DILI----Maske Timor Leste nudár nasaun ida ne’ebé nia ekonomia depende maka’as liu husi despeza públiku liu husi Orsamentu jerál Estadu ne’ebé kada tinan governu liu husi Parlamentu Nasionál aprova maibé tinan ida ne’e seidauk iha Orsamentu Jerál Estadu (OJE) inklui mós orsamentu retifikativu rasik maske nune’e sirkulasaun moeda la’o normal hanesan bain-bain.

Tuir Vise Governador Banku Central Timor Leste Venancio Alves Maria hateten katak osan ne’ebé oras ne’e sirkula iha merkadu rai laran tuir dadus ne’ebé BCTL rekolla hamutuk millaun $600 no nia rent sirkulasaun kontinua normal tuir atividade ekonomia TL.

“Osan ne’ebé agora iha merkadu Timor tuir sistema bankária ninian ne’ebé tuir dadus ne’ebé ami koleta 600 milloens ida ne’e hanesan observasaun normal tuir atividade ekonomia Timor ninian, Kona ba dinámika Movimentu moeda tuir divizaun ekonomia nia dadus situsaun polítika ne’ebé iha la iha implikasaun maka’as ba atividade ekonomia Timor Leste nian,” dehan Vice Governador Banku Central Timor Leste Venancio Alves Maria ba BT iha nia knar fatin hafoin husu obersavasaun ba sirkulasaun orsamentu iha rai laran relasiona ho situasaun polítika ne’ebé nasaun foun ne’e enfrenta hela tanba to’o ohin loron seidauk iha OJE 2018 nian, kuarta feira (31/01).

Nia dehan rajaun la fo implikasaun ba atividade ekonomia tanba haree husi inflasaun ne’ebé iha sei kontinua ki’ik. “Ema pesoál haree katak situasaun polítika hanesan ne’e iha implikasaun maibé tuir dadus ne’ebé hatudu katak empase polítika ne’ebé akontese fó impaktu maka’as ba ekonomia maibé rejultadu inflasaun sei kiik nafatin,” dehan Venancio.

Bainhira husu kona ba Politika Monetariu hodi halo kontrolu ba sirkulasaun tuir Vice Governador katak Politika refere la’ós kompeténsia sira nia maibé ko’alia kona ba sirkulasaun moeda iha rai laran depende ba iha atividade ekonomia rai laran maibé tanba Timor Leste depende liu ba iha importasaun ikus mai sirkulasaun moeda mós barak ba iha rai li’ur tanba husi komparas ne’ebé iha.

Venancio dehan banku Central kontinua mantein sirkulasaun moeda iha merkadu rai laran hodi bele garantia atividade ekonomia iha rai laran , nune’e kontinua la’o di’ak nafatin. Iha parte seluk Prezidente Banku Nasional Komersio Timor Leste (BNCTL) Brigido de Sousa hateten katak Relasiona ho polítika ne’ebé oras ne’e la’o iha rai laran seidauk iha implikasaun ba iha sirkulasaun moeda iha Banku rasik.

“Kona-ba situasaun polítika ne’ebé iha oras ne’e seidauk iha implikasaun ba sirkulasaun moeda iha tempu badak nia laran tanba nia seidauk hatudu indikasaun ida,” dehan Brigido.

Nia afirma katak bainhira situasaun polítika lao kontinua hanesan ne’e iha tempu naruk mak sei fó implikasaun ba movimentasaun ba moeda iha banku tanba kliente sira hasai osan barak liu halo komparasaun ba iha Deposito osan tanba ho rajaun laiha osan atu bele kliente sira rai ba banku.

Hafoin Timor-Leste independénsia tiha durante tinan 15 iha tinan 2017 mak mosu impase polítiku iha nasaun foun ne’e nune’e ohin loron tama ona ba fulan Fevreiru 2018 nasaun foun ne’e ninia orsamentu jerál Estadu tinan 2018 seidauk iha. (BT)