DÍLI----Investimentu ba Projetu Tasi Mane sei presiza orsamentu boot hodi investe iha setór infrastrutura ne’ebé tuir kalkulasaun bele presiza orsamentu to’o billaun $21 resin.

Eis deputadu no Advogadu Manuel Tilman hateten Timor Leste ohin loron ho komitmentu ida ne’eb’e boot no firme atu lori kadoras hosi Kampu Greater Sunrise mai prosesa iha Tasi Mane maibe investimentu ida ne’e molok atu hahú presiza orsamentu ida ne’ebé boot tanba fundu minarai nasaun foun ne’e ohin loron iha de’it billiaun $15.8.

“Timor-Leste nia fundu atu halo investimentu (insufsiente) osan la to’o atu halo investimentu tanba Timor-Leste nia fundu mina-rai hela billiaun $15.8 de’it no oinsa Timor-Leste atu halo plata forma ka halo melhoramentu ba Portu Beaçu no oinsa halo refinaria iha Betano hodi dezenvolve mina husi Greater Sunrise nian,” hatete eis deputadu Manuel Tilman ba BT iha nia knaar fatin Praia dos Coqueros (19/03), bainhira husu kona-ba observasaun ninian ba politika governu atu lori kadoras Greater Sunrise mai prosesa iha Tasi Mane.

Tuir nia investementu iha Beaço atu halo de’it plata forma ida hanesan dadauk iha Bayu Undan ka atu halo melhoramentus hadi’a Portu Beaço nian no refinaria ne’e ho kusta kuaze $21 billiaun dolar amerikanu ne’ebé melhoramentu portu rasik de’it. Nia klarifka katak agora halo Refinaria ho Portu ne’e entaun hamutuk $14 billiaun, agora ita nia fundu mina rai ne’e hela de’it $15.8 billoens de Dollar Amerika ne’ebé agora tama tan ba Betanu ne’e hamutuk $7 billoens tan entaun hamutuk $21 billoens de Dollar ona.

Nia dehan dadus hirak mai hosi estimasaun no liu hosi peskiza ne’ebé Timor Gap halo no Timor GAP ninia hanoin ka estudu viabilidade katak Timor Leste Minimu investe ba Greater Sunrise ne’e tenke to’o Billiaun $18. Maibe problema ohin loron mak Timor Leste ninia fundu mina rai ne’e $15.8 billiaun mak iha banku Sentral EUA.

“Komu Maun Bo’ot Xanana dehan katak, tenke ser investe duni para bele reforsa fundu mina-rai porque fundu mina-rai gasta de’it la to’o tinan 2020 ne’e hotu ona, Entaun agora hanoin oinsa para iha fali retornu ne’e fila-fali mai Timor-Leste atu osan ne’e fila fali mai tenke iha investimentu,” dehan nia. Advogadu ne’e fó mós opiniaun katak haree ba fundu mina-rai ne’ebé ohin loron iha de’it billiaun $15 Timor-Leste presiza buka mós dalan seluk.

“Dalan seluk mak ne’e tenke buka osan, osan ne’e iha mundu barak la halimar ema barak mak bele tulun Timor Leste hodi investe no dezenvolve dada pipe line no dezenvolve Greater Sunrise, maibe tenke fahe, kompañia lori nia osan mai investe iha Greater Sunrise tenke fahe osan didi’ak ho sira,” dehan Manuel Tilman.

Maske nune’e Manuel Tilman hatete se mak atu bele deside opsaun sira ne’e so Eis Primeiru Ministru Kay Rala Xanana Gusmão mak atu deside opsaun sira ne’e. “Ita nia fundu mina rai ne’e tuir istoria ida ne’e ka ema sira fiar ita ne’e bele investe liu bilaun $20 I ita presiza bilaun $18 maibe tenke tur hamutuk lai no Maun bo’ot Xanana Gusmão mak tenke deside,” dehan nia.

Iha semana hirak liubá primeiru Ministru Taur Matan Ruak deklara katak Timor-Leste firme no preparadu ona atu dada kadoras hosi mina matan Greater Sunrise mai prosesa iha Timor-Leste liu-liu iha Tasi Mane maske ohin loron ema balun sei kontinua preokupa. PM Taur Matan Ruak hateten Timor-Leste (TL) sei kontinua manán no susesu ba operasaun dada kadoras mai Timor-Leste tanba governu mais preparadu ona dada pipe line mai TL sei fó benefisiu ba ekonomia rai laran.

“Ha’u fiar timor sei kontinua manán no susesu ba operasaun ida ne’e tanba ita prepara an loos ba dada pipe line mai timor komesa esplorasaun to’o finiliza,” dehan PM Taur Matan Ruak ba jornalista sira iha kapela Bidau Leçidere hafoin partisipa Misa Sinza (07/02).

Entretantu antes ne’e Xefe negosiador delimitasaun Fronteira Maritima Kay Rala Xanana Gusmão hatete Timor-Leste kontinua defende dada kadoras Greater Sunrise mai hodi kontribui ba dezenvolvimentu nasaun foun ne’e ninian. Bainhira projetu Tasi Mane la’o ho di’ak iha tinan 2026 Timor-Leste sei fa’an gas ba nasaun sira konsumidór gas. (BT)