DILI----Kauza husi Portugal Telecom dada an hodi halai lakon abandona tiha Timor Telecom mak kompetisaun merkadoria telekomunikasaun iha Timor-Leste. TT lakon iha kompetisaun merkadoria tanba impaktu husi politika liberalizasaun setor telekomunikasaun ne’ebé hatama operador Telemor no Telkomsel. Ekonomista Joao Marioano Saldanha hateten mos katak Timor Telekom oras ne’e iha faze amiasado deit maibe Timor Telekom sei la lakon iha Timor Leste tanba durante tinan barak ona hamutuk ho Povu Timor Leste nomos iha ona kondisaun diak hodi servi povu iha pais nee.

Tan ne’e Joao sujere kompania Timor Telekom tenke hadia sistema jestaun atu oinsa bele halo kompetisaun iha merkadoria iha Timor Leste. Entretantu estudante sira fo hanoin hanesan katak ne’e problema jestaun no marketing ne’ebé TT tenke hatene hahalok konsumidor sira iha Timor-Leste, “Hau nia hare Timor Leste ne’e ema mesak gensi katak buat ne’ebe foun nia hakarak koko uza mak ida foun maibe ida tuan nia tau  tiha hanesan mos telekomunikasaun sira Timor Telekom uluk ema barak uza maibe foun mai fali  agora ema maioria uza mak Telemor tantu to’o iha distritu maibe ita halo komparasaun agora Timor Telekom diak liu halo komparasaun ho telekomunikasaun sira seluk,” dehan estudante Universidade  da Paz Manecas de Jesus ba BT iha Largo Kuarta Feira semana ne’e.

Tuir nia katak telekomunikasaun ne’ebe kleur ona iha Timor Leste no agora dadaun iha kompetisaun merkadoria ladun folin tanba impaktu husi gensi povu Timor Leste maibe la hare ba iha kualidade ne’ebe mak telekomunikasaun sira iha. “Ita nia gensi ita la hare kataak ida ne’ebe ma kualidade diak liu it abele halo komparasaun ba iha telekomunikasaun tolu ne’e ita hare diak mak Timor Telekom oras ne’e dadaun hanesan halo koparasaun it abele ativu F10 no ABSL ninia diak mak to’o 24 oras no prosesu internet oras nee lao lalais los kustu ba telephone malu diak tebes halo komparasaun iha tinan hirak liu ba,” katak nia.

Iha fatin hanesan estudante Fania Freitas mos hateten katak Timor Telekom oras ne’e nudar fase amiasado deit tanba povu  lakon konfiasa uituan ba sira tanba failansu iha  sistema ne’ebe mak durante tinan barak povu sira hasoru la konsege rezolve. “Sira tama faze amiasadu tanba sira durante ne’e tempu naruk hamutuk ho povu maibe la tuir sira nia  promote nebe mak iha katak “Timor Telekom ita hotu nia ligasaun” la tuir sira nia moto hodi halo povu  lakon fiar uituan deit laos maioria,” dehan Fania. 

Tan ne’e  nia  dehan wainhira TT  hadia nia sistema mak povu sei nafatin uza Timor Telekom bazea ba politika ne’ebe TT iha nomos tenke hadia nia sistema jestaun kompetisaun merkadoria. Tuir istoria neebe BT asesu iha website Timor Telekom katak operadora telekomunikasaun Rede Fixa nó Móvel iha Timor-Leste ne'e mosu wainhira 75% infra-estrutura mak hetan sobu iha fulan Setembru tinan 1999, hafoin fó sai rezultadu kona-ba Konsulta Populár ne'ebé fó lejitimidade ba povu Timór ninia vontade bá moris livre iha rai ukun rasik-aan. 

Iha tinan 2001, bainhira Timór sei iha hela responsabilidade UNTAET (adminitrasaun Nasoens Unidas) nian, mosu konkursu públiku internasionál ida atu hodi harii sistema Telekomunikasaun ba Timor-Leste tuir rejime BOT (Build, Operate, Transfer). Iha fulan Jullu tinan 2002, konsórsiu Timor Telecom (ne'ebé promove husi Portugal Telecom) manan konkursu refere, hodi ikus mai asina duni Kontratu Konsesaun entre Timor Telecom hó Estadu Repúblika Demokrátika Timor-Leste. Iha loron 17 fulan Outubru konsórsiu Timor Telecom nian, tranforma ofisialmente ba Timor Telecom, S.A. nu'udar sosiedade anónima dahuluk ne'ebé harii iha rai laran. Iha loron 1 fulan Marsu tinan 2003, Timor Telecom hahú hala'o operasaun (iha Díli, Lospalos, Baucau nó Oecusse).

Liu tiha tinan 10, Timor Telecom sai nu'udar empreza ida ne'ebé sólida nó dinámika, tanba ultrapasa ona dezafiu oioin nó TT sempre akompaña beibeik perkursu husi povu Timór nian desde Restaurasaun Independénsia. Akontesimentu barak mak marka ona iha istória Timor Telecom nian. Liu husi rezumu badak tuir mai, bele hatene akontesimentu kronolójiku prinsipál 10 ne'ebé konsolida TT ninia dalan ba iha futuru prósperu, nó iha vontade atu hadi'an liu tan. 

