DILI----Kompañia Telekomunikasaun OI Brazil ne’ebé mak oras ne’e dadaun fa’an nia asaun (saham) iha Timor Telekom apresia tebes ho proposta emprezariu timoan Abilio Araúju nian ne’ebé hakarak hola asaun ne’ebé OI fa’an ho valor osan millaun $72.5 maske seidauk iha disizaun final.

Bainhira empreza Brazileiru ne’e fa’an nia asaun iha empreza nasional rua mak hatama ninia proposta hanesan Abilio Araújo ho nia empreza Investel Comuniacation no Nilton Gusmão ho nia empreza Esperansa Timor Oan (ETO) no emprezariu internasional seluk ne’ebé iha interese mos ba asaun ne’e.

Asonista timoroan Julio Alfaro louva tebes Abilio Araújo tanba ihatan timoroan ida ne’ebé ho interese boot atu hola parte hanesan asionista mairia iha empreza Timor-Telecom maske seidauk hetan desizaun final husi empreza OI. “Kompañia OI sidauk foti desizaun final, tuir informasaun ne’ebé ami simu katak proposta senhor Abilio nian nu’udar proposta ne’ebé mak menarik liu no di’ak liu,” dehan asionista Timor-Telekom, Julio Alfaro ba BT via Telefone tersa – feira (31/01).

Julio haktuir durante ne’e kompañia nasional no internasional barak hanesan husi Fiji no rai seluk mak hatama proposta maibe to’o ikus sira la hatama proposta kona-ba kapital maibe timoroan Abilio Araújo hatama nia proposta ho kedas capital osan atu sosa asaun ne’ebé iha. “Se OI deside fo ba senhor Abilio nia sosio ida ne’ebé mak boot liu no disizasaun atu halo gestaun iha Senhor Abilio nia liman no hanesan Asonista ami mos espera katak disizaun ne’ebé fo bele halo gestaun foun hodi bele lori benifisiu ba Asonista sira hotu inklui mos ami sira iha laran,” katak nian.

Nia mos informa katak kona ba disizaun final ba proposta ne’ebé mak iha asonista sira iha Timor Telekom kontinua hein tanba iha fulan Marcu no abril sei realiza asembleia Jeral ida tanba ne’e fiar katak sei iha mós posibilidade ba kompañia OI atu foti disizaun depois remata asembleia refere. “Kona ba disizaun lolos ami sei hein tan uituan tanba la kleur tan Timor Telekom sei halo nia asembleia jeral iha fulan Marco ou fulan Abril tinan ne’e, ha’u hanoin iha asemblea jeral ne’ebé sei halao iha Timor-Telekom nia laran mak kompañia OI karik sei foti disizaun tuir ha’u nia hanoin no ha’u seidauk fó kepastian,” informa nia.

Ohin loron Timor Telekom nia estrutura asionista ka sosio, kompostu husi Telecomunicasão Publiku de Timor (TPT), ne’ebé nia komposizaun mak hanesan PT Partisipasões SGPS, S.A. (41.12%), Diocese Baucau ho Fundasaun São Jose (9.67%), Fundasaun Oriente (3,22%), ne’ebé konstitui sai naran TPT ho nia asaun 54,1%, Estadu Timor Leste (20,59%), kompanha VDP Operator Holdings (Maneul dos Santos) husi Macau (17, 86%), Julio Alfaro (4,48%), ho PT Partisipasaun SGPF, SA, (3,05%).

Razaun kompanhia OI fa’an ninia asaun uainhira mosu krizi boot iha nia rai nune’e hamosu dividas barak, maka OI deside fa’an nia asaun maioria iha TT hodi loke kokursu publiku internasionalmente ho nia razaun bele hetan empreza ne’ebé aprezenta valor di’ak liu para bele selu OI nia tusan no bele devolve OI nia investimentu.

Tuir Informasaun ne’ebé BT sita husi website Jornal Diariu nasional ne’ebé publika iha iha loron 30 katak emprezariu timoroan Abilio Araújo hetan ona indikasaun husi ezekutivu kompañia OI atu sosa asaun 54,1% iha Timor Telekom. Ho nune’e, proposta Abilio Araujo ho nia grupu ne’ebé mai ho kompañia Investel Comunication ho valor milhoens 72.5 USD bele asegura no satifas OI nia interese.

“Ha’u nia kompanha Ivestel Comunication ho sede iha Dubai, ami halo ami nia proposal, tuir ha’u nia hatene iha kompañia barak mak hato’o proposta, maibe iha selesaun kompañia Investel Communication mak di’ak liu (the best one) ba OI, tanba OI nia hakarak fa’an la’os haree ba de’it presu de’it, maibe mós haree katak osan iha ka lae,” hateten Abilio Araujo iha publikasaun JNDiario ne’ebé BT sita.

Abilio Araujo hateten, ezekutivu OI hakarak ona Investel Comunication sosa ninia asaun iha TT, tanba Investel Comunication aprezenta proposta ho kualidade no aprezenta ninia akuntabilidade ho dokumentus konfidensiais sira ne’ebé garantidu sosa asaun OI nia ho cash. Iha kompanha Invetel Comunication, Abilio Araujo kontrola sosio 50% no kompanhia rua seluk, ida husi Xina no ida seluk husi Arabia mos iha 50%.

“Ha’u bele dehan katak kompañia Investel Comunication ha’u mak prezidente no xefi ezekutivo, ha’u dehan katak na’in mak timoroan, katak timoroan iha rai liur no timor oan iha rai laran,” hateten Abilio Araujo. Dokumentus hotu ne’ebé liga ba negosiasaun sosa asaun OI nian ne’e kompletu ona, nklui osan iha bankaria mos prontu ona no Bord of Director husi OI mos aprova hotu ona, hein deit banku atu asina no hetan legalizasaun husi Tribunal razil nian.

“Kuandu sai nain tiha ona ba iha TT, Abilio hakarak mos TT ba investe iha rai sira seluk hodi halo internasionalizasaun ba TT, tanba ne’e maka emprezariu Abilio koalia tiha ona ho OI, katak kuandu rezolve tiha ida ne’e sira prontu atu sosa OI nia saham iha rai seluk,” hateten Abilio Araujo. Abilio aprofunda mos katak, atu realiza ambisaun ne’e tenki iha jestaun diak, planu investimentu diak, renovasaun, no haree mos merkadu entre operador seluk.

“Kuandu kontratu ne’e asina ona husi kompanhia Investel Communication, diresaun ka funsionarios kompanhia OI nian tenke rezigna an hotu ona. Ha’u mos sei konvoka asembleia jeral ida ne’ebé involve sosio sira hotu, hanesan Estado, Julio Alfaro no asionista seluk atu halo fali planu no hili fali deresaun sira,” hateten Abilio Araujo.

Tuir estatutu Investel Comunication nian katak, iha administrador hat, Estado rua no Manuel iha ida, ne’ebé Investel mak maioria. Maibe, ba Abilio Araujo, hirak iha parte administrasaun ne’e iha responsabilidade, agora ne’e modelu oin seluk, iha tempu Portugal no OI nian administrasaun seluk, tanba OI mak maioria. (BT)