DÍLI----Nasaun ida nia ekonomia forte la’ós mai husi estadu ka governu de’it maibe ekonomia nasaun forte tenke hetan ajuda husi povu sira liu husi ekonomia povu nian ne’ebé forte hodi bele ajuda di’ak liu tan nasaun nia ekonomia sai forte liu tan.

Tuir General Manager Banku Mandiri Banku Mandiri Jan Winston Tambunan katak ekonomia nasaun wainhira la harii husi povu kiik sira no labele mehi atu ekonomia nasaun bele di’ak iha futuru maibe tenke hetan ajuda husi ekonomia povu nian liu – liu harii ekonomia povu tenke sai forte.

“Ha’u dala ruma hasoru malu ho lider nomos ministru sira ha’u sempre dehan harii ekonomia imposibel wainhira la harii husi povu ki’ik sira, tan ne’e labele mehi wainhira nasaun di’ak laiha ajuda husi ekonomia povu nian, maibe tenke ajuda husi ekonomia povu ne’ebé forte tanba agora ita hare iha Televizaun iha Indonesia agora iha Kredit Usah Rakyat (KUR),” dehan General Manager Banku Mandiri Banku Mandiri Jan Winston Tambunan iha nia diskuru wainhira hasoru malu ho Benefisiariu Banku Mandiri iha Munisipiu Ermera Postu Administrativu Gleno Segunda feira (25/02).

Nia dehan kreditu negósiu povu ka Kredit Usaha Rayat tenke mai husi governu oinsá bele haforsa liu tan Povu sira nia ekonomia bele sai forte hodi kontribui ba dezenvolvimentu ekonomia nasaun nian la’o ba oin. Jan Winston Tambunan hateten banku Mandiri esforsu oinsá bele dezenvolve negósiu Mikro iha Timor - Leste nune’e bele haforsa ekonomia povu liu husi fundu ne’ebé mak iha.

Banku mandiri sei esforsu oinsá bele implementa mós programa Fundu Rotativa ne’ebé mak banku Mandiri fornse ba iha CCI- Ermera nune’e bele la’o mos iha munisipiu seluk ne’ebé mak identifikadu hodi bele haforsa ekonomia povu sai forete liu tan no bele kontribui hodi haforsa ekonomia nasaun ninian.

Iha biban seluk Eis prezidente Camara Comersiu Industria Timor Leste (CCI-TL) Rui Castro hateten katak ekonomia Timor Leste povu mak tenke sai nain liu liu iha setór agrikultura iha Timor Leste. “Ita hakarak ekonomia ida ne’ebé forte povu mak tenke sai nain loloos, liu liu iha setór agrikultura, setór setór agrikultura la’ós ba kompañia ida nian, ka ema ida nian maibe povu mak tenke sai nain loloos,” dehan Rui Castro iha Seminara ne’ebé halao iha Salaun Esperansa tersa (26/02).

Nia afirma katak ohin loron iha Timor-Leste Timoroan sira balun hahú sai bainaka ba iha ekonomia iha kapital Dili, tanba hetan domina ona husi ema estranjeiru no rai nain sira hahú sadere ba foho lolon sira. Tan ne’e nia husu ba timoroan sira atu bele iha kreativu no badinan hodi hare ba oportunidade sira ne’ebé mak iha nune’e bele kompete ho negosiante no investór sira husi rai liur.

Alende ne’e tuir publikasaun lao hamutuk ne’ebé BT asesu katak Timor-Leste presiza dezenvolve setór produtívu sira iha rai laran Maske Governu nia relasaun públiku sira sempre hatete katak Timor-Leste nia ekonomia naun petrolíferu aumenta hela, iha realidade maioria kreximentu iha Produtu Interna Brutu (PIB) ‘naun-petrolíferu’ dezde independénsia akontese tanba estadu nia despeza ba konstrusaun ho administrasaun públiku.

Setór sira seluk hanesan telekomunikasaun, vende, ospitalidade, imobiliáriu no transportasaun aumenta uitoan de’it ka tun, no setór produtívu sira hanesan fábrika no agrikultura la iha mudansa dezde 2002 to’o ohin loon. Tanba falta produtividade iha rai laran nune’e, Timor-Leste depende maka’as ba sasán ne’ebé importa husi li’ur entre 2013 to’o 2015, ita importa sasán ho valór liu tokon $500, no esportasaun naun-mina mak la to’o tokon $20, no 95% husi esportasaun mak kafé. Defisit iha komérsiu servisu mak boot liu fali – liu duké $1.5 billaun iha 2014.

Iha publikasaun ne’e hatete maske iha Maibé, defisit komérsiu ne’e la sustentável, tanba Timor-Leste nia ekonomia depende maka’as ba estadu nia gastu orsamentu ne’ebé mak manán husi fa’an mina no gás, maibé reseita husi petrolíferu sei mamuk iha 2021 (no sei tun ba valór ki’ik liu iha 2019).

Aleinde ne’e, saldu iha Fundu Petrolíferu sei lakon billoens de dolar durante tinan sanulu tuir mai tanba Governu sei kontinua halo levantamentu exesivu. Ida ne’e signifika katak Governu tenke ko’a nia despeza lalais iha tinan balun oin mai, entaun osan ne’ebé mak sirkula iha ekonomia sei menus no la bele kontinua selu ba importasaun. 

Tanba Timor-Leste nia impostu ba importasaun mak ki’ik liu ona, La’o Hamutuk haree katak tama iha Orgainzasaun Mundial Komersiu (OMK) no ko’a tarefa sira sei la fó benefísiu ba konsumidór sira tanba sei la iha impaktu boot ba sasán nia folin.

Ema balun hatete katak OMK sei ajuda Timor-Leste atu aumenta ita nia esportasaun, tanba benefísiu ida husi OMK mak hamenus bareira ba komérsiu no nune’e fó oportunidade ba nasaun foin dezenvolve an sira atu esporta sira nia produtu no servisus ba merkadu konsumidór boot iha Norte Globál (nasaun dezenvolvidu sira).

Maibé, problema mak Timor-Leste agora la prodús sasán no servisus barak, tanba ne’e ita bele hetan benefísiu de’it husi asesu ba merkadu iha li’ur se karik ita nia produsaun aumenta lalais no maka’as, maibé se lae difisil liu ba ita atu hetan benefísiu. Tanba ne’e, en vez de tama iha OMK ho mehi katak ita bele esporta produtu ne’ebé seidauk eziste, Timor-Leste urjentemente presiza atu dezenvolve kapasidade produtivu lokál no hamenus ita nia dependénsia ba importasaun liu husi prodús sasán ne’ebé ita uza ba moris loron-loron.

Agrikultura mak esensiál liu ba vida moris ema iha area rurál sira, soberania ai-han, rendimentu no nutrisaun, no mós ita bele dezenvolve indústria ki’ik ho investimentu ne’ebé matenek iha setór estratéjiku sira ho teknolojia husi li’ur, no mós se presiza, bele mós hetan apoiu husi estadu atu proteze no haforsa indústria ne’e. Ida ne’e sei aumenta ita nia skill no kapasidade, kria empregu, hamenus ita nia defisit komérsiu no lori ita ba futuru ne’ebé sustentável liu. (BT)