Brigido de Sousa
Brigido de Sousa

Brigido de Sousa
DILI----Banku Nasionál Comersio Timor Leste nudár Banku Uniku Timor Leste nian ne’ebé oras ne’e halo nia operasaun iha munisipiu 13 inklui mós Kapitál Dili ne’ebé la’o ona iha tinan hirak nia laran hodi servi povu no nasaun ida ne’e.

Tinan 2018 nudár tinan foun hodi hakat ba mehi, mehi BNCTL nian iha tinan ne’e hakarak mobiliza deposito husi Millaun $40 to’o millaun $50 husi públiku liu-liu setór privadu sira.

Tan ne’e atu atinje mehi refere BNCTL sei hadi’a nia sistema hotu liu-liu oinsá bele dizitaliza hotu servisu bankária durante oras 24 nia laran hanesan fornese servisu ne’ebé di’ak, Atendimentu hanesan ATM, Internet banking, Mobile Banking nomós POS inklui mós hadi’a infrastrutura iha rai laran.

Prezidente BNCTL Brigido de Sousa hateten iha tinan 2018 BNCTL ninia espetativa , prozesaun nomós Planu atu realiza mehi hirak ne’e primeiru BNCTL sei kontinua nafatin saida mak hala’o ona iha tinan 2017 nian mak hanesan reforsa BNCTL nia sistema Bankaria, kontinua fó kréditu liu – liu ba setór privadu tanba atu hakbiit TL nia setór privadu, hadi’a sistema banku nia rasik.

Ho mehi refere oras ne’e daudaun BNCTL servisu maka’as hela oinsá bele troka sistema bankária hodi bele halo sistema ida ne’ebé di’ak liu atu nune’e serve duni banku nia interese tuir objetivu ne’ebé BNCTL iha.

“BNCTL esforsu makas atu tinan ida ne’e bele mobiliza deposito barak liu no la’ós depositu husi Funsionáriu públiku, Veteranus, Bolsa da Mae maibé deposito duni husi ita nia setór privadu entre Millaun $40 ou Millaun $50 atu nune’e BNCTL bele iha Liquedes ne’ebé sufisiente no rekursu sufisiente atu kontinua fo kréditu atu atinje ida ne’e konserteja BNCTL tenke hadi’a kondisaun Ezemplu Deposito BNCTL tenke hasa’e funan ba deposito tanba deposito agora ladún atrativu,” dehan Prezidente BNCTL Brigido de Sousa ba BT iha nia knar fatin, Mandarin,Dili Segunda feira (15/01).

La’ós ne’e de’it maibé BNCTL mós sei hadi’a atendimentu signifika katak BNCTL sei kontinua planu atu harii konstrusaun ba edifísiu hotu hotu ne’ebé hahú uluk husi, Oecusse, Ainaro, Gleno Inklui Sede Dili rasik ba konstrusaun edifísiu ne’ebé iha.

BNCTL loke ona tender ba kompana nia sira no asina ona kontratu no hein de’it atu konstrui edifísiu hirak ne’e no espera katak fatin ka edifísiu BNCTL ne’e reprezentativu liu, iha espasu sufisiente nune’e bele fo atendimentu dignu ba nia kliente sira tanba sukusar BNCTL tuan no kondisaun ladún merese atu bele fo atendimentu ba públiku ho di’ak.

Brigido dehan Maske planu atu harii edifísiu foun iha Munisipiu maibé BNCTL mós planu iha tinan 2018 sei loke mós ajénsia BNCTL balun iha area ne’ebé identifika ona hanesan Becora nomós iha Kampus UNTL rasik. 

“Alende ida ne’e BNCTL tinan ida ne’e sei loke tan Ajénsia balun iha Dili tanba BNCTL planu sei loke Ajénsia Boot ida iha Becora ( Besik Ponte Maufelu) no sei loke tan Ajénsia ida iha UNTL tanba foin daudauk ami asina tiha ona Akordu ho UNTL hodi loke iha ne’eba ho objetivu katak atu nune’e presaun mai iha sede no sukusar Dili bele hamenus uitoan nune’e ema hili opsaun barak liu atu hetan atendementu husi BNCTL,” katak Prezidente BNCTL.

