DÍLI----Kompañia Kredit Cooperation Internasional prontu fo kreditu ba Kompañia timoroan sira ho sistema ne’ebé diferenti ho sistema banku.

Dirètor Kompañia Kredit Cooperation Internasional Cristopher Durman hatete, objektivu hosi inkontru ida ne’e atu introdus sira nia kompañia Credit Cooperasaun ba membru CCI-TL sira hotu, tanba sira hakarak oferese kreditu ba kompañia timoroan sira ne’ebé ejisti ona iha Timor ho jurus ne’ebé diferenti ho Banku sira.

“Ami nia kompañia nia diferenti kreditu ho banku sira barak tebes, maibe diferenti liu maka banku sempre halo deposito ba customer, maibe ami la uja ida ne’e tanba fokus liu ba kreditu,” dehan Cris ba Jornalista BT wainhira remata enkontru ho CCI-TL iha edifisiu CCI-TL, Sesta-Feira (22/02).

Cris hatutan, konaba jurus kreditu kada banku sempre iha diferente tanba ne’e sira husu ba kliente sira atu husu kotasaun direitamente ba sira, hodi nune’e bele hatene klean liu kona-ba montante jurus ne’e rasik.

Ne’e dunik jurus hosi 15 pusentus ne’e rasik sira sei la konta ho kustu sira seluk, maibe sira fo depende hosi kompañia sira nia persija (montante kreditu), tanba ne’e jurus refere la 100% depende ba jurus 15%, tanba jurus ne’e rasik sei aplika depende hosi montante kreditu, esplika Dirètor.

Cris realsa katak, hosi kreditu ne’e rasik Kompañia Kredit Cooperation sei fo kreditu minimu liu maka $50,000.00, maibe ba kreditu masimu depende hosi projetu kliente nian, tanba sira sei observa i depois maka foin fo kreditu tuir projetu (montante) ne’ebé kliente sira atu implementa. Entertantu ba kreditu ne’e rasik laos sira fo deit osan, maibe bele fo mos kreditu ba ekipamentus tuir nesesidade kompañia nian. Entertantu Kompañia Kredit Kooperation ejisti ona iha 2017.

Iha fatin Presidente CCI-TL Oscar Lima sublinha katak, CCI-TL nia papel maka oinsa atu buka fasilidade ba emprezariu sira, ne’e dunik ida ne’e hanesan servisu ida ne’ebé CCI-TL halo ho parseiru sira, para oinsa bele fasilita servisu ba emprezariu.

Ne’e dunik kreditu ida ne’ebé kompañia kredit Cooperation internasional atu oferese ba kompañia timoroan sira ne’e, hanesan meus ida para fasilita servisu emprezariu sira nian. tanba ne’e tuir nia hare’e ida ne’e espasu diak tebes para emprezariu sira bele dezenvolve liu tan sira nia atividade, dehan Oscar.

Entertantu iha fatin hanesan Dirètor Kompañia Nova Casa Fresca Hergi Lunha Fernandes Alves akresenta katak, tuir nia hare’e ida ne’e pasu importante tebes tanba problema ne’ebé durante emprezariu sira hasoru maka asesu ba kapital finanseiru, ne’e dunik opsaun ida ne’e bele ajuda ona setor privadu sira hodi diversifika sira nia atividade ekonomia inklui hanesan mos alternativo ida hodi asesu ba kapital finanseiru.

Tuir nia sistema kreditu hosi Kompañia Kredit Cooperation International la diferenti dok liu ho banku sira, tanba uja mos sistema kolatoral. Maibe sira nia interese maka a’as tanba prontu foti risku no prosesu aplikasaun fasil liu duke banku. Maibe hanesan ema timoroan nia prefere liu kreditu iha banku nasional sira, duke instituisaun hosi liur.

Tanba se banku nasional osan refere sei kontinua sirkula iha rai laran. Maibe hanesan seitor privadu nia sei hare’e oportunidade ne’ebé iha, para bele asesu ba kapital finanseiru ne’e, tenik Hergi. (BT)