DILI----Durante tinan 2 nia laran Ministru Estanislau Aleixo da Silva, ne’ebé maka lidera Ministériu Estadu Koordenadór Asuntu Ekonomia (MEKAE) ho Ministériu Agrikultura no Peskas (MAP) iha mandatu VI Governu Konstitusionál nian, konsege halo mudansa pozitivu.

VI Governu Konstitusionál ne’ebé maka xefia hosi Primeiru Ministru Rui Maria de Araújo, simu tomada posse iha loron 16 fulan Fevereiru 2015, no mandatu refere sei termina iha fulan Agostu 2017 bainhira Governu foun simu ona posse.

Tuir Ministru Estanislau hatete, servisu VI Governu Konstitusionál, hosi MEKAE no MAP asuntu ida ne’ebé maka oinsa atu realiza dezenvolve ekonomia moris povu ninian, tanba ne’e iha esperansa ne’ebé maka iha, durante mandatu periodu ida nia laran, konsege realiza no atinji metas objetivu ne’ebé maka povu tuir nia hakarak. Ministru deklara, durante mandatu hahú no besik remata iha servisu lubuk bo’ot ida maka realiza hodi servi povu no dezenvolve ekonomia sustentavel nasaun ninian.

No hosi MEKAE ninian, Estanislau dehan, hala’o ona lei ne’ebé maka barak atu hadia ambiente negósiu, hanesan lei sosiedade komersiais, revizaun ba lei investementu, aprova mós lei dos áreas protejidas, lei bankarota, lei garantias bankárias ne’ebé maka atu habelar kréditu, no sei halo mós revizaun ba lei kódigu traballu, inklui regulamantu ne’ebé maka barak realiza.

“Ha’u lahatene atu konta hosi ne’ebé durante iha ha’u nia mandatu, hosi MEKAE no MAP, husik públiku maka sura, ezemplu iha MEKAE ami aprova leis bar-barak atu bele hadia ita nia ambiente de negósiu ninian,”dehan Ministru Estanislau ba Jornalista sira iha Parlamentu Nasionál, Segunda (06/03).

Alende ne’e, intermus investimentu nian, MEKAE mós halo servisu maka’as ne’ebé haree ba investimentu ekonomia sira seluk ne’ebé maka nia valór ekonomia ne’e diak ba krezimentu ne’ebé maka nasaun nia hakarak, ne’e maka hanesan haree ba servisu investimentu Pelican Paradice ne’ebé la kle’ur tan atu investe, no TL Cement mós hanesan progresu la’o hela no sei implementa mós iha tempu badak.

Entretantu iha parte seluk, Ministru afirma, TL agora hahú ona peska industriál, entaun ida ne’e maka rezultadu ida ne’ebé maka bele haree ho matan.
Tuir Ministru katak, ho mellora ambiente negósiu ida ne’e governu sempre halo koordenasaun diak ho setór privadu sira hotu, liliu ho Cámara Comérsiu Indústria Timor Leste (CCI-TL) oinsa maka bele haree no ajuda mellora ekonomia railaran ida ne’ebé maka diak liuhosi kapasitasaun, atividades no buat seluk tan ne’ebé maka iha valór ekonomia ne’e bo’ot.

Hosi melloramentu sira ne’e Governu mós regula lei barak, entaun servisu substitui ba ajénsia sira ne’ebé maka iha kompeténsia atu haree lei no promove investimentu nian hanesan TradeInvest atu haree asuntu ekonomia ho promove investimentu, no Servisu Rejistu no Verifikasaun Emprezariál (SERVE) ninian haree ba lei negósiu.

“Ha’u atu dehan liután, servisu MEKAE ninian bele dehan servisu ida ne’ebé maka todan, maibé konsege realiza ho diak, koko halo koordenasaun ho ajénsia setór privadu sira hanesan CCI-TL ajuda haree hodi mellora ekonomia ne’e la’o ho diak, nune’e mós parte TradeInveste oinsa promove nafatin ita nia investimentu, i parte SERVE haree mós ba ita nia negósiu ninian, entaun ha’u atu dehan buat barak maka ami halo ona,”Estanislau afirma.

Hosi subliña mós katak, alinde progresu servisu ne’ebé maka halo iha MEKAE, iha mós servisu lubuk bo’ot ida maka realiza ona iha MAP rasik. Maske durante ne’e iha kestaun no lamentasaun barak hosi públiku kona-ba servisu MAP, maibé MAP lakonsidera hanesan obstaklu no kontinua halo servisu ida ne’ebé maka bele responde ba povu nia preokupasaun nesesáriu moris iha terenu.

Ministru Estanislau fó ezemplu ba agrikultór ninian, agora dezenvolve maka’as iha plantasaun kafé. “Iha área de agrikultura ami halo rehablitasaun ba kafé, ita hotu haree ezemplu ektares 150 maka halo iha Liquiça, ektares 350 iha Ermera, ida nee só ema matan delek maka labele haree, maibé ida ha’u atu dehan iha servisu barak maka konsege realiza,”nia orgullu.

MAP mós konsege establese tanki hakiak ikan iha Munisípiu hotu, tanba iha servisu hamutuk ne’ebé diak ho setór privadu no komunidade hodi dezenvolve área pekuária. Maske mandatu besik ona atu remata, hanesan Ministru ne’ebé maka lidera MEKAE no MAP, kontinua iha komitmentu no promete hodi sei halo servisu maka’as atu dezenvolve área tutela, nune’e bele fó benefísiu diak ba povu no nasaun. (BT)