TIBAR----Kompañia internasionál husi Estadu Unidu Amérika, ConocoPhilips apoiu Orsamentu milloens $2 resin ba Programa Formasaun Profesionál iha área Elétrika no Instrumentasaun komesa hahu iha tinan 2018 formasaun ida ne’e hala’o parseiru ho Governu liu husi Sekretariu Estadu Politika Formasaun Profisional no Empregu (SEPFOPE) no Autoridade nasional Petróliu Minerais (ANMP) durante 2018 to’o 2019.

Projetu ne’e implementa hosi Centru Nasional Emprego no Formasaun Profesional (CNEFP) no CEGELEG Oil durante tinan ida, iha faze teória fulan tolu no pratika fulan sia.

“Ida ne’e ba fazé da ruak, formasaun vokasional ne’ebé halo koperasaun entre Bayu Undan representa hosi Conocophilips ho ANPM nomós SEPFOPE, ita halo ona primeira faze no hetan ona graduasaun hosi ema nain sanulu resin ualu, sira maioria hetan servisu no balun iha fazé estajiu ho susesu primeiru fazé ne’e maka ita avansa ba faze da ruak,” hateten Jerente Nasionál ConocoPhilips, José Lobato Gonçalves, bainhira halo abertura ba formasaun faze da ruak iha sentru Nasionál Empregu no Promosaun Professional, Tibar Munisipiu Likisa (24/01/2019).

Jerente ba kompañia internasionál ne’e konsidera formasaun iha área ne’e importante hodi fo oportunidade ba foinsae Timor-oan sira hodi hasa’e abilidades no koñesimentu tekníka valiozu iha manutensaun elétrika no instrumentasaun. Ho resultadu iha primeira fazé maka Governu tenki kontinua investe osan iha programa ne’e tanba ConocoPhilips sei remata koperasaun ne’e iha 2019.

“Hanesan Kompania iha 2022 sei remata nia servisu iha Timor bainhira produsaun mina iha Bayu Undan remata tanba ne’e Governu labele depende ba kompania maibe tenki hare programa diak ne’e lao ba oin atu labele mate iha klaran,” tenik Nia. Iha formasaun fazé ikus ne’e kompañia mós oferese orsamentu insentivu ba formadores timoroan hodi aprende iha area lingua Ingles no area eléktrika.

Formasaun ne’e parte ida prepara jovens sira hodi emprega ba merkadu servisu tanba rekursu iha área teknika iha rai laran sei menus. “Ha’u gosta programa ida ne’e tanba prepara rekursu umanu iha Timor ne’e sei menus, ohin loron bainhira ita atu hadia uma sei bolu ema Indonésia no Filipina ho ida ne’e maka ita presiza atu forma timoroan sira,” realsa José.

Iha biban ne’e Diretór Jeral SEFOPE, Paul Alves hateten, resultadu formasaun fazé da uluk iha tinan kotuk resulta formandu nain ualu maka servisu ona no restu sei iha fazé estajiu ba kontratu. “Ita tenki reforsa iha formasaun ne’e tanba ba futuru industria avansadu ona formandu sira bele responde numeru iha merkadu, alende ne’e formandu sira bainhira remata bele sai instrutor hodi apoiu sustentabilidade formasaun iha área elétrika no instrumentasaun hodi fo fali formasaun ba foinsae sira tuir mai bainhira ita nia akordu ho ConocoPhilips remata,” informa Nia.

Matéria formasaun hotu-hotu introdus ho lian Inglés hanesan Competence Assurance Management kompostu hosi Analiza formasaun (Training needs Analysis), Kompetensia Profisaun, Formasaun tekñiku (Technical training) kompostu hosi Elétrika no Instrumentasaun (Eletrical and Instrumentation), Automation mechanical, Industrial process no HVAC nomos management Training, HSE training no training center management.

Kandidatu nain 600 hosi jovens no estudante universidade iha área diferente maka tuir teste atu hetan formasaun maibé selesionadu ema nain tolu nulu tanba difikuldade ho lingua inglés. Formador sira hosi sentru formasaun exelente iha mundo CEGELEC Oil ne’ebe hetan kontratu hosi kompañia ConocoPhilips.

Entretantu, tuir dadus hosi sentru formasaun ne’e katak, formandu nain ualu hosi nain 18 iha formasaun primeira fazé ninian maka hetan ona kontratu hosi kompañia internasional Pertamina, Kompañia nasional Esperansa Timoroan hodi servisu. Presidente ANPM Gualdino do Carmo liuhosi komunikadu imprensa ne’ebé distribui ba jornalista sira hatete, enkoraja formandu sira ba faze segundu nian atu partisipa hodi hetan susesu iha formasaun ne’e.

Nune’e agradese mós ba kompañia ConocoPhilips ho ninia concorsiu sira ne’eb’e fo ona apoiu finanseira ba programa ne’e. “ANPM iha kompromisu atu servisu kontinuamente ho kompañia no prestador servisu sira iha ‘area mina no gás nian partes intersadas atu kria oportunidade barak liután hodi prepara diak liután sidadaun timorona sira ne'ebe selesianadu hodi hetan abilidades no koinesmentu importante nesesariu ba empregu aban bainrua iha indústria mina no gás no industria seluk,” dehan Gualdino. (BT)