DILI--Emprezariu koñesidu riku boot nain 18 husi Macau halao vizita mai Timor-Lete hodi hametin kooperasaun  ho governu Timor-Lete no hametin mos kordenasaun servisu ho Camara Comersiu Industria Timor-Leste (CCI-TL) molok atu mai investe iha nasaun ne’e. Komitmentu  emprezariu Macau nain 18 hatoo durante halao enkontru kortejia ida ho Prezidente CCITL Oscar Lima ho nia estrutura tomak iha edifisiu CCI-TL  Acait Dili, Segunda (14/07).

Emprezariu sira ne’e halo  vizita mai TL durante loron ida ho aviaun privadu husi Macau mai TL. Sira hetan akompañamentu husi Manajer General Dili Bussiness Solution, Noel Bernardo de Carvalho hodi hatudu dalan no lori emprezariu hirak ne’e hare potensia ba investimentu iha Timor-Leste. Komitiva emprezariu Macau  halao enkontru ho Ministru Agrikultura no Peskas (MAP), Mariano Assanami Sabino,  Ministru Negosiu Estranjeiru Jose Luis Guterres, Prezidente CCITL ho nia estrutura distritu tomak, Kordenador ZEEMS, Dr Mari Alkatiri no Vice Prezidente Parlamentu Nasional Aderito Hugo da Costa  hodi hato’o sira nia komitmentu  oinsa atu halo investimentu iha TL.

Hafoin hasoru malu ho Prezidente CCI-TL, Oscar Lima ho nia estrutura husi nivel nasional no distrital Oscar lima apresia tebes  ho vizita emprezariu sira ne’e mai TL no promete  prontu atu halo koperasaun diak entre TL ho Makau. “Ha’u apresia ohin sira mai atu koopera servisu ho CCI-TL oinsa maka emprezariu sira ne’e bele servisu hamutuk ho emprezariu nasional tomak atu dezenvolve Timor-Leste,” dehan Oscar ba jornalista iha edifisiu CCI-TL Acait hafoin enkontru ne’e remata. Nia haktuir iha enkontru sira deskute oinsa maka hametin kooperasaun servisu iha area ekonomia, agrikultura no peskas, turismu, otél no area importante seluk tan.

Tuir Oscar dehan, enkontru ho emprezariu nasional nu’udar pasu importante oinsa maka emprezariu idak-idak bele kontaktu malu hodi hahú servisu hamutuk. “Ami konvida sira se bele, mai labele iha deit Dili, pelumenus vizita netik ba turismu iha Kom-Lautem, Maubise, Foho Ramelau Ainaro no sentru turismu importante seluk tan iha Timor-Leste,” katak Oscar. Nia dehan, iha futuru mai, TL bele koopera servisu ho emprezariu timoroan iha area turismu, transporte, negosiu ekonomia no loke mos fabrika iha TL.

Fatin hanesan, Xefi Delegasaun Emprezariu Macau, Antonio Maria Hung agradese tebes vizita mai TL hare iha buat barak maka nasaun foun ida ne’e presija dezenvolve diak liutan. “Ami agradese ida ne’e primeiru vizita ami delegasaun ida ho aviaun privadu mai to TL ami agradese hakarak buka hatene no hakarak investe iha rai Timor,” nia hateten. Nia dehan, Timor rai sei mamuk barak hela, tanba ne’e sira hakarak mai vizita Timor-Leste ho tempu loron rua atu husu mós informasaun ba governu TL kona ba lei investimentu inklui rai atu hala’o investimentu nian (BT)