Brigido mós afirma katak BNCTL la’ós de’it atu implementa programa refere maibé mós sei kontinua aumenta mákina ATM tanba BNCTL sei hola tan Makina ATM 10 no agora iha ona prosesu aquizasaun no la to’o fulan rua ka tolu to’o ona iha Timor, BNCTL sei hahú monta tan ba fatin sira ne’ebé presiza hanesan Audian, Kolmera, Hudi laran inklui fatin seluk atu nune’e Publiku bele asesu ba servisu ATM inklui munisipiu sira ne’ebé mak presiza ATM hanesan iha Oecuse, Baucau no mós Maubesi (Ainaro).

Inklui iha inísiu fulan Febreiru BNCTL hahú monta Mós Point off Save (POS) iha loja sira tanba tuir targetu BNCTL sei monta POS hamutuk 50 iha fatin sira ne’ebé identifika ona nune’e públiku bele uza kartaun hodi selu nesesidade ne’ebé mak kliente sira uza.

“Hanesan ita boot ba iha loja sira bele uza kartaun hodi halo kompras sasán sira ne’e tan ne’e ami agora dadauk atinje ona mákina 50 no prepara hela akordu ho fatin sira ne’e hodi monta POS hanesan Loja, Restorante, Hotel, fatin ense mina atu nune’e ema la presiza hodi osan lori de’it kartaun ATM BNCTL bele kompra sasán,” dehan nian.

Nia mós klarifika liu tan katak Iha tinan ida ne’e mós BNCTL iha fase dezenvolvimentu hela internet Banking no Mobile banking atu nune’e kliente BNCTL iha posibilidade atu uza liu-liu ema sira ne’ebé preokupadu servisu hanesan Emprezariu inklui sei kria kooperasaun ho loja nomós fatin sira ne’ebé besik iha komunidade hodi estabelese ajénsia BNCTL atu nune’e públiku sira ne’ebé hela dook husi edifísiu BNCTL bele uza ajénsiane’ebé iha bele halo tranjasaun Osan.

BNCTL mós sei kria sistema foun kona ba relatóriu ne’ebé relasaun ho servisu bankária nian, sei hatún kréditu ba funsionáriu sira no hasa’e kréditu ba emprezariu ka negósiu, sei halo re-estruturasaun ba Organizasaun BNCTL nian, sei estabelese sistema Rikus, sei sosa Sistema Modul ba Finanseiru nian inklui sei sosa sistema Banka Movel hodi bele utiliza iha area remotas.

“Tuir fali mai ami nia sistema foun no ami mós atu kria relatóriu sira ne’ebé mak banku presiza, tinan ida ne’e ami sei hatún uitoan montate kréditu tanba tinan liu ba ami fo kréditu maka’as liu ona no liu tiha ona projesaun ne’ebé banku difini, liu-liu kréditu ba funsionáriu sira tan ne’e iha tinan ida ne’e ami hatún uitoan kréditu ba funsionáriu sira maibé hasa’e fali kréditu ba setór privadu sira komesa husi Mikro ki’ik, Mediu no iha kualkér setóran.

Tuir fali mai BNCTL esforsu makas atu tinan ida ne’e bele mobiliza deposito barak liu no la’ós depositu husi Funsionariu públiku, Veteranus, Bolsa da Mae maibé deposito duni husi ita nia setór privadu entre Millaun $40 ou Millaun $50 atu nune’e BNCTL bele iha Liquedes ne’ebé sufisiente no rekursu sufisiente atu kontinua fo kréditu, Depois sistema internet banking no Mobile Banking BNCTL.

Ami mós sei halo re-estruturasaun ba organizasaun Banku nian tanba organizasaun Banku nian hare katak presiza halo re estruturasaun, atensaun makas ba risku tanba ita hatene katak banku semakin ba semakin nia riksu ne’e boot tan, boot tan no BNCTL tenke halo nia estratéjia no prosedimentu sira ne’e oinsá halo mitigasaun ba risku.

BNCTL sei hola modul sira atu halo analiza ba situasaun finansial banku nian atu nune’e bele fo data ka informasaun, no tuir fali mai mak Banka Movel sira ne’e tanba agora dadaun sistema ne’ebé BNCTL uza labele hasai hodi uza iha area remotas atu halo tranzasaun Bankaria tanba labele halo operasaun Off Line maibé tenke On Line,” Informa nia.

Nia mós informa liu tan katak atu dijitaliza Servisu BNCTL nian ne’ebé iha tuir planu ka prosesaun sei gasta orsamentu hamutuk millaun $10 hodi bele hadi’a servisu sira ne’ebé mak oras ne’e iha no la signifika servisu sira ne’e sei finalize iha tinan 2018 maibe balun sei kontinua ba tinan 2019. (BT)