DÍLI----VIII Governu konstitusional liuhusi reuniaun Konsellu Ministu, rona aprezentasaun husi Banku Central Timor-Leste (BCTL) kona-ba regra atu aplika garantia kréditu hodi bele ajuda empreza kiik sira.

Tuir Ministru Reforma Lejislativa no Asuntu Parlamentar Fidelis Magalhaens katak, aprezentasaun ida ne’e BCTL sei partilla ho banku komersial sira atu fó kréditu ne’ebé ho funan ba emprejáriu sira atu nune’ebé asesu ba kréditu iha área sira ne’ebé durante ne’e banku komersial sira lakohi fó.

“Iha konsellu administrasaun Banku Central aprejenta ba KM kona-ba regulamentu Banku Central nian ida n’ebé kria regra hodi aplika granatia kréditu ne’ebé maka sei fó ajuda ne’ebé boot liu-liu ba empreza kiik sira no empreza médiu sira” dehan nia hafoin enkontru KM iha Palasiu Governu semana ne’e.

Iha aranju ida ne’e Banku Central sei partilla risku ho banku komersial sira atu fó kréditu ne’ebé ho funan di’ak liu ba emprejáriu sira liu-liu negosiante kiik no médiu sira atu nune’e sira mós bele iha asesu ba kréditu iha área sira ne’ebé durante ne’e banku sira lakohi fó impréstimu.

“Ida ne’e eskema garantia kréditu katak BCTL sevisu hamutuk ho banku komersial sira atu bele fó kréditu ne’ebé di’ak liu ba ita nia sidadaun sira tanba banku komersial sira ne’e halo desizaun komersial,” katak nia.

Ministru hatete, desizaun komersial katak, nia halo desizaun ba buat ne’ebé nia hanoin no sei hetan lukro boot liu maibé buat ne’ebe maka BCTL halo agora katak partilla tiha risku ho banku hirak ne’e atu nune’e banku sira ne’e bele fó kréditu iha área sira ne’ebé maka konsidera hanesan prioridade dezenvolvimentu.

“Talvez komersialamente la fó juro ne’ebé boot maibé BCTL enkoraja sira investe iha ne’ebá no BCTL mós ho inisiativa ida ne’e sei hatun funan husi kréditu sira ne’ebé banku komersial sira sei fó,” nia informa. Kréditu iha mekanismu skema BCTL sei konpartilasimu tanba ne’e maka bolu garanti kréditu atu nune’e bele halo dezenvolvimentu ne’e ba oin. (BT)