DÍLI----Relasiona ho kompañia Kmanek Supermerkadu ne’ebé hakarak fa’an nia asaun (saham), orasne’e dadaun kompañia internasional 3 maka kompete hela atu sosa asaun Kmanek Supermerkadu.

Staf Kmanek Supermerkado Zito Barros hatete, kompañia Kmanek Supermerkadu tuir loloos taka antes ona, maibe agora seidauk.

Tanba sei hein hela negosiasaun hosi kompañia 3 ne’ebé interese atu sosa asaun kompañia Kmanek Supermerkadu, tanba ne’e prosesu negosiasaun lao hela no sei termina iha fulan ne’e.

“Ami nia kompañia tuir loloos taka antes ona, maibe agora seidauk tanba sei hein hela kompañia 3 ne’ebé interese atu sosa asaun Kmanek Supermerkadu nian, ne’e duni oras ne’e dadaun tama hela ba prosesu negosiasaun entre kompañia 3 ho nain ba Kmanek Supermerkadu,” informa Zito ba Jornalista BT iha knaar fatin. 

Nia hatutan, agora dadaun nain ba kompañia Kmanek Supermerkadu sei tetu hela ba presu ne’ebé kompañia 3 atu sosa nia asaun, tanba entre kompañia 3 refere mai ho presu ne’ebé diferenti.

Zito realsa liu tan katak, kompañia 2 seluk sira nia negosiasaun ho Kmanek Supermerkadu remata ona no agora falta deit kompañia 1, tanba kompañia refere desidi katak antes nia atu sosa asaun ida ne’e, nia sei halo lai asesment ba aset Kmanek Supermerkadu hodi survei i depois hosi ne’e maka nia foin hato’o sira nia figura (montante sosa asaun), ne’e duni ho ida ne’e maka to agora Kmanek Supermerkadu seidauk taka, maibe ba kompañia 1 ikus, nia prosesu negosiasaun sei termina iha semana ne’e.

Zito subliña katak, kompañia 2 primeiru to’o agora nain ba Kmanek Supermerkadu seidauk bele foti desizaun, tanba presu ne’ebé sira submete seidauk to’o kalkulasaun Kmanek Supermerkadu nian, maibe besik. Tanba ne’e Kmanek sei hein hela aplikasaun (negosiasaun) hosi kompañia ikus, hosi ida ne’e maka Kmanek foin desidi atu fa’an ba se.

“Ne’e duni ami nia kompañia serteza sei taka, tanba trabalhador 60% maka patraun hapara ona, ne’ebé primeiru hasai to 40% no segundu 20%. Tanba ne’e se prosesu negosiasaun sei nafatin prolonga automatikamente Kmanek sei diminui tan trabalhador sira hodi antinji to 70%, para 30% ne’e tama ba prosesu tranzisaun.

Hodi nune’e ami hirak ne’e (restu-30%) bele halo esplikasasaun konaba lalaok ne’ebé durante ami halo ba kompañia ne’ebé atu sai nain ba Kmanek Supermerkadu, i depois hosi ne’e depende hikas ba managementu foun (kompañia ne’ebé sosa asaun) hakarak kontinua utiliza trabalhador anterior klae, ida ne’e depende sira,” dehan Zito. 

Entertantu konaba presu hira maka kompañia 3 refere atu fó ba Kmanek Supermerkadu, nia dehan ida ne’e segredu tanba ne’e nia la bele fo sai informasaun, maibe jerálmente sira nia aplikasaun kuaze besik ho presu ne’ebé Kmanek termina.

Zito imforma katak, konaba kompañia 3 ne’ebé oras ne’e dadaun iha interese atu sosa asaun Kmanek Supermerkadu, la’ós ema timoroan. Tanba kompañia hirak ne’e mai hosi kompañia internasional.

Entertantu kompañia hirak ne’e nia naran nia la sita, tanba segredu. Total trabalhador ne’ebé Kmanek Supermerkadu iha hamutuk 200 resin, maibe hosi numeru refere Kmanek hapara ona 60%. la inklui ho to’os nain sira iha musipiu sira, ne’ebé hamutuk xefe família 500. (BT)