DÍLI----Banku Mandiri Timor Leste (BMTL) iha tinan 2019 kontinua servisu hamutuk ho Camâra Comércio Indústria Timor Leste (CCI-TL) liu liu Munisipiu Ermera hodi kontinua implementa programa Edukasaun banku Mandiri kona ba oinsá bele motiva populasaun sira iha area negósiu nian hodi bele kontribui ba kresimentu ekonomia Timor Leste.

Ho programa edukasaun banku Mandiri nian ne’ebé servisu hamutuk CCI-TL munisipiu Ermera iha fase Segundu, Mandiri kontinua haboot nia fundu rotasaun inklui mos hasae benefisiariu sira ba projetu pilotu ne’ebé mak lao iha tinan kotuk.

Objetivu banku Mandiri haboot distribuisaun fundu rotasaun ba emprega kiik sira iha Munisipiu Ermera (Gleno) atu oinsá bele ajuda atividade Comersiu sira ne’ebé mak durante ne’e negosiante sira halo hodi bele sai di’ak liu tan, nune’e bele kontribui ba dezenvolvimentu Timor Leste ba iha futuru.

Tuir General Manager Banku Mandiri, Jan Winston Tambunan hateten katak projetu pilotu Fundu rotativa ne’ebé implementa iha Munisipiu Ermera tanba servisu hamutuk entre banku Mandiri nomos CCI- Munisipiu Ermera ho kapital ne’ebé mak relative tebes.

“ Programa ida ne’e lao iha tinan kotuk ne’ebé ho fundu kiik maibe relativu tebes no nia implementasaun di’ak teb-tebes, husi fundu ne’ebé iha ita fo ba ema nain 11 no husi sira ne’e selu fila fali obrigasaun ba banku di’ak tebes tuir orariu ne’ebé no laiha ema ida mak selu macet,”dehan General Manager Banku Mandiri Jan Winston Tambunan iha nia diskursu wainhira hasoru malu ho benefisiariu sira iha salaun enkontru CCI Gleno, Segunda Feira (25/02).

Jan Winston Tambunan esplika katak rezultadu ne’ebé benefisiariu sira hatudu iha tinan kotuk sai orgullu boot ida ba Banku Mandiri hodi fo fiar ba Banku Mandiri mos bele fo fundu ne’ebé boot liu tan ba iha munisipiu Ermera iha tinan ida ne’e. Nia mos afirma katak tuir lolos programa Edukasaun banku mandiri nian ne’ebé oras ne’e fasilita kreditu ba emprega mikro sira nudar prekupasaun Banku Mandiri ba populasaun sira ne’ebé mak ekonomia fraku iha Timor Leste.

Tan ne’e nia dehan ba benefisiariu sira tuir lolos banku Mandiri la aplika jurus kreditu maibe banku Mandiri aplika jurus ho 4% oinsá bele eduka no motiva benefisiariu sira hodi bele halao negósiu fo badinas. “Laiha kreditu ida ne’ebé ho jurus 4% maibe ida ne’e objetivu ami nian ba iha pai ho mae sira,” katak nian.

Tan nia dehan husi fundu ne’ebé banku Mandiri fo no wainhira selu fila fali la’ós ba iha banku Mandiri maibe sei fo fila fali ba negosiate sira ne’ebé sidauk benifisiu ba fundu refere inklui mos empreza sira ne’ebé mak presiza. Nia mos informa katak tuir Planu Banku Mandiri mos sei implementa mos projetu pelotu edukasaun banku Mandiri nian ba munisipiu seluk ne’ebé mak identifika ona.

Tuir Prezidente Camara Comersiu Industria Munisipiu Ermera Luis Alves Timan hateten katak Implementasaun programa fundu Rotativa ne’ebé fornese husi banku Mandiri ba negosiante kiik sira iha munisipiu Erma tanba iha kooperasaun servisu entre Banku Mandiri ho CCI-TL munisipiu Ermera.

Nia dehan Programa Rotasaun ne’e kontinua lao ba fase segundu tanba iha etapa primeiru benefisiariu sira konsege hatudu sira nia hahalok hodi selu fali sira nia obrigasaun ba Banku Mandiri tuir data no tempu ne’ebé mak determina tiha ona.

“Ohin kontinua ba fase segundu tanba negosiatente sira selu tuir duni data ne’ebé mak iha no ohin ita hahú fali ba segundu etapa Banku Mandiri nafatin servisu hamutuk ho CCI Ermera tanba CCI- Ermera nudar ponte hodi fasilita de’it hodi liga legosiante ho banku Mandiri atu oinsá bele hetan kreditu ne’ebé fornese husi Mandiri hodi negosiate sir abele halo sira nia negósiu di’ak liu tan,” dehan Luis.

