DILI----Relasiona ho Skema Garantia kreditu ne’ebé estabelese husi VI governu konstitusional ho objetivu atu oinsá hakbiit liu tan setór privadu rai laran hodi haree ba oportunidade sira ne’ebé mak iha tan ne’e Skema garantia Kreditu oras ne’e hein de’it ona ba faze implementasaun.

Tuir Vice Governador Banku Central Timor Leste (BCTL) Venancio Alves Maria hateten katak skema Garantia Kreditu governu estabelese tiha ona no hein de’it implementasaun, tanba BCTL transfere tiha ona osan millaun $4.

“Skema Garantia Kreditu hein implementasaun tanba nia lei sai tiha ona,” dehan Vice Governador Banku Central Timor Leste (BCTL) Venancio Alves Maria ba Jornalista sira iha lansamentu relatóriu Fundu Petroliferu foin lalais ne’e.

Nia afirma katak kona-ba kompeténsia hodi implementa skema garantia kréditu Banku Central rasik mak sei organiza no oras ne’e dadaun tama hela iha prosesu ba preparasaun nian tanba fundu transfere tiha ona husi BCTL rasik. “Kona ba implementasaun Banku Central mak sei organiza no iha hela faze preparasaun atu implementa ida ne’e, Kona-ba implementa ami tenke prepara tékniku, prepara sistema,inklui buat, balun tan,” informa nia.

Iha fatin seluk vice Prezidente Camara Comersio Industria Timor Leste (CCI-TL) ne’ebé trata asuntu Financas Rui Castro hatete mos Skema Garantia Kréditu hein de’it ba faze implementasaun tanba oras ne’e laiha ona problema maibé hein disizaun husi governu TL rasik.

“Skema garantia kréditu prosesu ne’e hein ba implementasaun tanba tuir informasaun ne’ebé banku Informa mai ami katak presiza hela dekretu lei ruma husi governu nian kona ba operasionál hodi aprezenta ba atu funsiona buat ne’e no husi banku laiha ona problema ba implementasaun maibé tenke mai husi governu, hela governu ho banku central halo nusa ba iha implementasaun.

Buat hotu banku prepara ona hein de’it husi parte governu,” dehan Rui Castro iha edifisiu CCI-TL Aicait, Dili, Segunda (05/02). Nia afirma skema garantia Kreditu prioridade liu ba iha setór 4 hanesan setór Agrikultura, Peskas, Pekuariu no Turizmu tanba ne’e setór turizmu mak sai peoridade ba iha skema garantia kréditu.

Bainhira BT husu kona ba preparasaun CCI-TL nian nia dehan oras ne’e kontinua fahe informasaun iha emprezariu sira ne’ebé iha oportunidade atu bele hola parte polítika refere.

“Ha’u sente laiha problema tanba durante ne’e ami fahe informasaun no públiku mós fahe informasaun nafatin no espera katak buat hotu sei lao di’ak no Proposta to’o agora emprezariu sira seidauk hatama tanba nia implementasaun seidauk lao tanba usulan ne’e mai husi CCI-TL hodi fo ba governu no governu prepara tiha ona kondisaun ne’e liu husi Ministeriu Coordenador Asuntu Ekonomia (MCAE) ne’ebé promotór husi Ministru Estanislau Aleixo da Silva ne’ebé agora atuál ba Ministru Agrikultura no Peskas ne’ebé nia kooperasaun di’ak tebes entre Banku Central ho CCI-TL ba preparasaun lao hotu ona no hein de’it nia implementasaun,” afirma Rui.

Nia mos konfesa katak Skema Garantia Kreditu to’o oras ne’e seidauk implementa dala ruma mosu dala ruma mosu ligasaun ho estabilidade governasaun ne’ebé lao no ho orsamentu balun ne’ebé la aprova husi parlamentu no sai faktores ida (Kendala) hodi nia implementasaun ne’e seidauk lao tanba governu tenke haruka osan ruma ba banku atu bele lao.

“Skema garantia kréditu 60% husi governu no 40% husi Banku tan ne’e nia implementasaun nia ligasaun ho orsamentu,” dehan nian. Kona-ba peoridade sira nia mos informa katak atu haree ba peoridade ne’ebé iha depende ba emprezariu sira nia interese atu iha hanoin haree ba oportunidade negósiu ne’ebé iha, tuir kapasidade investimentu. (BT)