DÍLI----VIII Governu Timor-Leste ne’ebe lidera husi Xefe Governu Taur Matan Ruak foin lalais ne’e liu husi enkontru Konsellu Ministru (KM) aprova ona investimentu kompañia operador telekomunikasaun ne’ebé hanaran Ceslink nu’udar kompañia nasional telekomunikasaun atu bele halo operasaun iha Timor-Leste.

Tuir Ministru Reforma Lejislativa no Asuntu Parlamentar Fidelis Magalhães katak, KM halo análiza ba aprezentasaun husi kompañia operador telekomunikasaun ne’ebé hanaran Ceselink ne’ebé nu’udar kompañia nasional ne’ebe interese halo investimentu iha Telekomunikasaun hodi kompete ho Telekomunikasaun seluk hanesan Telemor, Telkomsel inklui mos Timor Telekom.

“KM mós aprova sira nia partisipasaun iha área telekomunikasaun iha rai laran ida ne’e kompañia ida ne’ebé kompostu parte husi timor oan,” dehan nia hafoin enkontru KM iha Palasiu Governu semana ne’e. Ho nune’e investor konsorsiu Salvador Oka D,tel Salavador Henrique “Mahoka” hatete, nia ho nia ekipa halo ona aprezentasaun ba governu no hein desizaun husi ezekutivu sira.

“Ami halo ona aprezentasaun Ceslink no Oka D,tel nian hanesan operador telekomunikasaun agora hein de’it rezultadu,” dehan nia. Nia infroma katak investimentu telekomunikasaun ne’e ho montante osan miliaun $21 halo faze rua, ida miliaun $8 ne’ebe sira gasta ona miliaun $5 ba material sira monta iha fatin hotu no hein operasaun.

“Antena ami monta kobre iha Díli laran hotu ba distritu maka seidauk tanba prosesu ne’e tuir faze. Tanba ne’e kuandu iha ona rezultadu husi KM ami bele hala’o servisu,” dehan nia. Iha Fatin hanesan Jerente Ceslink Moníz Maia hatutan tan katak, investimentu ne’e iha kompañia rua Ceslink hanesan operador telekomunikasaun no Oka D,tel hanesan kompañia investor ne’ebé responsável husi Mauhoka rasik hanesan investor úniku ba estabelisimentu Ceslink iha Timor-Leste.

Nia hatete sira nia parte iha ona planu atu kobre teritóriu maske agora hahu kobre deít iha kapital Díli. “Ami nia planu iha roteiru prepara infrasaturtura iha tinan 4 no lalais liu tinan rua ne’e bele kobre ona teritóriu maibé agora iha Díli laran infrasturtura ba telekomunikasaun prontu ona atu halo operasaun karik hetan ona aprovasau husi Konsellu Ministru,” Nia mós hatete karik iha ona desizaun bele hahu ona prosesu ho Autoridade Nasional Komunikasaun (ANC) hafoin halo lansamentu. (BT)