Iha loron 17 fulan Outubru tinan 2002, Timor Telecom moris nu'udar sosiedade anónima dahuluk nó hanesan operadora Telekomunikasaun iha Timor-Leste, hafoin iha tinan 2002 hala'o asinatura Kontratu Konsesaun entre Estadu RDTL nó Timor Telecom. Iha loron 1 fulan Marsu tinan 2003, TT hahú hala'o servisu operasaun iha Timor-Leste ho ninia rede rasik nó indikativu Timór nian (+670). Iha tinan 2004, halo inaugurasaun ba rede telekomunikasaun iha illa Ataúro. Tinan 2005-Halo abertura ba loja iha Maliana, Suai nó Oecusse. 

Iha tinan 2006, kliente besik rihun 50 mak hetan ona asesu ba servisu móvel. Hamosu mós lista telefónika dahuluk Timór nian. Iha tinan 2007, lansa servisu voice mail nó halo publikasaun ba Página Amarelas TL nian. Iha tinan 2008, TT iha ona kliente liu rihun 125 ba iha rede móvel nó, iha tinan ne'e ninia rohan, hamosu tan kartaun rekarga $1USD dahuluk. Iha tinan 2009, lansa servisu internet banda larga Net Bot nó hari'i komutadór nó plataforma husi rede intelijente, iha servisu telekomunikasaun iha Timor-Leste. Iha tinan 2010 halo lansamentu ba logotipu foun (Toke), lansa portal SAPO TL nomós hamosu rede fibra ótika iha sidade Dili. Iha tinan 2011 site ká BTS 100 ba servisu rede móvel hahu hala'o servisu.

Tinan 2012 Estadu Timor-Leste nó Timor Telecom asina akordu kona-ba sesasaun antesipada husi kontratu konsesaun ne'ebé hala'o tiha ona iha tinan 2002. Desde TT hahú nia servisu, empreza telekomunikasaun refere investe ona osan besik 103 milloens USD ba dezenvolvimentu infra-estrutura telekomunikasaun nian, nó ida ne'e hatudu katak durante tinan 10 TT mak hamriik ona iha liña telekomunikasaun nian oin nó adapta ba saida mak ninia kliente presiza.

Esforsu hirak ne'e hotu reflete kuantitativamente, liu husi númeru hirak tuir mai ne'e: Númeru kliente -632.500 ba rede móvel nó internet, Kobertura ba populasaun - besik 92% ba rede móvel nó internet , Númeru husi sites ne'ebé halo operasaun iha 2G nó 3G-139 (2G) nó 64 (3G), CCI's (Centro Comunitários de Internet)-instala ona CCI's hamutuk 29 ne'ebé konta ho parseria husi Instituisaun relijioza, empreendedór nasionál, Conselho Nacional da Juventude de Timor-Leste, Alénde CCI's, Timor Telecom, iha ninia ámbitu polítika ba responsabilidade sosiál, patrosina mós internet gratuita iha fatin oioin, hanesan Presidência da República, UNTL, UNPAZ, IOB, Departamento Juventude Católica Diocese Dili nó Baucau, STAE, CNE, Centro de Formação Professional S. Pedro Comoro, Fundação Visão Juvenil Timor-Leste nó Fundação Ahisaun nó mantén Protocolo de Cooperação ida ho Arquivo Museu da Resistência. 

Timor Telecom fó servisu diretamente ba traballadór hamutuk 275 iha empreza laran nó ba traballadór indereta hanesan prestadór servisu nian iha área seguransa, distribuisaun nó ajente autorizadu hamutuk ema 1000 resin. TT fó liu prioridade ba foin sa'e sira: idade média husi kolaboradór diretu mak tinan 35. Liu 69% traballadór Timor Telecom iha formasaun akadémika iha nível superiór. Kona-ba remunerasaun traballadór, TT oferese kondisaun kareira ne'ebé únika iha Timor-Leste, tanba konsidera nu'udar empregadór referensia iha rai laran, ho aposta forte ida ba iha formasaun téknika espesializada ba ninia kolaboradór,hamutuk hó pakote regalias sosiál nudar ezemplár ida iha Timor-Leste.

Alende ne’e mos Kompromisu ne'ebé halo ho Sosiedade Timor-Leste Timor Telecom nu'udar empreza ida ne'ebé iha komitmentu ba dezenvolvimentu sosiedade nian iha ninia dimensaun oioin. Tanba ne'e mak Timor Telecom apoia ona insiativa barbarak, hanesan publikasaun livru husi autór timor-oan ká kona-ba Timor-Leste, atividade artístika nó kultural, atividade desportiva, atividade ho karáter sosiál nó umanitária, hanesan Tour de Timor, Festival Ramelau, Pesca Internacional Ataúro nó Com, Maratona Dili Cidade da Paz, husi atividade sira seluk. Desde hahú ninia atividade, Timor Telecom, bá deit impostu, TT kontribui ona, atu nune'e Estadu RDTL bele foti 45 milloens USD iha impostu. Valór husi osan ne'e la inklui ho kuantia ne'ebé TT entrega ba Estaduhanesan dividendu ne'ebe mai husi husi partisipasaun Estado nudar asionista Timor Telecom nian. (BT)