DILI----Jornal Business Timor halo ona tinan 5 (lima). Loron aniversariu dalimak ne’e monu iha 10 Maiu tanba iha loron ne’e tinan 2010 jornal Business Timor hahu publika primeiru edisaun. To’o halo tinan dalimak ne’e,  jornal semanáriu ne’ebé foka liu ba notisiariu prinsipal iha área sosiu-ekonómiku no negósiu iha rai laran ne’e, ninia númeru publikasaun ka edisaun da-257.

Durante ne’e jornal Business Timor sai nudar jornal úniku ne’ebé ho pájina 32, barak liu jornal sira seluk, no imprime pájina tomak koloridu. Ba loron aniversariu ne’e, lee-na’in sira fó apresiasaun no hanoin balu oinsa bele hadia, liu-liu kualidade notisia. Vise Reitor Institute of Business (IOB) Agustinho Coelho ne’ebé durante ne’e sai lee-na’in no mos fonte informasaun ida jornal Business Timor nian hatete jornal ne’e diak tanba fo espasu espesial ba informasaun ekonomia no negosiu nian. Maibe ba oin tenke hadia diak liu tan kualidade notisia liu husi hadia no kapasita jornalista nian atu bele hakerek notisia ho diak.

“Business Timor ate agora nia servisu kapaz tebes, produtivu no ativu konaba informasaun hanesan negosiu enjeral ekonomia iha Timor laran tomak. Business Timor  atu la’o ba oin tenki hadia rekursu umanu atu bele atende informasaun atividade dezenvolvimentu ekonomia iha Timor-Leste no mos fo motivasaun ba jornalista sira atu bele buka informasaun liu-liu ekonomia iha Timor laran tomak,” hatete Agustinho iha kampus IOB, Pantai Kelapa, kinta-feira (07/05/15).  

Vise Reitor IOB ne’e husu ba lideransa Business Timor nian  bele investe rekursu umanu diak liu tan atu jornal Business Timor  bele la’o ba oin, liu-liu jornalista sira loke tan sira nia hanoin koñesimentu atu oinsa bele hetan imformasaun ne’ebe diak liu. “Pesoal ha’u haree Business Timor diak tebes maibe importante liu mak investe rekursu umanu diak liu tan. Fo treinamentu ba jornalista sira mesmu durante ne’e diak ona la’os la di’ak, presiza rekursu umanu atu bele atende ba atividade governu no mos negosiu nian,” nia fó-hanoin.

Nudar fonte informasaun ida mos ba notisia jornal ne’e nian, Agustinho preokupa uitoan ba notisia balu opiniaun akademiku sira nian ne’ebé jornalista hakerek, sempre tau hamutuk iha notisia ida ho razaun tanba asuntu hanesan, “Ne’e diak,  maibe ha’u transparansia katak kaundu informasaun husi akademiku ida ba akademiku seluk seidauk halo definisaun keta-ketak. Porezemplu informasaun husi IOB tenki tau ketak mesmu topiku hanesan ho akademiku seluk, diak liu halo ida-idak ne’e mak importante,” nia sujere.

Nia fo nota ba notisia Business Timor katak 90% diak. “Ita teliti haree didiak item balu nia porsentu diak liu. Ema ne’ebe editor mak tenki iha koñesimentu atu bele edit berita ne’e ho diak tanba jornalista buka berita depois lori mai ketik entaun knaar  atu hadia mak editor,  maibe agora Business Timor kuaze porsentu 90.” Nia mos fo-hanoin katak ba oin Business Timor tenki servisu diak liu tan liu-liu fo motivasaun ba jornalista sira ne’ebe servisu atu bele iha vontade buka informasaun konsentra didiak ba ekonomia enjeral no mos ekonomia alternativu. (BT)