karik presiza hare no analiza didiak atu nune atividade ne’e sai atividade ida ne’ebe mak produtivu nune bele fo benefisiu ba Timoroan sira ne’ebé mak atu servisu no haburas liu tan vida ekonomia no empreza,” katak nia.

Tan ne’e nia husu ba Timoroan sira ne’ebe hakarak atu halao atividade labele fokus liu ba area kontruksaun maibe tenke hare mos iha area seluk hanesan Agrikultura, Turismu no Peska. “Hare ba hahalok ne’ebe mak emprezariu sira foti hanesan atividade konstrusaun sira, tanba ne’e husu Governu atu foti meus ida atu fo hanoin ba emprezariu sira ne’ebe mak iha Timor atu hadok aan husi atividades konstrusaun,” dehan Florenco Sanches.

Nia mos informa katak ohin loron SERVE mos servisu hamutuk ho Banku Mundial hodi fo hanoin ba emprezariu sira atu tau peoridade ba area produrivu hanesan Agrikultura no Turismu tan ida ne’e sei fo benifisiu ba dezenvolvimentu Nasional iha futuru. (BT)