DÍLI----Relasiona ho Orsamento Jeral Do Estado (OJE) 2019 ne’ebé hetan promulga hosi Presideten da Republika, persija tempu atu rekopera krizi setor privadu nian ne’ebe iha.

Presidente AEMTL Hergi Lunha Fernandes Alves hatete, relasiona ho promulgasaun OJE 2019 hosi Presidente da Republika, persija tempu atu rekopera hikas krizi ne’ebé seitor privadu sira hasoru, tanba maioria orsamentu ne’ebé sirkula iha merkadu mai hosi orsamentu do estado, tanba tinan rua nia laran lao ho orsamentu duadesimu afeita tebes ba merkadu, tanba osan menus no rejultadu maka akontese inflasaun barak.

Tanba afeita makas ba kompañia sira nia sale target, hodi ubriga sira injeita sira nia kapital para kobre kustu hirak ne’e, maibe balun la konsege kobre no ikus mai tenki taka sira nia atividade. Ne’e dunik atu hadia fali situasaun hirak ne’e persija tempu maske OJE hetan ona aprova hosi Presidente da Republika, tanba setor privadu sira sei hadia uluk krize ne’ebé antes sira infrenta i depois de ida ne’e maka atividade foin bele lao ba oin.

“Tanba ne’e hosi parte AEMTL nian, ami prepara hela ami nia membru, para oinsa bele iha vizaun inpredoderizmu. atu nune’e kada membru ida minimu liu tenki iha negosiu ida, hodi nune’e bele hare’e diversifikasaun ekonomia para bele iha negosiu ida sustentavel,” dehan Presidente AEMTL Hergi Lunha Fernandes Alves foin lalais ne’e.

Iha fatin hanesan Presidente CCI-TL Oscar Lima sublinha katak, relasiona ho promulgasaun OJE 2019 hosi Presidente da Republika, la signifika atu solusiona 100% ba krizi ne’ebé durante ne’e seitor privadu sira hasoru, tanba balun konsege taka ona sira nia atividade. “maibe desde momentu ita agradese tebes ba Presidente da Republika, tanba bele promulga ona OJE 2019” dehan Oscar.

Ne’e dunik liu hosi promulgasaun OJE 2019, sira hein katak devidas ne’ebé seitor privadu iha, governu bele selu ona. Hodi nune’e bele funsiona fali atividade seitor privadu nian hodi lao normal inklui mos atividade merkadu iha faze bele lao normal, informa Oscar. Tanba ne’e nia husu ba seitor privadu sira kuandu governu selu ona devidas, lalika tauk atu investe nafatin, prontu infrenta iha kualker situasaun hodi berani nafatin sai emprezariu, apela Oscar. (BT)