DILI----Tuir relatoriu trimestral fundu mina rai Timor-Leste nian ne’ebe publika husi Banku Central Timor- Leste (BCTL) katak fundu minarai to’o iha loron 31 fulan Dezembru tinan 2016 hatudu negative, tanba relatoriu ne’e hatudu katak kapital fundu nian iha trimester ikus mak billaun $15,84 kompara ho billaun $16,60 iha fin trimester dahuluk.

Relatoriu ne’e mos hatudu katak total reseita simu iha trimester ne’e hamutuk millaun $36,21 ne’ebe kompostu husi kontribuisaun kontribuinte sira ba fundu hamutuk millaun $10,14 no pagamentu royalty simu husi autoridade nasional Petroleu (ANP) millaun $26,07.

Rendimentu husi investimentu fundu nian ne’e hamutuk millaun $197 kompostu husi kupaun no jurus ajente responsavel ba jestaun operasional fundu mina rai nian. Ministeriu Finansas mak responsabiliza atu estabelese estratejia investimentu tomak kona ba fundu ne’e nian. 

Tuir diretor executive Fundu Petroliferu Banku Central Timor-Leste Venancio Alves Maria hateten katak husi relatori trimester ba dala XLVI ne’ebe kobre period husi loron 1 fulan Outubru 2016 to’o loron 31 fulan Dezembru 2013 mak hanesan kapital fundu nian mak billaun $15,84 halo komparasaun ba iha trimestre uluk nian ne’ebe mak hamutuk billaun $16,60 no oras ne’e tun fali ba Billaun $15,84.

“Tuir relatori iha trimester ida ne’e ita nia kapital fundu mak Billaun $15.84, osan ba kontradu bruto fundu nian tama husi kontribuisaun kontribuinte, Realeza (royalties) hamutuk millaun $36,21, osan kontadu liquid ne’ebe sai husi fundu durante trimester ne’e mak hamutuk millaun $601,01 kompostu husi millaun $600 transfere ba orsamentu estadu no millaun $1,91 kobre kustu jestaun nian,” dehan diretor executive fundu Petroliun Venancio Alves Maria iha Lansamentu Relatoriu ikus Fundu Petroliferu iha edifisiu BCTL, Acaet kuarta (01/02).

Nia mos esplika katak reseitas likidus durante trimester ne’e mak hamutuk millaun $565,69 no rendimentu portu fo liu iha period ne’e mak 1,14% kompara ho rendimentu referensia mak 1,41%. (BT)