Nia mos afirma katak ba implementasaun ba etapa segundu la kontinua ba benefisiariu primeiru tanba fundu refere nudar fundu rotativa la’ós ba ema ida de’it maibe tenke apoiu fali ba negosiante sira oinsá bele halo sira nia negósiu bele sucesu. Tan ne’e iha diskursu nia mos husu ba iha benefisiariu sira atu oinsá bele utilize fundu ne’ebé fasilita husi banku Mandiri ho di’ak nune’e labele taka dalan ba iha negosiante sira ne’ebé iha tanba fundu ne’ebé iha nudar kooperasaun entre nasaun rua nian.

Nia mos promote katak CCI Munisipiu Ermera kontinua esforsu servisu hamutuk ho Banku Mandiri inklui instituisaun banku sira seluk hodi bele hare mos ba iha populasaun sira seluk liu liu iha postu administrative sira ne’ebé mak iha Munisipiu Ermera.

“Ita kontinua servisu hamutuk nafatin ho Banku Mandiri inklui ho banku sira seluk hodi bele implementa ba etapa tuir mai maibe etapa tuir mai sei la ita boot sira maibe sei ba iha postu administrativu sira tanba iha Munisipiu Ermera iha populasaun barak nomos postu administrative lima,” katak nian.

Nia mos dehan husi fundu ne’ebé nudar parte ida oinsá bele hakbit setór privadu nia papel hodi bele fo kontribuisaun ba kontruksaun Estadu bele lao di’ak liu tan iha Munisipiu Ermera inklui mos iha Timor Leste. Iha biban hanesan Prezidente CCI-T, Oscar Lima ne’ebé marka prezensa iha eventu refere hato’o orgullu boot ba iha banku Mandiri nomos Prezidente CCI Munisipiu Ermera tanba konsege esforsu hodi apoiu negosiante sira oinsá bele kontribui ba ekonomia nasaun ninian.

“Primeiru ha’u hato’o ha’u nia parabens ba prezidente CCI Munisipiu Ermera ne’ebé mak halao knar ne’ebé di’ak teb-tebes, programa ida ne’e banku Mandiri ho CCI halo kleur ona no uluk Ermera mak hetan duni no segundu Ermera mak hetan nafatin no ida ne’e orggulu boot ida no parabens ba imi Ermera oan sira,” hateten Prezidente CCI-TL Oscar lima.

Prezidente CCI Oscar Lima mos agradese ba banku Mandiri nia servisu hamutuk ho Camara COmersiu Industria Timor Leste (CCI-TL) oinsá bele loke ka fasilita kreditu ba negósiu kiik sira hodi dezenvolve sira nia atividade negósiu iha Timor Leste. Tan ne’e Oscar Lima husu ba Benefisiariu sira atu bele utilize fundu refere ho di’ak hodi bele dezenvolve sira nia negósiu ho kreativu nune’e bele atinji mehi ne’ebé mak iha.

“Tan ne’e ha’u husu ba imi tenke fila liman halo didi’ak, tenke kreativu, tenke halo servisu ho responsabilidade, tanba osan ne’ebé Banku Mandiri fo kapital ida ne’ebé boot tebes maibe uluk ha’u halo ha’u nia negósiu ho osan Rp.30.000 ka $2.50,” hateten nia ba Benefisiariu sira.

Nia mos afirma katak ho jurus ne’ebé banku Mandiri Fornese ba iha Benefisiariu sira ho jurus porsentu 4 sai orgullu boot ida ba iha CCI-TL tanba durante ne’e banku Mandiri sidauk fo ho jurus ne’ebé ho porsentu 4 iha area kreditu nian. Oscar lima mos husu ba iha benefisiariu sira atu bele kuidadu didi’ak ho fundu ne’ebé mak banku Mandiri Fornese hodi nune’e iha future oinsá mai bele fasilita fila fali ba iha kliente sira ne’ebé mak presiza mos fundu ne’ebé mak banku Mandiri iha.

Siha sikun ne’e mos Benefisiariu ba iha Fundu Banku Mandiri Antonio Mau Soares sente orgullu tebes tanba la espera atu bele hetan asesu ba kreditu husi Banku Mandiri tanba kleur ona hatama Dokumentus atu asesu ba Kreditu maibe ikus mais konsege hetan.

“Ha’u sente Orgullu tanba konsege hetan rezultadu maske ami hatama ami nia dokumentus kleur ona no ami la Espera,” katak Antonio.
Tan ne’e nia promote katak sei utilize fundu refere hodi ativu no kreativu hodi kompri ninia obrigasaun ne’ebé mak banku aplika ba sira.
Iha sermonia Lansamentu distribui fundu rotativa Edukasaun banku Mandiri nian hetan prezensa mos husu Administrador Munisipiu Ermera, Autoridade lokal inklui mos populasaun sira seluk. (BT)