DÍLI----Bazeia ba karta despaisu husi Governu Timor-Leste liu husi Autoridade Nasional Comunikasaun ba telekomunikasaun sira hodi halo registu ba iha kliente ida-idak tan ne’e kompana Telekomunikasaun Telemor oras ne’e registu kliente atinji ona porsentu 80-82.

Tuir Diretor Jeral Kompana Telemor Tran Van Bang hateten katak bazeia ba despaisu governu nian kompana Telemor konsege esforsu halo registu ba kliente sira atinji ona porsentu 80-82 ba iha kliente sira iha 13 munispiu. 

Tanba Telemor konsege uza meus oin-oin halo registu ba kliente sira liu husi fahe informasaun ba publiku bazeia ba despaisu governu nian hanesan fo informasaun liu husi FB Telemor, Radio, Jornal, Televisaun inklui mos staff Telemor sira ne’ebe mak iha.

“Depois de ami hatene husi politika Governu Timor Leste especial husi ANC tan ne’e Telemor kontinua esforsu hodi halo kontaktu ba sira ne’ebe uza Telemor liu husi Mensagen Media, fo infromasaun liu husi Jornal, Radio, Televisaun, Internet hanesan Facebook Telemor inklui mos ita nia staff sira ba direitamente ba sira tuir politika governu nian kona ba registu Sim card,” dehan Diretor Jeral Kompana Telemor Tran Van Bang ba BT iha nia knar fatin, Timor Plaza Sesta-feira (15/03).

Nia mos esplika katak estratejia primeiru ne’ebe Telemor uza hodi hafasil liu registu kliente mak uza ID ne’ebe mak establese husi kompana Telemor rasik hanesan registu direitamente husi Telefone, nune’e mos Telemor halo kolabolator hodi halo registu direitamente ba kliente Telemor sira rasik.

“Ba sira ne’ebe la registu Telemor laos husik deit maibe Telemor mos liu husi call Center hodi telefone direitamente ba sira ne’ebe la registu hodi asesu ba meus ne’ebe mak Telemor iha,” katak nian. Tan ne’e nia dehan liu husi meus ne’ebe mak durante ne’e kompana Telemor establese konsege halo registu ona ba kliente sira to’o 82% maibe Telemor mos hasoru problema balun liu-liu kona-ba situasaun no kondisaun ne’ebe mak oras ne’e Timor Leste hasoru liu-liu klima rasik.

“Telemor konsege ona halo registu ba kliente sira porsentu 82 maibe Telemor mos hasoru situasaun no kondisaun sira agora dadaun hanesan tempu udan ne’ebe mak susar teb-tebes ba staf Telemor atu hakbesik an ba iha kliente sira iha area rural no remotas,” afirma nian.

Alende ne’e mos nia dehan ba kliente Telemor balun ne’ebe mak to’o oras ne’e seidauk halo registu tanba balun halo viagen ba iha rai estranjeiru maibe Telemor nafatin esforsu atu oinsa bele registu kliente hotu ne’ebe mak iha bazea ba data ne’ebe mak determinadu ona husi ANC, maske tempu ne’e limitadu tebes ba Telemor.

Bainhira BT mos husu kona ba sirkulasaun Sim Card Telemor nian ne’ebe mak oras ne’e publiku balun faan iha dalan inklui mos kios sira diretor geral ne’e esplika katak Sim card sira ne’ebe mak oras ne’e iha uluk kedas tanba seidauk sosa husi publiku inklui mai negosiante sira kontinua faan maibe to’o oras ne’e Telemor rasik hapara ona atu sirkula Sim Card atu faan iha publiku.

Alende ne’e BT mos halo konfirmasaun ba Telekomunikasaun seluk hanesan Telkomsel nomos Timor Telekom kona-ba prosesu registu kliente maibe seidauk hetan resposta husi gestor sira. (BT)