DÍLI----Iha loron 24 Dezembru 2018, Prezidénsia Repúblika simu hosi Parlamentu Nasional, Dekretu Parlamentu Nasional nº 4/V - Orsamentu Jeral Estadu 2019, liuhosi ofísiu hosi Prezidente Parlamentu Nasional, ho referénsia 201/GPPN/XI/2018.

Tinan ida ne’e, Parlamentu Nasionál aprova Orsamentu Jeral Estadu ida ne’ebé boot liu Orsamentu hothotu ita iha to’o ohin loron. Osan atu gasta iha 2019 hamutuk dólar amerikanu billaun rua no atus ida tolu nulu resin rua ($2.132 millaun). OGE 2019 liu OGE 2017, pursentu lima nulu resin tolu pontu hitu, (53,7%) no liu OGE 2018, pursentu neen nulu resin neen, pontu sia (66,9%).

Haree ba kbiit sira ne’ebé Konstituisaun Repúblika fó, liuhosi alínea a) artigu 85º no númeru 1, artigu 88º, Prezidente Repúblika deside veta Dekretu nº 4/V hosi Parlamento Nacional-Orçamento Geral Estadu ba 2019, liuhosi mensájen fundamentada ba Parlamentu Nasionál, iha 23 Janeiru 2019. Iha mensájen ne’e Prezidente Repúblika haklaken kona-ba ninia desizaun veta ho kbiit hosi Konstituisaun Repúblika, liuhosi artigu 88, númeru 1.

Prezidente Repúblika veta tanba ho rajaun mak OGE 2019 hamenus liután sustentatibilidade. OGE 2019, ho valór bilaun rua no atus ida tolu nulu resin rua mosu iha TL nia istória polítika fiskál nu’udar orsamentu aas liu. Valór aas tebtebes ne’e signifika defísit orsamentál mós aas tebtebes katak Estadu tenke foti osan tan atu kompleta Orsamentu ne’e.

Tanba la iha fonte seluk atu hatama osan ba Orsamentu ne’e, Estadu tenke foti hodi biit osan liután hosi Fundu Minarai. Ba OGE 2019, Dekretu Parlamentu Nasionál husu atu foti tan pursentu atus rua haat nulu resin sia (249%), liu dook Rendimentu Sustentável Estimadu Fundu Minarai nian. 

“Tuir lolos hasai de’it dólar amerikanu millaun atus lima rua nulu resin sira, ka pursentu tolu, hosi Fundu Minarai, ne’ebé hanesan sasukat ka kalkula tinan-tinan, Maibé ita labele haluha katak presu mina iha merkadu mundiál mós tun dadaun ona no osan ne’ebé tama iha Fundu Minarai mós tun dadaun ona. Ita mós hatene katak volume minarai hosi kampu Bayu-Undan mós tun dadaun ona no sei tun babeibeik. Bayu-Undan sei maran loron ruma no osan sei la tama tan husi kampu mina ne’e.

Fundu ne’e labele sai sustentável bainhira Estadu hasai osan barak beibeik, liu RSE hosi Fundu Minarai. Ho ritmu transferénsia hanesan ne’e, ita sei hamamuk Fundu ne’e lalais liu, no ita nia osan ne’e sei mohu iha tempu badak,” Dehan Xefe Caza Sivil Prezidente Francisco Vasconcelhos iha Konferensia foin lalais ne’e.

Nia dehan Governu rasik fó-sai dadus katak seidauk hetan alternativa finansiamentu hosi rekursu minarai foun seluk. Biar Governu fó-sai estimativa ida ne’e, Governu la foti medidas atu kaer metin sustentatibilidade finanseira.

Alende rajaun segundu mak OGE 2019 la hatuir Konstituisaun no lei estruturante sira. Haree ba politika ekonómika no finanseira temi iha leten, OGE 2019, la hatuir regras no prinsípius Konstituuisaun RDTL no lei sira ne’ebé fó dalan ba dezenvolvimentu, hanesan rezerva finanseira obrigatória, unidade orsamentál no investimentu ne’ebé justifika hetan tranferénsia direta hosi Fundu Minarai.

