DÍLI----Governu garante orsamentu 2019 sei aumenta liután ritmu dezenvolvimentu no sei fó esperansa fila fali ba merkadu, investor sira, atu nune’e hotu-hotu bele servisu no lori kresimentu ekonomia ne’ebé di’ak no kualidade ba nasaun foun Timor-Leste.

Relasiona ho Orsamentu Jeral Estadu (OJE) tinan 2019 nian ne’ebé hetan promulgasaun husi Presidente Repúblika Francisco Guterres Lu-Olo iha semana kotuk liubá, governu garante ho promulagasaun ne’e bele rekopera kresimentu ekonomia ne’ebé durante ne’e tun.

Ministru Reforma Lejislativa no Asuntu Parlamentar, Fidelis Magalhães katak, esforsu boot ida governu halo tiha ona dahuluk halo transferensia ba osan $140 milhoens hodi sustenta nafatin funsionamentu mákina estadu ne’e hatun husi fundu minarai no governu mós konsege sai husi rejime duodecimal antes ne’e ho OJE 2018.

Nia dehan, baihira sai husi rejime duodecimal tama ba rejime orsamentu normal agora iha tinan 2019 tama fali tan ba rejime duodecimal iha fulan janeiru nian. “Agora ho promulgasaun ne’e agora ba fali ona rejime normal tanba ita bele dehan tinan fiskal normal no resiklu normal ba OJE,” dehan Fidelis ba BT hafoin ekontru Konsellu Ministru iha Palacio Governo, kinta 14/02.

Ministru ne’e hatete, governu fiar katak, sei auemta liu tan ritmu dezenvolvimentu no sei fó esperansa fila fali ba merkadu, investor sira, atu nune’e hotu-hotu bele servisu no lori kresimentu ekonomia ne’ebé di’ak liuhusi kualidade.

“Governu nia dever atu garante iha dezenvolvimentu ida ne’ebé di’ak no fó benefisiu ba sidadaun hotu-hotu se governu ida labele garante ida ne’e entaun la’ós governu ida ne’ebé di’ak tanba ne’e tenke assume responsabilidade konstitusional atu hadia populasaun nia moris,” katak nia.

Entretantu Ministra Finanasas Intersina, Sara Lobo Brites hatete, agora dadauk finanansa prepara hodi instala hela sistema no prepara dekretu ezekusaun no hein katak iha semana ne’e bele loke ona ba Minisitériu sira hodi halo ezekusaun.

“DOT ita uza bainhira orsamentu seidauk promulga maibé bainhira promulga ona automátikamente duodésimu ba fulan Fevereiru nian kansela,” informa nia. Governante ne’e afirma katak, tinan-tinan bainhira orsamentu promulga governu estabele fali dekretu governu nian ba ezekusaun atu nune’e bele regula fali Ministériu sira ezekuta sira nia osan. (BT)