HERA----Governu apresia tebes ho investimentu empreza HINEKEN S.A ne’ebé investe iha area fábrika nian ba dala uluk iha Timor-Leste hafoin nasaun foun ne’e ukun-an.

Primeiru Ministru Mari Bin Amudi Alkatiri konsidera investimentu empreza HEINEKEN S.A nu’udar efeitu ida boot no transversal tebes ba ekonomia nasaun foun Timor-Leste nian.

“Ba ida ne’e ha’u hakarak dehan katak fábrika ne’e nia infeitu kolaterais bo’ot tebes tanba sei ba to’o agrikultura ne’ebé tenke responde nesecidade ba fábrika ne’e, sei ba to’o indústria ki’ik no sei ba to’o komérsiu mós tanba nia efeitu bo’ot tebes, signifika katak nia efeitu transversal loos ba ekonomia Timor-Leste nian,” hateten Mari Alkatiri iha ninia diskursu ba inaugurasaun Fabrika HEINEKEN iha Hera (22/01.

Primeiru Ministru ne’e hateten empregu direita ne’e akontese ona no indireita maka sei hetan iha agrikultura, komérsiu no iha indústria sira seluk. “Tanba ne’e ha’u husu ba investor Timor oan sira atu bele halo interasaun ho fábrika ida atu nune’e bele mós akompaña dezenvolvimentu fábrika no bele mós sai parseiru ba dezenvolvimentu ida ne’e tanba ne’e ha’u haree emprezariu timoroan barak loos ha’u husu atu akompaña didi’ak,”Apela Xefe governu ne’e.

Nia salienta tan katak, hanesan primeiru ministru no ministru dezenvolvimentu no reforma institusional iha funsaun seluk atu buka halo interasaun transversal. “Halo nusa maka fábrika ida ne’e bele liga ba agrikultura liga ba indústria, liga ba komérsiu ida ne’e ha’u nia funsaun hanesan ministru dezenvolvimentu tanba ne’e ha’u bele dehan esforsu tomak hahú husi uluk to’o agora iha realidade ida ne’e no esforsu ida ne’e ba oin atu halo kontinua atu habelar tan rejultadu ida ne’e”nia salienta.

Investimentu ida ne’e atrai mós investimentu seluk atu mai tanba investimentu ida ne’e hatudu katak TL la’o tuir dalan ida ne’ebé di’ak no bele iha konfiansa ba povu ida ne’e no instituisaun estadu nian, husi tasi feto to’o tasi mane sei iha potensiál bo’ot atu halo atrasaun ba investimentu.

Primeiru Ministru VI Governu Konstitusional ne’e rekoñese investimentu boot ne’e realiza tanba mai hosi esforsu governu anterior no hakarak hatete mós katak ne’e ativu ida ne’ebé VII governu simu no atu hala’o ba oin. Iha fatin hanesan presidente HEINEKEN ba Asia Pasifiku Frans Usman hatete, sira asina akordu ida ne’e ho governu iha tinan 2015 no produsaun hahú ihafulan Janeiru 2017.

“Ho espíritu enterpreunial ne’ebé ami avalia ba ami nia investimentu iha tinan 2013 ami hetan inprensaun ne’ebé di’ak ho maturidade ekonomia no polítika nasaun ida ne’e nian ba jere nia rikusoin mina liuhosi fundu rikeja soberanu ida, no investimentu investimentu hari infrastrutura iha longu prazu sei hadia povu nia moris,” nia hatete.

Nia dehan HEINEKEN iha mundu nu’udar serveja internasionál ne’ebé faan ona iha nasaun 170 resin iha TL HEINEKEN hanesan investor estranjeiru dahuluk maka investe iha setór indústria ka fabrikasaun ne’ebé oras ne’e dadaun kria empregu direita no indireita ba Timor Oan 600 resin.

Entretantu plantasaun multi bebidas HEINEKEN Timor S.A gasta ona osan ho montante miliaun $ 38 hodi harii ho klase mundiál no sei prodús serveja oioin ho bebidas internasionál hanesan Bintang, Tiger, ABC inklui bebidas ne’ebé la uza alcohol.

Investimentu empreza internasionál ne’ebé lokaliza iha area Hera sei halo fábrika ba serveja oin-oin no bebidas seluk ho ninia kualidade internasionál hodi fa’an iha rai laran no bele esporta ba rai liur. Nune’e mós investimentu ne’ebé sei hala’o ninia servisu iha area oin-oin hanesan hahú kedas hosi prepara matéria prima to’o ba fábrika nian ne’e sei kontribui mós atu loke ba Timoroan sira hodi hamenus númeru dezempregu. (BT)