Proposta OGE 2019 mós la hatuir Programa Governu ne’ebé aprova hosi Parlamentu Nasional kona-ba diversifikasaun ekonómika no harii empregu no tau prioridade atu investe iha kapitál sosiál, ita-nia ema nu’udar rekursu boot liu, no dezenvolvimentu ekonómiku. Rajaun terseiru mak Dezekilíbriu Orsamentál aas tebtebes.

Alokasaun orsamental sira ladún fó benefísiu ba sidadaun sira. Osan boot liu katak pur sentu tolu nulu resin rua (32%) ka tersu ida (1/3) hosi OGE aloka ba sosa patrimóniu hosi kompañia estranjeira mina nian. Pursentu sanulu de’it (10%) mak fahe ba edukasaun no formasaun profisionál, saúde, agrikultura no turismu.

Hosi pursentu sanulu ne’e (10%), pursentu ida (1%)tau ba agrikultura, maisounenus pursentu neen (6%) ba sektor edukasaun no pursentu tolu (3%) ba sektor saúde no pursentu zero pontu lima nulu resin hat (0.54%) tau ba turismu. Valor kiik ne’e labele satisfáz nesesidades iha área servisus sosiais no la fó dalan ba kreximentu ekonómiku iha área sira ne’e.

Rajaun ikus liu mak la iha polítika alternativa. OGE 2019 la hatudu polítika alternativa finansiamentu ne’ebé bele konvense katak, biar la’ós sustentável,TL bele lao ba oin, no iha prazu badak no médiu, TL bele hala’o dezenvolvimentu sustentável no Estadu sei la tama iha falénsia finanseira ka fiskal cliff no mosu fenómenu ne’ebé baibain ema bolu “maldisaun rekursus nian”.

Tan ne’e ho kbiit Konstituisaun Repúblika nian, Prezidente Repúblika hala’o ninia direitu veta Dekretu Parlamentu Nasional nº 4/V - Orsamentu Jeral Estadu 2019, no liuhosi mensajen fundamentada, husu ba Parlamentu Nasionál atu tetu fila fali Dekretu ne’e ho hanoin katak governu tenke uza ho di’ak rekursu finanseiru sira ne’ebé pertense ba Estadu no Povu Timor-Leste.

Bainhira uza rekursu sira ne’e liuhosi dalan justu, ekilibradu, sustentável no efisiente liután mak ita bele satisfás nesesidades loronloron Povu nian no fó dalan ba kreximentu no dezenvolvimentu nasionál, no garante sustentabilidade ba ita nia ekonomia hodi fó moris di’ak ba TL nia oan sira iha uture!

Governu Preokupa Ho Veto Prezidente Repúblika Nian Ba Oje 2019
Ho rejultadu ne’e Primeiru-Ministru, Taur Matan Ruak preokupa ho Orsamentu Jeral Estadu 2019 ne’ebé veta tiha ona hosi Prezidente Repúblika, tanba sei prejudika atividade tomak setor privadu no sosiedade tomak nian, maske nune’e, Governu ho Parlamentu sei diskute oinsá rezolve lalais hodi nune’e bele haruka fila ba Xefe Estadu para promulga.

Preokupasaun Governu nian ne’e, hato’o direta hosi Xefe Governu ba Xefe Estadu iha enkontru semanal ne’ebé hala’o kinta-feira ne’e iha Palasiu Prezidente Nicolau Lobato, Dili. “Ne’e enkontru semanal ho Sr. Prezidente Repúblika, informa uitoan atividade sira ba Sr. Prezidente, mas mós haree preokupasaun kona-ba veto Sr. Prezidente nian ba Orsamentu Jeral Estadu 2019 nian, no halo nusa mak ami iha oin ne’e serbisu, Governu ho Parlamentu serbisu para bele rezolve problema ida ne’e lalais.

