DILI----Governu Timor-Leste loke dalan ba kompañia Internasional sira atu mai halo investimentu iha setór oin-oin maibe iha oportunidade ne’e kompañia balun la kompri regulamentu ne’ebé governu fó hanesan kompañia Hong-Long fisheries ne’ebé governu fó lisensa hodi hala’o atividade peska iha Tasi mane.

Kompañia Hong-Long fisheries hetan lisensa husi Ministereiu Agrikultura no Peskas iha 28 Outubru 2016 hodi hala’o atividade peska iha tasi mane maibe atividade ne’e la’o kompañia hakat liu tiha akordu ne’ebé estabelese hodi kaer ikan sira ne’ebé protezidu hanesan ikan tubaraun hamutuk tonelada 43.

Bazea ba faktus ne’ebé iha governu liu husi Primeiru Ministru Rui Maria de Araújo asina despaixu interministerial hodi suspende próvisoriu atividade ró 15 husi nasaun Xina ne’e. Desizaun koletiva hodi suspende ró 15 ne’ebé iha atu oinsa bele loke prósesu investigasaun ba kompañia Hong-Long ne’ebé nain ba ró 15 ne’ebé MAP iha lorón 28 Outubru 2016 fo licensa hodi halo aktividade peska iha tasi mane, kaer mos ikan ne’ebé bandu inklui ikan tubaraun nomos ikan hiu.

Despaixo ne’e asina hodi suspende ró hirak ne’e hafoin ekipa fiskalizador peskas nian deteta ikan tubaraun ne’ebé empreza kaer lori to’o iha Cairabela molok atu halo esportasaun Xina. Dekanu Fakuldade Ekonomia no Gestaun Uiversidade Nasionál Timor Lorosa’e Fernando Anuno hatete atu halo kontrolu ho di’ak ba atividade epreza nian governu tenke involve teknika timoroan sira ho kompañia nune’e kompañia labele halo tuir sira nia hakrak.

“Atu halo kontrólu ba prósesu akitivadade tomak presiza iha ekipa teknika husi timor-oan rasik ba hamutuk ho kompaña iha tasi laran atu bele hatene rezultadu servisu saida de’it mak hala’o iha tasi mane ne’eba,” dehan Dekanu Fakuldade Ekonomia no Gestaun UNTL, Fernando Anuno ba BT iha nia knar fatin kampus Liseu (24/02) hafoin husu ninia opiniaun ba kompañia Hong-Long fisheries ne’ebé peska ikan tuberaun hamutuk tonelada 43 iha tasi mane no ohin lorón rai hela iha Cairabela.

Nia dehan, kompaña Hong-Long ne’eb’e mai ho ró hamutuk 15 hodi hala’ao peska iha tasi laran parte tasi mane nian hanesan orgullu boot ida maibé depois atividade ne’e la’o lori fali fenomenu ne’ebé ladun di’ak ba estadu. Tan ne’e governu tenke husu ba empreza ne’e atu tau atensaun maka’as ba akordu ne’ebé iha nune’e bele define variadade ikan saida mak bele kaer no ikan ne’ebé bandu atu tuir lei peska nian.

Dosente ne’e deskonfia ohin lorón ikan tuberaun ninia presu di’ak iha merkadu nune’e halo empreza ne’e haluha tiha akordu ne’ebé estabelese ona. “Ikan tuberaun ho tonelada 43 ne’ebeé kompaña kaer ona ne’e sai hanesan prekupasaun boot tebes tanba kompaña la halo tuir ona akordu, dalaruma presu ikan tuberaun iha merkadu sae aas mak kompañia iha interese atu kaer, ne’e presiza halo investigamentu klena ida hodi bele hatene,”dosente ne’e hateten.

Nia dehan próbelma ne’ebé ohin lorón hasoru hanesan lisaun ida no sujere iha futuru kouandu kompañia hala’o fali atividade importante tebes atu tau timoróan sira hanesan ekipa tekniku ida hodi ba hamutuk ho kompaña kaer ikan iha tasi mane atu nune’e bele hatene saida de’it mak kompañia hala’o.

