DÍLI----Ministra Finansas, Sara Lobo Brites, hasoru Malu ho Primeiru Ministru, Taur Matan Ruak hodi informa kona-ba ezekusaun Orsamentu Jerál Estadu 2019 nia ba kada Ministériál ne’ebé hahu iha loron 18/02/2019 fulan ne’e.

“Ohin ha’u vizita Primeiru Ministru ne’e hodi informa kona-ba ezekuasaun Orsamentu Jerál Estadu 2019 nian ba kada liña Ministériál sira hotu” hateten Ministra Finansas ne’e ba jornalista iha Palasiu Governu Díli (18/02/2019).

Membru Governu ne’e mós aumenta tan katak, Orsamentu Jerál Estadu iha tinan 2019 nian komesa ona ezekuta no ekipa Ministériu Finansas esforsu servisu makas no enkontru ona ho kada Ministériál kona-ba OJE ida refere. “OJE ida ne’e komesa ona ezekuta no ekipa Ministériu Finansas nian halo ona reuniaun ho kada diretór hosi kada Ministériu no hein hodi lansa”, infoma Ministra ne’e.

Entretantu, Ministra ne’e mós haktuir katak, Primeiru Ministru mós sente orgullu tanba bele aselera lalais sistema ida ne’e hodi ema hotu-hotu bele hetan nia direitu. “Primeiru Ministru sente kontenti hodi husu lalais aselera sistema hirak ne’e hodi ema hotu-hotu bele simu ninia salaríu tanba Ministériu balun ne’ebé mak problema hela kona-ba salaríu nian bele ona ezekuta” koa’lia nia.

Aleinde ida ne’e nia mós realsa tan katak, iha fulan ida ne’e funsionariu sira sei la halerik ba salariu tanba sira sei simu tuir data ne’ebé antes ne’e hala’o tiha ona tuir sistema. “Funsionariu sira sei la simu salaríu tarde tanba orsamentu ne’e ezekuta ona, ho ida ne’e sei la iha problema ho salaríu hirak ne’e no salaríu hirak ne’e sei tama ona iha loron 20 ba leten hanesan ne’e, tenik nia bainhira remata hasoru malu ho PM,”.

Antes ne’e funsionariu sira simu salaríu tarde tanba Orsamentu Jerál Estadu 2019 nian ne’ebé iha tempu ne’eba lahetan Promulgasaun hosi Prezidente Repúblika hodi Govenu desidi hodi utiliza sistema Duodesímal ho Osan tokon $95 dollar Amerika, osan hirak ne’e sei uza ba capital dezenvolvimentu, bens servisu, salaríu no vensimentu ba ejizensia estadu durante fulan Fevereiru nian antes Prezidente halo promulgasaun. (BT)