DILI–Governu Timor-Leste liu husi Sekretariu  Estadu Komunikasaun Sosial (SEKOMS) iha kuarta feira (07/05) Palácio do Governo asina kontraktu ho  Asosiasaun Jornalista  sira no Institusaun Media  sira iha TL ba fundu transferensia  publiku ne’ebé tulun asosiasaun jornalista no kompañia media sira. Objektivu asina kontrantu final SEKOMS  ne’e bazeia ba proposta nebe AJ no IM sira aprejenta ba iha  Sekoms iha fulan hirak liu.

Sekretariu Estadu Komunikasaun Sosial, Nélio Isaac Sarmento iha nia diskursu hatete,  apoiu ne’ebe mak governu fo laos atu hamate liberdade jornalista sira nia servisu iha social maibe  nudar  kontribuisaun  governu nian  hodi bele dezenvolve asosiasaun  no istitusaun media iha TL hodi bele servi diak liu tan ba publiku. “Apoiu ne’e laos atu hamate ita boot sira nia liberdade servisu  iha social tanba ida ne’e hanesan kontribuisaun governu nian ba iha insitusaun media  no asosiasaun sira,” dehan Nélio.

Liu husi fundu ne’ebe mak iha, Nelio husu ba iha  kada institusaun no asosiasaun sira atu bele utiliza fundu  hodi bele  iha rejultadu. “Se bainhira  la uza  osan  ne’ebe mak iha, la tuir dalan,  mak tinan oin sekoms sei la kontinua suporta tan media. Tanba ne’e hau husu atu bele uza osan ne’e didiak  ho resposabilidade, osan estadu nia laos Sekertaiu estadu nian,” dehan Nelio ba institusaun sira. Orsamentu ne’ebe  aprova iha  Parlamentu Nasional tinan  ne’e  ba ajuda IM no AS ho total kuaze $300,000.00.

Tuir dadus ne’enbe mak Busines Timor hetan  fundu kada insitutusaun media  no Asosiasaun Jornalista sira  hetan mak hanesan Jornal indepedente $17,014.25, Jornal Business Timor $13,525.00, Jornal Matadalan $17.150.00, Jornal Timor Roman $20,195.00, Jornal The Dili Weekly $4,982.00, Jornal Nasional Diariu $15,000.00, Jornal Timor Post $ 14,000.00, Time Timor $6,270.00 , Radio Timor Kmanek (RTK) $20,000.00, Radio RAKAMBIA $20,317.50, Radio Liberdade $18,066.75, Radio Loriku Lian (RALO) $7,890.00, Asosiasaun Jornalista Timor Lorosae (AJTL) $30.000.00, Radio Komunidade Oecusi $5,383.00,Radio Komunidade Kafe Ermera $ 11,353.00, Radio Komunidade Manatuto $ 5,708.00, Radio komunidade Mauloko (Maubesi) $8,335.00 no STL TV $19,200.00.

Liu husi fundu ne’ebe iha, kada insitusaun media no asosiasaun jornalista sira  ejekuta tuir proposta nebe iha, tanba balun ba iha formasaun jornalista, balun ba iha kontruksaun Edifisun  no balun sosa ekipamentus hodi  fasilita  jornalista  sira. Sekoms bolu atensaun mos ba insitusaun media no nain ba media sira atu labele  hein deit  treinamentu ne’ebe  fasilita husi  governu maibe  institusaun media mos tenke buka dalan atu oinsa bele fo kapasitasaun ba iha jornalista sira  atu bele halo nia knar   servisu iha nasaun ida ne’e diak liu. Tan ne’e nia husu ba media sira no asosiasaun tenke kria   relasaun  ho nasaun vizinhu sira atu bele fo formasaun ba iha jornalista sira iha TL hodi  bele servisu diak liu tan.

Ba jornalistas sira, Nélio reforsa tan katak ho apoiu sira ne’e media bele halao sira nia knar ho professional liu  tan hodi bele halo kobertura iha teritoriu tomak. Nune’e komunidade bele asesu ba ekonomia ne’ebe media sira produz. Nelio   haktuir mos katak SEKOMS propoin estadu bele apoiu  subsidu ba instituisaun media sira maibe  infelismente maioria politik sira la konkorda. Sira  hanoin  katak, media ne’e hanesan esforsu kompania nia, nune’e labele  depende ba governu, tanba  depois  sira  la hadutu prosesu  lolos ba kompania ne’ebe buka lukru.

“Iha dezintedementu entre politika ho  ita sira  servisu iha area komunikasaun Sosial  tanba Governu nia  hanoin,  se  ita loke oportunidade fo subsidiu ba jornalista sira laos tinan-tinan tau osan maibe  pelemenus ita tau subsidiu ba tinan ne’e  atu nune’e  tinan lima  oin mai ne’e  instituisaun media forte ona,” nia dehan. Iha fatin hanesan  bainhira  jornalista Business Timor  konfirma  konaba instituisaun media no asosiasaun balun balun nebe la hetan fundus ne’e, maibe director ne’e hatan katak sira la hatama proposta. Entretantu Diretor jornal semanariu Business Timor Carlos Malilaka hatete, tulun ne’ebe governu liu husi SEKOMS fo sei fasilita diak liu tan jornalista sira iha jornal Business Timor hala’o servisu no mos sei fasilita sirkulasaun jornal iha distritu balu hanesan iha Baucau no Maliana.

Tuir nia hatete, tinan haat ona jornal Business Timor eziste ho numeru edisaun 206 ona, jornal Business Timor alende sirkula iha capital Dili, sirkula mos iha distritu lima hanesan parte lorosa’e Baukau no Vikeke, no parte loromonu mak enclave Oekusi, Maliana, no Gleno ho numeru ne’ebé sei ki’ik. Ho ajudu governu ne’e, tuir proposta Business Timor sei sosa motorizada haat ne’ebé sei fahe ba jornalista na’in rua iha Dili no motorizada rua sei fasilita sirkulasaun jornal no kobertura jornalista iha Baukau no Maliana. Nia espera ho fasilidade meiu transporte hanesan motorizada bele aumenta numeru jornal ne’ebé sirkula iha distritu sira refere. (Business Timor)