Governu tenke diskute saida mak tenke halo fila fali, para depois haruka fila fali mai Sr. Prezidente Repúblika”, esplika Xefe Governu ba jornalista sira hafoin remata enkontru semanal. Hatán ba jornalista kona-ba veto Xefe Estadu nian, ne’ebé obriga Governu tenke uza duodesimu karik implika ba dezenvolvimentu, Xefe Estadu hatán katak, sim, implika duni ba área ekonomia, maibé Governu sei halo esforsu atu minimiza hodi duodesimu labele kontinua, tanba daudaun ne’e emprezáriu la iha ona osan atu selu nia traballadór.

“Ita halo esforsu hotu para minimiza, para duodesimu labele kontinua, emprezáriu sira la iha ona osan para selu nia traballadór sira, osan la iha para inan -aman selu nia oan sira nia eskola, buat sira ne´e, tanba ne’e ita tenta minimiza i ha’u fiar katak ita sei hetan solusaun ba ida ne’e. hanesan ha’u dehan; la iha kadeadu ke la iha xave, la iha problema ke la iha solusaun, tanba ne’e ami halo esforsu halo nusa mak ultrapassa ida ne’e”, tenik Eis Xefe Estadu.

Ekonomia TL la’o Hakdasak
Relasiona Orsamentu Jerál Estadu (OJE) 2019 ne'ebé oras ne'e daudauk Presidente Repúblika veta sei fo impaktu ba ekonomia rai laran tanba populasaun nasaun foun ida ne’e nia ekonomia depende ba iha Orsamentu estadu.

Notisia ne’ebe BT publika iha edisaun 432 semana kotuk , Tuir Akadémiku Fernando Batista Anuno hatete, bainhira Prezidente Republika Francisco Guterres Lu’Olo veta OJE sei fó impaktu ba ekonomi rai laran tanba populasaun nasaun foun ne’e ninia ekonomia dependendete ba orsamentu estadu nian.

Tuir nia katak, maioria populasaun iha TL hetan kresimentu husi OJE tanba ne'e bainhira la iha orsamentu maka ekonomia rai laran sei hakadak. "Ita nia populasaun maioria hetan kresimentu husi orsamentu estadu tanba maioria Populasaun sira ne'ebé hola produtu mai husi orsamentu estadu tanba ne'e fó impaktu ne'ebé boot tanba buat sei nakdas bainhira laiha osan," dehan nia ba BT iha nia knar fatin kampus ekinomia UNTL (15/01).

Ho nune'e observadór ekonomia ne'e hatete, tenke promulga orsamentu atu nune'e dezenvolvimentu rai laran bele la'o no labele uza interese privadu hodi halo povu sai vítima nafatin. "Husu atu orsamentu ne’e bele aprova hodi funsiona mákina estadu nian nómos dezenvolvimentu rai laran bele la’o ho di’ak. Ita labele politiza buat hirak ne’e no povu maka sai vítima nafatin,” nia afirma.

Akadémiku ne’e mós hatete, iha lei orsamentu jerál estadu hatete, PR iha nia akompetensia atu foti dezisaun ba proposta orsamentu ne’ebé Parlamentu Nasional (PN) hato’o ona. “ Bainhira orsamentu iha ona meza PR, maka PR iha kompetensia tomak atu foti desizaun veta ka promulga maibé tenke haree mós ba situasaun real iha nasaun ida ne’e labele foti desizaun ne’ebé halo povu sai vítima nafatin, nu’udar aman ba nasaun tenke uza nia kompetensia apar ho situasaun ne’ebé la’o hela iha nasaun ida ne’e nia laran,” hatete nia.

Dosente ne’e mós husu ba lideransa nasional sira atu tur hamutuk hodi rezolve problema ne’ebé sai polémika iha rai laran atu nune’e dezenvolvimentu ekonomia iha nasaun ida ne’e bele la’o ho di’ak tanba povu maioria moris iha difikuldade nia laran. (BT)