DILI----Atu selu tusan emprezariu nian VII Governu preve orsamentu ho montante millaun $29.1 iha Orsamentu Dotasaun Temporariamente iha capital dezenvolvimentu no osan refere sei prioridade hodi selu orba governu nian ne’ebé ezekuta ona husi emprezariu sira.

“Kona ba Projetu sira ne’ebé ita nia emprezariu sira halo, ha’u hanoin hanesan ita boot sira akompaña ita mós akompaña ba capital dezenvolvimentu atu selu duni ba projetu sira ne’e tan ne’e orsamentu Dotasaun governu tau iha capital dezenvolvimentu Millaun $29.1,” dehan Vice Ministra Planu Financas Sara Lobo Brites ba Jornalista sira iha edifisiu Ministeriu Financas Aitarak laran Kinta (11/01).

Nia dehan husi osan refere atu selu projetu sira maibé bazeia ba progresu no projetu ne’ebé final ona no entrega ona ba estadu.Vise Ministra ne’e hateten governu prove orsamentu ne’e hodi selu projetu sira tanba lakohi fó prejiuju ba emprezariu sira. “Ida ne’e mak ita tau osan hodi selu no ital abele fo prejiuju ba empreza sira ne’ebé mak kumpri ona sira nia obrigasaun,” dehan nia.

Nia mós afirma liu tan katak Orsamentu Doadesimu ne’ebé tau iha kapital dezenvolvimentu iha $29.1 milloens no husi osan ida ne’e la’os de’it selu projetu maibé sei selu mós inklui ona ho Dividas Esterna ninian. Kona ba Veteranus no bolsa da Mae inklui terseiru idade governu kontinua tau osan bazeia ba fase ezekusaun.

“Kona ba Veteranu nomós Bosla da Mae ida ne’e ita aloka, so nia fase ejekusaun ita boot sira hatene Veteranus Selu fula fulan no bolsa da mae ho Idozu sira halo kada fulan ne’e, Portantu ita aloka nafatin tanba fo biban ba Ministeriu Soliridade Sosial hala’o Knar, Rekolla dadus hodi selu tuir orariu,” katak nian.

Entretantu Prezidente Camara Comersio Industria Timor Leste (CCI-TL) Oscar Lima hateten katak to’o oras ne’e sira seidauk iha informasaun kona ba governu tau osan hodi selu projetu sira maibé se ida ne’e mak akontese duni bele deminui tusan ba governu inklui bele hamenus todan husi emprezariu sira.

Nia dehan to’o oras ne’e governu seidauk selu ka deve emprezariu sira liu millaun $200 resin. “Se hetan ona Millaun $29 hanesan vice Ministra hateten katak iha ona no ida ne’e hanesan pasu ida liu liu emprezariu sira ne’ebé mak nia tusan iha governu maibé depende sorte.” Katak Oscar Lima.

Nia mós afirma katak durante projetu ne’ebé sira implementa barak mak hetan ona verifikasaun husi Governu nomós balun seidauk maibé projetu balun emprezariu sira implementa no hetan oan verifikasaun kleur ona maibé to’o oras ne’e seidauk hetan pagamentu husi governu rasik. Tan ne’e liu husi orsamentu ne’ebé iha Oscar Lima sente Orgullu tanba bele hamenus ona todan ne’ebé mak emprezzariu sira hasoru.

Tuir informasaun ne’ebé BT iha katak Orsamentu ne’ebé governu Tau ba iha capital dezenvolvimentu ei poridade lib a projetu sira iha liña Ministériu sira ne’ebé iha fase ezekusaun no PDIM, Pagamentu aplika de’it ba progresu sira ne’ebé la’o hela, projetu sira iha fundu Infranstrutura halo de’it pagamentu tuir progresu projetu sira ne’ebé la’o hela kada sira ne’ebé remata no hetan ona verfikasaun. (BT)