“Tanba kestaun ita iha dook rai maran labele hatene saida mak kompaña halo iha costa sul ne’eba tanba dook no fasilidade ne’ebé governu fó ba polisia maritima ho forsa naval sira la sufisiente atu destaka ba tasi mane hodi halo kontrólu,” dehan nia. Nia dehan governu mós presiza oferese fasilidade ne’ebé di’ak no hokualidae ba siguransa naval sira atu halo kontrólu másimu ba atividade sira iha tasi laran.

Ministru Estadu Koordenador Asuntu Ekonomia no Ministru Agrikultura no Peska (MAP) Estanislau Aleixo da Silva, hatete governu rekoñese sala tanba lista konvensaun ne’ebé antes ne’e asina katak ikan tubaraun hotu-hotu tenke hetan prótejidu.

Maske investigasaun sei la’o hela, maibé Estanislau haktuir, kompañia rasik komunika ona ho diresaun peskas katak, bainhira sira tau sira nia rede, dada mai ikan tubaraun tama iha redi laran, iha balu sei moris, sira hosik fila no iha balu mate mak sira lori ba rai maran no ohin loron rai hela iha Cairabela.

“Ne’ebé sira la subar, sira hatudu ba governu, ne’e hatudu katak sira iha seriedade,” hatutan Estanislau, La’ós tubaraun hotu-hotu sai hanesan prótejidu, iha rai Austrália, ikan tubaraun ema han, komu iha komvensaun ida bolu said, iha erru ida ne’ebé ita nia ministériu halo bainhira halo revizaun ba lista, ita tau iha lista ne’eba ikan tubaraun hotu-hotu prótejidu, tuir lolo’os labele, ne’e ita tenke rekoñese sala,” haktuir governante ne’e ba jornalista iha Palásiu Governu, Tersa, (21/02).

Tanba ne’e mak governu hanoin hela atu halo atlterasaun ba komvensaun ne’ebé mak antes ne’e asina ona. Estanislau hatete, ekipa investigasaun, ne’e tenke iha interministerial, ekipa ne’e integra mos Ministeriu Interior (MI), Ministeriu Defesa, (MD), Forsa Marinha. “Investigasaun ne’e bolu multi disiplinar, ekipa investigasaun ne’e la presija integra Komisaun Anti Korupsaun (KAK), tanba atividade ne’e atividade peska nian”haktuir Estanislau.

Entretantu Diretór Jerál Peskas - MAP, Acaçio Guterres, informa bainhira ekipa tékniku governu nian ba halo inpesaun ba ikan sira ne’ebé rai hela iha Cairabela ekipa tékniku empreza Hong long informa katak iha duni ikan tubaraun tonelada 43 maka konsege ka’er tanba tama sala redi. “Agora kompaña hapara ona servisu, konsege kaer ona ikan tuberaun tonelada haat nulu resin tolu, ministru orienta hodi bolu kapitaun hodi husu no notifikasaun fó ona ba kompaña,” Diretur Jeral Ministériu Agrikultura no Peska, Acacio Guterres dehan ba BT iha nia knar fatin kinta (23/02).

Diretór ne’e hatete problema ne’ebé ohin loron hasoru nu’udar mós esperiénsia ida ba governu nune’e iha futuru bele iha kontrolu di’ak liután ba empreza sira ne’ebé mai investe iha setór peska nian. “Ne’e hanesan esperensia ida mai ita hodi bele aprende liu tan tanba ita iha hela faze konstrusaun estadu ho parte ne’e it abele aprende legal hodi bele hadia diak liu ba futuru” diretur isplika.

Entretantu ekipa ne’ebé PM Rui forma hodi organiza investigasaun ba kazu ne’e mak hanesan Ministru Interior (MI) Longuinhos Monteiró, Vise Ministru Agrikultura no Peskas (MAP), Ministru Defesa (MD) Cirilo Cristovão, Ministru Estadu Kooordenador Asuntu Justisa no Ministru Admistrasaun Estatal (MAE) Dionísio Babo Soares no komandante Unidade Polísia Marítima Lino Saldanha. Tuir informasaun ne’ebé mak iha katak Kompañia Hong Long hasoru malu ho Ministeriu Agrikultura no Peskas iha lorón sabadu hodi hato’o próblema ne’ebé iha ba governu rasik. (BT)